यहेजकेल 43

परमेशरेरे भवने मां तैसेरी महिमा

1 फिरी तैनी मैन्हें अवं तैस फाटके कां नियो ज़ै पूर्वी पासे थियो। 2 तैखन इस्राएलेरे परमेशरेरी महिमा पूर्वी पासेरां अई; ते तैसेरी आवाज़ बगते पैनेरी ज़ेरि ज़ै दड़दड़ाट तरीके सेइं भोती थी; ते तैसेरे महिमाई सेइं धेरती पुड़ लौ भोइ जेई।✝43:2 प्रका. 19:6. 3 एन दर्शन तैस दर्शनेरू ज़ेरू थियूं, ज़ैन मीं यरूशलेम नगरेरे नाश केरनेरे एंइते बार लाहेरू थियूं; ते तैस दर्शनेरू ज़ेरू, ज़ैन मीं कबार दरियाएरे बन्ने पुड़ लाहेरू थियूं; ते अवं तुत्तरे भारे झुकी जेव। 4 तैखन यहोवारी तै महिमा फाटके पुड़ेरां भोइतां ज़ै पूर्वी पासे थी, भवने मां अई। 5 तैखन यहोवारी आत्मा अवं उबरे नेइतां एंत्रीं अंगने मां पुज़व; ते यहोवारी महिमा भवने मां भेरोई जेवरी थी।

6 तैखन ज़ै मैन्हु मीं कां खड़ो थियो तैखन मीं कोई आवाज़ शुनी, ज़ै भवने मरां मीं सेइं गल्‍लां केरि राहोरो थियो। 7 तैनी मीं सेइं ज़ोवं, "ओ नाश भोने बाला मैन्हु, यहोवा एन ज़ोते, ऐह त मेरे तखतेरी ठार ते पव रखनेरी ठारे, ज़ैड़ी अवं इस्राएले मां हमेशारे लेई बास केरेलो। न त इस्राएली लोकेईं ते न तैन केरे राज़े अपने व्यभिचारे करां या एपनी उच्‍ची ठारन मां अपने राज़ां केरि लाशां *43:7 राज़ां केरि लाशां यहूदा प्रदेशेरे राज़ेईं परमेशरेरे भवनेरे अंगने मां मूरती पूज़ा शुरू करेवरी थी।केरे ज़िरिये मेरू पवित्र नवं अशुद्ध केरेले। 8 तैना अपनि डेवढी मेरी डेवढी कां, ते अपना दारां केरे खम्भे मेरे दारां केरे खम्भन कां नेड़े बनाते थिये, ते मेरे ते तैन केरे मझ़ाटे सिर्फ अक दिवार थी, ते तैनेईं अपने भिट्टे कम्मां केरि वजाई सेइं मेरू पवित्र नवं अशुद्ध कियोरू थियूं; एल्हेरेलेइ मीं अपने क्रोधे सेइं तैना नाश किये। 9 हुनी तैना अपने व्यभिचार ते अपने राज़ां केरि लाशां मेरे सामनेरां दूर केरन, तैखन अवं तैन मां हमेशारे लेई बास केरेलो।"

10 यहोवा इन भी ज़ोवं, "ओ नाश भोने बाला मैन्हु, तू इस्राएली लोकन इस भवनेरो नमूनो हिरा, कि तैना अपने अधर्मेरे कम्मन करां शरमिन्दे भोइतां तैस नमूने नापन। 11 अगर तैना अपने सारे अधर्मेरे कम्मन करां शरमिन्दे भोन, त तैन इस भवनेरो नकशो ते तैसेरी शकल ते एसेरे अन्तर बेइर गानेरी बत, ते एसेरे सब नकशे ते विधि ते नियम समझ़ेइतां, ते एसेरे सामने लिखतां रेखां; ज़ैस सेइं तैना एसेरो सारो नकशो ते एसेरी सब विधि याद केरतां तैसेरे मुताबिक केरन। 12 भवनेरो नियम एहे कि पहाड़ेरी च़ोटरे च़ेवरे पासां केरो सारो हिस्सो परमपवित्रे। हेर भवनेरो नियम एहे।

