यहेजकेल 12

यहूदारी गुलामी अक निशान

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु, तू बगावत केरनेबाले घराने मां रहतस, ज़ैन लानहेरे लेई एछ़्छ़ी त आन, पन न लहन; ज़ैन्न शुन्नेरे लेई कन त आन पन न शुन्न; किजोकि तैना बगावत केरनेबाले लोक आन।✝12:2 मरक. 8:18;रोम. 11:8. 3 एल्हेरेलेइ ओ नाश भोने बाला मैन्हु, गुलाम भोनेरे लेई अपनु सामान तियार केरतां तैन केरे सामने खड़ो भोइयां, ते तैन केरे सामने अपनि ठार शैरतां होरि ठारी जो गेइयां। चाए तैना बगावत केरनेबाले लोकन, फिरी भी भोइ सकते कि तैना ध्यान देन। 4 एल्हेरेलेइ तू दीसां तैन केरे सामने गुलाम भोनेरे लेई सामान केढां, ते तैखन तू तैन केरे सामने ड्लवझ़ी जो गुलैमी मां गाने बालेरो ज़ेरो तैन केरे सामने खड़ो भोइयां। 5 तैन केरे सामने तू अपने घरेरी दिवार भेन्तां तैस्से बत्तां अपनु सामान बेइरोवं केढां। 6 तैन केरे सामने तू अपने कंधे पुड़ छ़ुइतां आंधरे मां केढां, ते अपनु तुत्तर छ़ुपेइतां रेखां कि तीं तल न लोड़े लेइहोरू; किजोकि मीं तू इस्राएली लोकां केरे लेई अक निशान ठहरावरोस।"

7 यहोवारे तैस हुक्मेरे मुताबिक मीं तेन्च़रे कियूं। दीसां मीं अपनु सामान गुलैमरे सामानेरू ज़ेरू कढू, ते ड्लवझ़ां मीं अपने हथ्थे सेइं अपने घरेरी दिवार भन्नी; ते आंधरे मां सामान कढू, ते तैन केरे सामने अवं अपने कंधे पुड़ सामान छ़ुइतां च़लो जेव।

8 होरसां झ़ेझ़ां यहोवाए मीं सेइं इन ज़ोवं, 9 "ओ नाश भोने बाला मैन्हु, कुन इस्राएली लोक मतलब बगावत केरनेबाले लोकव तुसेईं एन नईं पुछ़ोरू, ‘तू एन कुन केरतस?’ 10 तू तैन सेइं ज़ो, ‘प्रभु यहोवा एन ज़ोते; कि ऐह भारी वचन यरूशलेमेरे प्रधान ते इस्राएलेरे सारे लोकां केरे बारे मांए ज़ैस मां तैना रहतन।’ 11 तू तैन सेइं ज़ो, ‘अवं तुश्शे लेई अक निशान आईं; ज़ेन्च़रे मीं कियोरूए, तेन्च़रे इस्राएली लोकन सेइं भी कियूं गालू; तैन्न खड़े भोइतां गुलैमी मां गानू पेलू।’ 12 तैन मां ज़ै प्रधाने, तै आंधरे मां अपनु सामान कंधे पुड़ छ़ुइतां निसेलो; तै अपनु सामान कढनेरे लेई दिवार भन्नेलो ते अपनु तुत्तर छ़ुपेइतां रखेलो ते तैस तल न लोड़े लेइहोरू। 13 ते अवं तैस पुड़ अपनु जाल फैलेइलो, ते तै मेरे फंदे मां फसेलो; ते अवं तैस कसदी लोकां केरे मुल्ख बाबेले मां पुज़ेइलो; तै तैस मुल्खे न लेही बटेलो, ते तै तैड़ी मेरि गालो। 14 ज़ेत्रे तैसेरे मद्दतगार तैसेरे आसे-पासे भोल्हे, तैन्न ते तैसेरी सैरी टोली सेभी मुल्खन मां तितर-बितर केरतां छ़डेलो; ते दुश्मन तलवार ट्लेइतां तैन पत्ती च़लेइलो। 15 ज़ैखन अवं तैन्न कौमन मां तितर-बितर केरतां छ़डेलो, ते मुल्खे-मुल्खे मां छ़ींकेइतां छ़डेलो, तैखन तैन्न पतो लग्गेलो कि अवं यहोवा आईं। 16 पन अवं तैन मरां किछ लोकन तलवारी करां ते ढ्लुखी ते महामारी करां बच़ेइतां रखेलो; ते तैना अपने भिट्टे कम्मन तैन कौमन मां बियान केरेले ज़ैन मां तैना पुज़ेले; तैखन तैन्न पतो लग्गेलो कि अवं यहोवा आईं।"

