1 यहोवाए मीं सेइं ज़ोवं, 2 "ओ नाश भोने बाला मैन्हु, इस्राएलेरे ज़ैना नबी अपने मने सेइं नबूवत केरतन, तैन केरे खलाफ नबूवत केरतां तू इन ज़ो, ‘यहोवारू वचन शुना!’ 3 प्रभु यहोवा एन ज़ोते; अफ़सोस तैन बेवकूफ नेबन पुड़ ज़ैना एपनी आत्माई पत्ती भेटकी गातन, ते तैन कोई दर्शन नईं मैल्होरू! 4 हे इस्राएल, तेरे नबी बेरान ठारन मां रानेबाले लोई केरे ज़ेरेन। 5 तैनेईं न शहरपनाहरी घेट्टी बन्द की, ते न इस्राएली लोकां केरे लेई शहरपनाहरी मरम्मत की, कि यहोवारे सज़ाह देनेरे दिहाड़े जंगी मां मज़बूत रेइ सकन। 6 तैना लोक ज़ैन ज़ोतन, यहोवा एन ज़ोते; ‘तैनेईं दर्शनेरो फुज़ूल ते झूठो दावो कियोरोए;’ ते फिरी भी ऐह उमीद दित्ती कि यहोवा एन वचन पूरू केरेलो; पन फिरी भी यहोवाए तैना नईं भेज़ोरे। 7 कुन तुश्शू दर्शन झूठू नईं, कुन तुस झूठी नबूवत न केरथ? तुसां ज़ोतथ, कि यहोवा एन ज़ोते; पन मीं किछ नईं ज़ोवरू।"

8 एल्हेरेलेइ प्रभु यहोवा तुसन जो ज़ोते, "तुसेईं ज़ै झूठी गल ज़ोई ते झूठां दर्शनां लाहोरेन, एल्हेरेलेइ अवं तुश्शे खलाफ आईं, प्रभु यहोवा एन ज़ोते। 9 ज़ैना नबी झूठां दर्शनां हेरतन ते झूठी नबूवत केरतन, मेरो हथ तैन केरे खलाफ भोल्हो, ते तैना मेरे लोकन मां हिस्सेदार न भोल्हे, ते न तैन केरां नंव्वां इस्राएलेरे नंव्वन मां लिखां गालां, ते न तैना इस्राएल मुल्खे मां दाखल भोइ सकेले; एस सेइं तुसन लोकन पतो लग्गेलो कि अवं प्रभु यहोवा आईं। 10 किजोकि तैन शान्ति आहे, एन ज़ोइतां मेरे लोक टपलाए, हांलाकि शान्ति नईं; एल्हेरेलेइ ज़ैखन कोई दिवार बनाते तैस पुड़ सुफेदी केरते।✝ 11 एल्हेरेलेइ सुफेदी केरनेबालन सेइं ज़ो कि तै बिछ़ड़ी गाली। किजोकि बड़ी ज़ोरेरी झ़ड़ी भोल्ही, ते बड़ी-बड़ी आन भी बखेली, ते बड़ो आँधी तूफान भी एज्जेलो तै बिछ़ड़ी गाली। 12 एल्हेरेलेइ ज़ैखन दिवार बिछ़ड़ी गाली, तैखन कुन लोक तुसन सेइं एन न ज़ोले कि ज़ै सुफेदी तुसेईं कियोरी थी तै कोरहां जेई। 13 एल्हेरेलेइ प्रभु यहोवा तुसन सेइं एन ज़ोते: अवं अपने क्रोधे मां बड़ो बात च़लेइलो; ते बड़ी जादे झ़ड़ी बखेइलो ते मेरी सरकरे वजाई सेइं बड्डी-बड्डी आन भी बखेली।✝ 14 एल्हेरेलेइ ज़ैस दिवारी पुड़ तीं छ़ित्ती सुफेदी कियोरीए, तैस अवं बुछ़ोड़तां छ़डेलो, बल्के मित्ती मां मिलेइतां छ़डेलो, ज़ैस सेइं तैसेरी मुनीयाद हिल्‍ली गाली; ते ज़ैखन तै बिछ़ड़ी गाली, तैखन तुस भी तैस हैठ ढ्लेन्च़ोइतां नाश भोइ गाले; ते तुसन पतो लग्गेलो कि अवं यहोवा आईं। 15 एन्च़रे सेइं अवं अपनो क्रोध दिवारी पुड़ ते तैस पुड़ सुफेदी केरनेबालन पुड़ भड़केइलो; फिरी तुसन सेइं ज़ोइलो, न त दिवार राई, ते न तैस सुफेदी केरनेबाले राए। 16 मतलब इस्राएलेरे तैना नबी ज़ैना यरूशलेमेरे बारे मां नबूवत केरते ते तैन केरि शैन्तरू दर्शन ज़ोते थिये, पन प्रभु यहोवा ज़ोते, कि शान्ति अथ्थी नईं।"

