यहेजकेल 17

उकाबा केरि मसाल

1 एक्‍की फेरे फिरी यहोवाए मीं सेइं ज़ोवं, 2 "ओ नाश भोने बाला मैन्हु, इस्राएली लोकन सेइं ई पुनानी ते मसाल ज़ो; प्रभु यहोवा इन ज़ोते, 3 एक्‍की लम्मे फंघन बाले, फंघन सेइं भेरतां ते रंग बरंगे बड्डे उकाबे लबानोने मां गेइतां एक्‍की गैइड़ेरी च़ोट ट्लाई। 4 तैखन तैनी तैस च़ोटरी पतली डालड़ी ट्लोड़ी, ते तै बुपैरी केरे मुल्खे मां नी ते तैड़ी बुपैरी केरे एक्‍की नगरे मां लाई। 5 फिरी उकाब इस्राएले मां अव ते तैट्ठां किछ बीज़ नेइतां एक्‍की हेइड्ले उडारे मां बेवं, ते तैन बड़े पैनेरे ड्लेखी मजनू बुट्टेरू ज़ेरू लव। 6 ते तैन बीज़ लेगतां अक निकड़ी ज़ेरी दाछ़ भोइ जेई, ज़ेसेरी डैलड़ी तैसेरे पासे झुकी, ते तैसारां ज़ीलां उन्ढे लग्गां, एन्च़रे सेइं तै दाछ़ बेनी जेई ते तैस डाल लगे ते पट्लां लग्गां।

7 "फिरी अक बड्डो उकाब थियो, तैसेरां बड्डां-बड्डां फंघां थियां, ते तैसेरे फंघन बड़े बाल थिये, फिरी तै दाछ़ तैस ठारी पुड़ ज़ैड़ी तै लेवरी थी; तैस होरि उकाबेरे पासे अपनु ज़ील फैलाने ते एपनी डैलड़ी झुकने लगी कि तै तैस खिच्‍चे। 8 पन तै त रोड़े ते बड़े पैनी कां एल्हेरेलेइ लेवरी थी, कि तैस डाल लग्गन, ते तैस मां फल लगे, ते तै शानदार दाछ़ बनी। 9 एल्हेरेलेइ तू इन ज़ो, प्रभु यहोवा एन पुछ़ते: कुन तैस फल लग्गेले? कुन तै तैस ज़ीलना न पुटेलो, ते तैसेरे फल न बिछ़ोड़ेलो कि तै अपने सेभी सब्ज़ नंव्वे पट्लन समेत शुक्‍की गाए? इस ज़ीलना पुटनेरे लेई जादे ज़ोर ते हछे मैन्हु केरि ज़रूरत न भोल्ही। 10 चाहे, तै लगोरी भी राए, त कुन तैस फल लग्गेलो? ज़ैखन तैस पूर्वेरी हवा लग्गेली त कुन तै शुकेली न? तै त ज़ैड़ी लगोरी थी तैस्से कियैरी मां शुक्‍की गाली।"

मसालरो मतलब

11 फिरी यहोवाए मीं सेइं ज़ोवं: "तैस बगावत केरनेबाले घराने सेइं ज़ो, 12 कुन तुस एना गल्‍लां केरो मतलब न समझ़थ? फिरी तैन सेइं ज़ो, बाबेलेरो राज़ो यरूशलेमे मां जेव ते तैट्ठेरो राज़ो ते तैट्ठेरे प्रधान एन्हतां अपने इड़ी बाबेले मां पुज़ाए। 13 फिरी तैनी यहूदारे राज़ेरे खानदाने मरां एक्‍की मैन्हु सेइं करार कियो, ते तैस करां वफादार रानेरी कसम कराई, ते तैनी इस्राएलेरे खास प्रधान भी निये। 14 कि तै रियासत कमज़ोर राए ते बगावत न केरि सके, बल्के करार मेनतां मज़बूत राए। 15 पन यहूदारे राज़े तैसेरे खलाफ बगावत की, ते घोड़े ते अक बड़ी सेना हासिल केरनेरे लेई मिस्रे मां दूत भेज़े, कुन तै कामयाब भोल्हो? कुन एरां कम्मां केरनेबालो मैन्हु बच़ेलो? कुन तै अपनो करार ट्लोड़ने पुड़ भी बच़ेलो? 16 प्रभु यहोवा एन ज़ोते, मीं अपनि कसम, ज़ैस राज़ेरी दित्तोरी कसम तैनी घटिया समझ़ी, ते ज़ेसेरो करार तैनी ट्लोड़ो, ज़ैनी तै राज़ो बनेवरो थियो, मतलब बाबेले मां तैस्से कां तै मेरि गालो। 17 ज़ैखन तैना बड़े लोकां केरो नाश केरनेरे लेई मोरच़ो लान, ते क़िलो बनान, तैखन फ़िरौन एपनी बेड़ी सेना ते कही लोकां केरे भोंते संते भी तैसेरी कोई मद्दत न केरेलो। 18 किजोकि तैनी कसम घटिया समझ़ी, ते करार ट्लोड़ो; हेरा, तैनी करार केरतां भी एरां-एरां कम्मां कियोरन, एल्हेरेलेइ तै बेंच़ी न सकेलो। 19 प्रभु यहोवा एन ज़ोते, मीं अपनि कसम, तैनी मेरी कसम घटिया समझ़ी, तैनी मेरो करार ट्लोड़ोरोए; एस पापेरी अवं तैस सज़ाह देइलो। 20 अवं अपनु जाल तैस पुड़ फैलेइलो ते तै मेरे फंदे मां फसेलो; ते अवं तैस बाबेले मां पुज़ेइतां तैस सेइं धोखो केरनेरो मुकदमो लड़ेलो, ज़ै तैनी मीं सेइं कियोरोए। 21 तैसेरी सेनाई मरां ज़ेत्रे नश्शेले तैना सब तलवारी सेइं मारे गाले, ते ज़ैना रेइ गाले तैना च़ेवरे पासन तितर-बितर भोइ गाले। तैखन तुसन पतो च़लेलो कि मीं यहोवाए एन ज़ोवरू थियूं।"

परमेशरेरो वाधो

22 प्रभु यहोवा एन भी ज़ोते, "अवं भी गैइड़ेरे उच्‍ची च़ोटी पुड़ेरां अक डालड़ी आनेलो, अवं अक रोड़ी नर्म डालड़ी एन्हतां एक्‍की उच्‍चे पहाड़े पुड़ लेइलो। 23 मतलब इस्राएलेरे उच्‍चे पहाड़े पुड़ लेइलो; तैखन तै नर्म डालड़ी लेगतां अक शानदार गैइड़ बेनि गालो, ते तैस हैठ मतलब तैसेरी डैलड़ी केरि छावी मां किसमे-किसमेरां च़ुड़ोलू आले बनालां।✝17:23 भज. 92:12. 24 तैखन मैइदानेरे सारे बुट्टन पतो लग्गेलो कि मीं यहोवाए उच्‍चो बुट निकड़ो ते निकड़ो बुट उच्‍चो कियो; सब्ज़ बुट शुकेइतां छ़डो, ते शुकोरो बुट सब्ज़ बनाव। मीं यहोवा एन ज़ोवरूए। ते तैन्ने कियोरू भी आहे।"