यहेजकेल 25

अम्मोनी लोकां केरे खलाफ नबूवत

1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, अम्मोनी लोकां केरे पासे फिरतां तैन केरे बारे मां नबूवत केर। 3 तैन सेइं ज़ो, हे अम्मोनी लोकव, परमेशर यहोवारू वचन शुना, परमेशर यहोवा एन ज़ोते कि तुसेईं ज़ै मेरे पवित्र ठारारे बारे मां ज़ैखन तै अपवित्र की, ते इस्राएल मुल्खेरे बारे मां ज़ैखन तै उज़ाड़ो, ते यहूदारे घरानेरे बारे मां ज़ैखन तैना गुलैमी मां जे, अहा, अहा! ज़ोवं! 4 एल्हेरेलेइ हेरा, अवं तुसन पूर्वेरे लोकां केरे हवाले केरनेबालोईं; ते तैना तेरे मुल्खे मां डेरे लाएले ते अपना घरां बनाले; ते तेरे बुट्टां केरे फल खाएले, ते तेरे जानबरां केरू दुद्ध पीएले। 5 ते अवं रब्बाह नगर ऊँटां केरे लेई च़रनेरे ठार ते अम्मोनी लोकां केरो मुल्ख गब्बां केरे बिशनेरी ठार बनेइलो; तैखन तुसन पतो लग्गेलो कि अवं यहोवा आईं। 6 किजोकि परमेशर यहोवा एन ज़ोते: तुसेईं ज़ैना इस्राएलेरे मुल्खेरे वजाई सेइं च़ैड़ी दित्तोरी थी ते नच़ोरे थिये, ते अपने मनेरे सारे अभिमाने सेइं आनन्द कियोरो थियो, 7 एल्हेरेलेइ हेरा, मीं अपनो हथ तेरे पासे खड़ो कियोरोए; ते तीं अवं कौमां-कौमां केरे लोकन करां लुटेइलो, ते मुल्खे-मुल्खेरे लोकन मरां तीं मटेइतां छ़डेलो; ते मुल्खे-मुल्खे मरां नाश केरेलो। ते अवं तेरो सत्यानाश केरतां छ़डेलो; तैखन तीं पतो लग्गेलो कि अवं यहोवा आईं।

मोआबेरे खलाफ नबूवत

8 "परमेशर यहोवा एन ज़ोते: मोआब ते सेईरेरे लोक ज़ैना ज़ोतन, हेरा, यहूदारे लोक सेभी कौमां केरे ज़ेरे भोइ जेवरेन। 9 एल्हेरेलेइ हेरा, मोआब मुल्खेरे बन्नेरे नगरन बेत्यशीमोत, बालमोन ते किर्यातैम, ज़ैना तैस मुल्खेरे शान-ओ-शोकती बालेन अवं तैन केरि बत खोलतां 10 तैन अवं पूर्वी पासेरे लोकां केरे अधिकारे मां एल्हेरेलेइ केरेलो कि तैना अम्मोनी लोकन पुड़ चढ़ाई केरन; ते अवं अम्मोनी लोकन एड़ी तगर तैन केरे अधिकारे मां केरेलो कि कौमी-कौमी मां तैन केरि याद फिरी न राहेली। 11 एन्च़रे सेइं अवं मोआबे भी सज़ाह देइलो। ते तैन्न पतो लग्गेलो कि अवं यहोवा आईं।

एदोमेरे खलाफ नबूवत

12 "परमेशर यहोवा एन भी ज़ोते: एदोमेरे लोकेईं ज़ै यहूदारे लोकन करां बदलो घिनोरोए, एन्च़रे सेइं तैना बड़े पापी भोइ जेवरेन, 13 एल्हेरेलेइ परमेशर यहोवा एन ज़ोते, कि अवं एदोम मुल्खेरे खलाफ अपनो हथ खड़ो केरेलो ते तैस मरां मैन्हु ते गोरू गब्बां दूईने नाश केरेलो; ते तेमान नगरे करां लेइतां ददान नगरे तगर उज़ैड़तां छ़डेलो; ते तैना तलवारी सेइं मारे गाले। 14 अवं अपने लोकन इस्राएलेरे ज़िरिये एदोमे करां अपनो बदलो घिन्नेलो; ते तैना तैस मुल्खे मां मेरे क्रोधेरे मारे ते सरकरे मुताबिक कम केरेले। तैखन तैन्न मेरो बदलो घिन्नेरो पतो लगोरोए, परमेशर यहोवा एन ज़ोते।"

पलिश्ती केरे खलाफ नबूवत

15 परमेशर यहोवा एन भी ज़ोते, "पलिश्ती लोकेईं बदलो घिन्नो, बल्के अपने जुगे-जुगेरी दुश्मनेरे वजाई सेइं अपने मनेरे अभिमाने सेइं बदलो घिन्नो, कि यहूदा नाश केरन, 16 एल्हेरेलेइ परमेशर यहोवा एन ज़ोते, हेर, अवं पलिश्ती लोकां केरे खलाफ अपनो हथ खड़ो केरने पुड़ आईं, ते करेती लोकन मिटेइतां छ़डेलो; ते समुन्दरेरे बन्ने बच़ोरे लोकन नाश केरतां छ़डेलो। 17 अवं एपनी जलजलाहटी सेइं मुकदमो लड़ेलो, तैन सेइं लड़ाई केरतां बदलो घिन्नेलो। ते ज़ैखन अवं तैन करां बदलो घिन्नेलो, तैखन तैन्न पतो लग्गेलो कि अवं यहोवा आईं।"