वेदरी बनावट

13 "एरे हथ्थेरे मुताबिक ज़ै आम हथ्थे करां च़ेवर अंगल जादे भोए, वेदरी नाप एहे, मतलब तैसेरो आधार अक हथ ते तैसेरी चौड़ाई भी अक हथ आहे, ते तैसेरे च़ेवरे पासां केरे कूनेरी पटरी च़ेवर अंगल। ते वेदरी ऊँचाई एहे: 14 ज़मीनी पुड़ रखोरे आधारे करां बुनीयें कुर्सी तगर तै दूई हथ उच्‍ची ते अक हथ बिल्‍ली ते निकड़ी कुर्सी करां लेइतां बेड्डी कुर्सी तगर च़ेवर हथ उच्‍ची ते अक हथ बिल्‍ली भोए। 15 ते वेदरो बेइयों हिस्सो च़ेवर हथ उच्‍चो भोए; ते वेदी पुड़ फुकनेरी ठार च़ेवर शिंगां उबरे जो निसरोरां भोन। 16 वेदी पुड़ फुकनेरी ठार चौवरस भोए, मतलब 12 हथ लम्बाई ते 12 हथ चौड़ाई भोए।✝43:16 यहे. 27:1. 17 बुन्हीं कुर्सी 14 हथ लम्मी, ते 14 हथ बिल्‍ली भोए, ते तैसेरे च़ेवरे पासां केरि पटरी अधो हथ भोए, ते तैसेरो आधार अक हथ भोए। ते एसेरी पेवड़ी पूर्वेरे पासे भोन।"

वेदरू अर्पण

18 फिरी यहोवाए मीं सेइं ज़ोवं, "ओ नाश भोने बाला मैन्हु, परमेशर यहोवा एन ज़ोते, ज़ैस दिहाड़े होमबलि च़ाढ़नेरे लेई खून छ़िड़कनेरे लेई वेदी बनाई गाए तैस दिहाड़ेरी विधि इना भोन।

19 "मतलब लेवी याजक सादोकेरे खानदाने मरां आन, ते मेरी सेवा केरनेरे लेई मेरे हज़ूरी मां रहतन, तैन तू पापबलि देनेरे लेई बछ़ड़ू देइयां, परमेशर यहोवा एन ज़ोते। 20 तैखन तू तैसेरे खूने मरां किछ नेइतां वेदरे च़ेवरे शिंगन ते कुर्सी पुड़ च़ेवरे कून्न ते च़ेवरे पासन पेटरी पुड़ लेइयां; एस तरीके सेइं तैसेरे लेई प्रायश्चित केरनेरे ज़िरिये तैस पवित्र केरां। 21 तैखन पापबलि केरनेरू बछ़ड़ू नेइतां भवनेरे पवित्र ठारी करां बेइर नेइतां फुक्‍की छ़ेडथ। 22 दूइयोवं दिहाड़े अक बगैर नुक्से थाव्वो नेइतां पापबलि केरतां च़ैढ़थ; ते ज़ेन्च़रे बछ़ड़ेरे ज़िरिये वेदी पवित्र की गाए, तेन्च़रे तै एस थाव्वेरे ज़िरिये भी पवित्र की गाए। 23 ज़ैखन तू तैस पवित्र केरि छ़डस, त तैखन अक बगैर नुक्से बछ़ड़ू ते अक बगैर नुक्से हुड़ च़ैढ़ां। 24 तू तैन यहोवारे सामने ऐनां, ते याजक तैन्न पुड़ लून लेइतां तैन यहोवा जो होमबलि केरतां च़ाढ़न। 25 सत दिहाड़न तगर तू रोज़ पापबलि केरनेरे लेई थाव्वो तियार केरां, ते बगैर नुक्से बछ़ड़ू ते भैड्डन मरां बगैर नुक्से हुड़ भी तियार किये गान। 26 सत दिहाड़न तगर याजक वेदरे लेई प्रायश्चित केरतां तैस शुद्ध केरते रान; एस्से तरीके तैसेरी मेरे लेई प्रतिष्ठा भोए। 27 ज़ैखन तैना दिहाड़े पूरे भोन, तैखन अठोवं दिहाड़ेरे बाद याजक तुश्शी होमबलि ते मेलबलि वेदी पुड़ च़ाढ़न; तैखन अवं तुसन पुड़ खुशी भोल्हो, परमेशर यहोवा एन ज़ोते।"