थरकते नेबेरो निशान

17 तैखन यहोवाए मीं सेइं ज़ोवं, 18 "ओ नाश भोने बाला मैन्हु, थरकते अपनि रोट्टी खेइयां ते थरकते ते फिक्र केरतां तू अपनु पानी पीयां; 19 ते एस मुल्खेरे लोकन सेइं एन ज़ोइयां, कि प्रभु यहोवा यरूशलेमेरे ते इस्राएलेरे मुल्खेरे लोकां केरे बारे मां एन ज़ोते, तैना अपनि रोट्टी फिक्रे सेइं खाएले, ते पानी उदास भोइतां पीएले; किजोकि मुल्ख अपने सेभी रानेबालां केरे ज़ुलमेरे वजाई सेइं अपनि सारी भरपूरी करां खाली भोइ गालो। 20 बस्सोरे नगर उज़ड़ी गाले, ते मुल्ख भी बेरान भोइ गालो; तैखन तैन्न पतो लग्गेलो कि अवं यहोवा आईं।"

लोकन पसंद एज्जनी बाली कहावत ते पसंद न एजनेबालो सन्देश

21 फिरी यहोवाए मीं सेइं ज़ोवं, 22 "ओ नाश भोने बाला मैन्हु ऐह कुन कहावते ज़ै तुस लोक इस्राएलेरे मुल्खे मां ज़ोइयां केरतथ, ‘दिहाड़े बड़े बीते, ते दर्शनेरी कोई गल पूरी नईं भोवरी?’ 23 एल्हेरेलेइ तू तैन सेइं ज़ो, ‘प्रभु यहोवा एन ज़ोते; अवं एस कहावती बन्द केरेलो; ते ऐह कहावत इस्राएले मां फिरी न च़लेली।’ ते तू तैन सेइं ज़ो कि तै दिहाड़ी नेड़े एवरीए, ते दर्शनेरी सैरी गल्‍लां पूरी भोने बैलिन। 24 किजोकि इस्राएली लोकन मां न त कोई झूठी दर्शनेरी गल ते न कोई टपलाने बाली गल ज़ोई गाली। 25 किजोकि अवं यहोवा आईं; ज़ैखन अवं ज़ोईं, तैखन ज़ैन वचन अवं ज़ोइलो, तैन पूरू भोल्हु, तैस मां च़िर न लग्गेलू, पन, हे बगावत केरनेबाले लोकव तुश्शे दिहाड़न मां अवं वचन ज़ोइलो, ते तैन पूरू भोल्हु, प्रभु यहोवा एन ज़ोते।"

26 फिरी यहोवाए मीं सेइं ज़ोवं, 27 "ओ नाश भोने बाला मैन्हु, हेर, इस्राएली लोक तेरे बारे मां एन ज़ोने लगोरेन कि ज़ैन दर्शन, तै हेरते, तैन बड़े दिहाड़ां केरे बाद पूरू भोनेबालूए; ते बड़े च़िरेरे बारे मां नबूवत केरते। 28 एल्हेरेलेइ तू तैन सेइं ज़ो, प्रभु यहोवा एन ज़ोते; कि मेरू वचन पूरू भोने मां च़िर न लग्गेलू, बल्के ज़ैन वचन अवं ज़ोईं, तैन पक्‍कू पूरू भोल्हु, ‘प्रभु यहोवा एन ज़ोते।’"