17 "फिरी यहोवाए ज़ोवं, ओ नाश भोने बाला मैन्हु, तू अपने मझ़ाटे रानेबाले लोकां केरि कौन्शां केरे खलाफ खड़ो भोइतां, ज़ैना अपने मने सेइं नबूवत केरतिन; तैन केरे खलाफ नबूवत केरतां ज़ो, 18 प्रभु यहोवा एन ज़ोते; कि अफ़सोसे तैन कौन्शन पुड़ ज़ैना पाखड़ां केरे लेई जंत्रां सीतिन, ते प्रैणी केरो शिकार केरनेरे लेई सब मैन्हु केरि एछ़्छ़ी ढकनेरे लेई कपड़े बनैतिन, तैन पुड़ अफ़सोस! कुन तुस मेरे लोकां केरो शिकार केरतां अपने प्राण बच़ेइ सकेली। 19 तुसेईं मुठड़ी भेरतां जौ ते रोट्टरे लेई अवं अपने लोकन मां अपवित्र ठहरेइतां ते एपनी झूठी गल्‍लां केरे ज़िरिये, ज़ैना मेरे लोक तुसन करां शुन्तन; ज़ैना नाश भोनेरे काबल न थिये; तैना मारे; ते ज़ैना बच़नेरे काबल न थिये तैना बच़ाए।"

20 "एल्हेरेलेइ प्रभु यहोवा तुसन सेइं एन ज़ोते, हेरा, अवं तुश्शे जंत्रां केरे खलाफ आईं, ज़ैन सेइं तुसां लोकां केरो शिकार केरतिथ, एल्हेरेलेइ अवं ज़ैन केरो तुसां शिकार केरतिथ अवं तैन्न तुश्शे हथ्थन मरां आज़ाद केरेलो। 21 अवं तुश्शे बुर्के छ़िन्दतां छ़डेलो, ते अपने लोकन तुश्शे हथ्थे करां छुटेइलो; ते तैना फिरी कधे तुश्शे कब्ज़े मां न राले कि तुस तैन केरो शिकार केरि सकथ; तैखन तुसन पतो लग्गेलो कि अवं यहोवा आईं। 22 किजोकि तुसेईं एपनी झूठी गल्‍लेईं सेइं धेर्मी लोकां केरो मन उदास कियोरोए, हालांकी मीं तैना उदास केरने न चाए, पन तुसेईं दुष्ट मैन्हु केरि मद्दत कियोरीए ताके तैना एपनी बुरैई करां बाज़ न एज्जन ते ज़ींते रान। 23 एल्हेरेलेइ तुसां फिरी न त झूठां दर्शनां हेरेली, ते न झूठी नबूवत केरेली, किजोकि अवं अपने लोकन तुश्शे हथ्थे करां बच़ेइलो, तैखन तुसन पतो लग्गेलो कि अवं यहोवा आईं।"