यहेजकेल 31

मिस्र ते अश्शूर मुल्खां केरि हार

1 इश्शे गुलैमरे यारोवं सालेरे ट्लेइयोवं महीनेरे पेइले दिहाड़े यहोवाए मीं सेइं ज़ोवं: 2 "ओ नाश भोने बाला मैन्हु, फ़िरौन ते तैसेरे लोकन सेइं ज़ो, अपने बराबर तू केस समझ़तस। 3 हेर, अश्शूर त लबानोनेरे एक्‍की गैइड़ेरो ज़ेरो थियो, तैसेरी रोड़ी-रोड़ी शाखां, ते घनी छाव देती थी ते बेड़ी उच्‍ची थी, ते तैसेरी च़ोट अम्बरे तगर पुज़ती थी। 4 पैनी सेइं तै बेडोव, तैस डुग्घे पैनेरी वजाई सेइं तै उच्‍चो भोव, ज़ैस सेइं दरिया तैसेरे च़ेवरे पासन बगते थिये, ते तैसेरे नहरां निस्सतां मैइदानेरे सारे बुट्टन कां पुज़ती थी। 5 एल्हेरेलेइ तैसेरी ऊँचाई मैइदानेरे सेभी बुट्टन करां जादे भोइ जेई; ते तैसेरी शाखां बेड़ि भोइ जेई, ते तैसेरी शाखां लेम्मी भोइ जेई, किजोकि ज़ैखन तैना निस्सी, तैखन तैन बड़ू पानी मैल्हू। 6 तैसेरे डालन पुड़ हवारां हर किसमेरां च़ुड़ोलू आल्हे बनातां थियां, ते तैसेरी शाखन हैठ मैइदानेरे हर किसमेरे जानबर ज़र्मते थिये; ते बेड़ी-बेड़ी कौमां तैसेरी छावी मां रहती थी।✝31:6 दान. 4:12. 7 तै अपने शान-ओ-शोकतरे वजाई सेइं ते अपने लम्मे शाखां केरे वजाई सेइं खूबसूरत भोव, किजोकि तैसेरां ज़ीलां पैनी मां दूर तगर पुज़ोरां थियां। 8 परमेशरेरे बागरे गैइड़ भी तैस छ़ुपेई न थिये सखते, सनोवर बुट भी तैसेरी शाखां केरे ज़ेरे थिये, ते न अर्मोनेरे बुट तैसेरी शाखां केरे ज़ेरे थिये; परमेशरेरे बागरो कोई भी बुट हेरने मां तैसेरो ज़ेरो न थियो। 9 मीं तै हेछी शाखां केरे ज़िरिये सेइं खूबसूरत बनेवरो थियो, एड़ी तगर कि अदनेरे सारे बुट ज़ैना परमेशरेरे बागी मां थिये, तैस पुड़ ज़लते थिये।

10 "एल्हेरेलेइ परमेशर यहोवा एन ज़ोवं, तैसेरी ऊँचाई ज़ै बेधी जेई, ते तैसेरी च़ोट ज़ै अम्बरे तगर पुज़ोरीए, ते अपने उच्‍चारेरे वजाई सेइं ज़ै तैसेरो मन फुल्‍ली जेवरोए, 11 एल्हेरेलेइ कौमन मां ज़ै ताकतबर भोवरोए, अवं तैस तैसेरे हथ्थे केरेलो, ते तै तैस सेइं पक्‍को बुरो बर्ताव केरेलो। तैसेरे दुष्टेरे वजाई सेइं मीं तै कढोरोए। 12 परदेशी, ज़ैना कौमन मां खतरनाक लोकन, तैना तैस केटतां छ़डेले, तैसेरी शाखां पहाड़न पुड़, ते सेभी वैदन मां बुछ़ोड़तां छ़डेले, ते तैसेरी शाखां मुल्खेरे सेभी नालन मां ट्लुटोरी रेई गैली, ते कौमां-कौमां केरे सारे लोक तैसेरी छावी मरां च़ले गाले। 13 तैस डुलोरे बुट्टे पुड़ अम्बरेरां सारां उडरने बालां च़ुड़ोलू आल्हे बनातन, ते तैसेरे डालन पुड़ मैइदानेरे सारे जानबर च़ड़तन। 14 एन एल्हेरेलेइ भोवं कि पैनेरे सेभी बुट्टन मरां कोई भी अपनि ऊँचाई न बधाए, न अपनि च़ोट अम्बरे तगर पुज़ाए, ते तैन मरां ज़ेत्रे भी पानी मैलतां मज़बूत भेवरेन, तैना उच्‍चे भोने सेइं अपनि क्रोड़ी खड़ी न केरन; किजोकि तैना भी सारे कब्री मां दबोरे मैन्हु केरे ज़ेरे मौतरे हवाले केरतां, अधलोके मां छ़डे गाले।

15 "परमेशर यहोवा एन ज़ोते: ज़ैस दिहाड़े तै अधलोके मां उतरी गालो, तैस दिहाड़े अवं मातम करालो ते डुग्घे समुन्दरे मां ढेक्‍की छ़डेलो, ते दरियां केरू बड़ू पानी रुकी गालू; ते तैसेरी वजाई सेइं अवं लबानोन पहाड़े पुड़ उदासी छ़डेलो, ते जंगलेरे सारे बुट शुक्‍की जे। 16 ज़ैखन मीं तै कब्री मां दब्बोरे लोकन कां अधलोके मां शैरतां छ़डो, तैखन तैसेरे बिछ़ड़नेरे आवाज़ी सेइं कौमां-कौमां केरे लोक थरकने लगे, एड़ी तगर कि अदनेरे सारे बुट मतलब लबानोनेरे रोड़े-रोड़े बुट्टेईं ज़ेत्रन पानी मैलतू थियूं, तैन सेभन अधलोके मां आराम मैल्हो। 17 तैना भी तैस सेइं साथी तलवारी सेइं मारोरे लोकन कां अधलोके मां उतरी जे; मतलब तैना ज़ैना तैसेरी पाखड़ थिये, ते कौमन-कौमन मां तैसेरी छावी मां रहते थिये।

18 "एल्हेरेलेइ तू शान-ओ-शोकती मां अदनेरे बुट्टन मरां केसेरो ज़ेरोस? तू त अदनेरे बुट्टन सेइं साथी अधलोके मां उसालो गालो, ते ज़ैन लोकां केरो खतनो नईं भोवरो तैन मां तलवारी सेइं मारोरे लोकन मां पेवरो रालो। फ़िरौनेरे लोकन सेइं एन्च़रे भोल्हु, परमेशर यहोवा एन ज़ोते।"