यहेजकेल 6

इस्राएलेरे पहाड़ां केरे खलाफ नबूवत

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु अपनु तुत्तर इस्राएलेरे पहाड़ां केरे पासे केरतां तैन केरे खलाफ नबूवत केर, 3 ते ज़ो, हे इस्राएलेरे पहाड़व, प्रभु यहोवारू वचन शुना! प्रभु यहोवा पहाड़न ते पहैड़न, ते नालन ते वैदन सेइं इन ज़ोते: हेरा, अवं तुसन पुड़ तलवार च़लेइलो, ते तुश्शी पूज़ा केरनेरी ठारन नाश केरेलो। 4 तुश्शी वेदी उज़ड़ेली ते तुश्शी दिहाड़ेरे मूरती ट्लोड़ी गैली। ते अवं तुसन मरां मरोरे लोकन तुश्शी मूरती केरे सामने शैरेलो। 5 अवं इस्राएली केरे लाशन तैन केरि मूरती केरे सामने रखेलो, ते तैन केरि हेड्डन तुश्शी वेदी केरे आसे-पासे खिलैरेलो। 6 तुश्शे ज़ेत्रे बसेवरे नगरन, तैना सब एरे उज़ड़ी गाले, कि तुश्शे पूज़ा केरनेरी उच्‍ची ठारां उज़ड़ी गैली, तुश्शी वेदी उज़ड़ेली ते बिछ़ोड़ी गैली, तुश्शी मूरती ट्लोड़ी गैली ते तुश्शे दिहाड़ेरी मूरती केट्टी गैली; ते तुश्शी हथ्थां केरि बनेवरी चीज़ां मिटेई गैली। 7 तुश्शे दरमियान मरोरे लोकां केरे ढेर लग्गेले, ते तुसन पतो लग्गेलो कि अवं यहोवा आईं।

8 "फिरी भी अवं केत्रां केरे मझ़ाटे रेइलो। एल्हेरेलेइ ज़ैखन तुस मुल्खे-मुल्खे मां तितर-बितर भोल्हे, तैखन गैर कौमां केरे दरमियान तुश्शे किछ लोक तलवारी करां बच़ेले। 9 तैना बच़ोरे लोक, तैन कौमां केरे दरमियान, ज़ैन मां तैना गुलाम भोइ गाले, मीं याद केरेले; ते इन भी कि इश्शो व्यभिचारी दिल*6:9 व्यभिचारी दिल बेवफा यहोवा करां केन्च़रे दूर भोवरोए ते व्यभिचैरणरी ज़ेरि इश्शी एछ़्छ़ी मूरतन पुड़ केन्च़रे लेग्गी जेवरिन, ज़ैस सेइं यहोवारो मन दुखी भोवरोए। इस तरीके सेइं तैन बुरैई केरे वजाई सेइं, ज़ैना तैनेईं अपना सारां भिट्टां कम्मां केरतां कियोरिन, तैना अपने नज़री मां भिट्टे ठहरेले। 10 तैखन तैन्न पतो लग्गेलो कि अवं यहोवा आईं, ते तैन केरो सारो नुकसान केरनेरे लेई मीं ज़ैन ज़ोवरूए, तैन फुज़ूल नईं ज़ोवरू।"

11 प्रभु यहोवा इन ज़ोते: "च़ैड़ी देइतां ते अपनो अपने पव्वे सेइं ज़मीनी पुड़ बैइतां, सारे इस्राएली लोकां केरे भिट्टे कम्मन पुड़ अफ़सोस, अफ़सोस, किजोकि तैना तलवार, ढ्लुख, ते मरी सेइं नाश भोइ गाले। 12 ज़ै दूर भोए तै महामैरी सेइं मरेलो, ते ज़ै नेड़े भोए तै जंगी मां तलवारी सेइं मारो गालो; ते ज़ै बेच़तां नगरे मरां रेइतां घेरो गाए, तै ढ्लुखी सेइं मरेलो। इस तरीके अवं अपनि जलजलाहटी मां तैन पुड़ पूरे तरीके सेइं एज्जेलो। 13 ज़ैखन हर एक्‍की कोई उच्‍चे पहैड़ी ते पहाड़ां केरे हर एक्‍की च़ोटी पुड़, ते हर एक्‍की सब्ज़ बुट्टे हैठ, ते हर एक्‍की घने बंज़ेरे बुट्टे हैठ छावी मां, ज़ैड़ी-ज़ैड़ी तैना अपने सब मूरतन कां खुशबूदार चीज़ां च़ाढ़तन, तैड़ी तैन केरे लोकां केरि लाशां अपने वेदी केरे आसे-पासे अपने मूरती केरे मझ़ाटे मां पेवरी रहेली; तैखन तुसन लोकन पतो लग्गेलो कि अवं यहोवा आईं। 14 अवं अपनो हथ तैन केरे खलाफ केरतां तैस मुल्खेरे सारे घरन समेत सुनसान ठैरी करां लेइतां दिबला नगरेरे पासे तगर उज़ैड़तां छ़डेलो। तैखन तैन्न पतो लग्गेलो कि अवं यहोवा आईं।"