1 अवं इन लिखने बालो यहोवारे क्रोधेरे लट्ठी सेइं दुख झ़ैलने बालो मैन्हु आईं;

2 तै मीं नेइतां लौई मां नईं, आंधरे मां च़लाते;

3 तैसेरो हथ पूरे दिहैड़ी मेरे खलाफ उठतो रहते।

4 तैनी मेरू मास ते चमड़ो गालोरोए,

ते मेरी हेड्डी ट्लोड़ोरिन;

5 तैनी मीं रोकनेरे लेई क़िलो बनाव,

ते अवं सखत दुख ते मुसीबती सेइं घेरोरोईं;

6 तैनी अवं बड़े च़िरेरे मेरे मरोरे लोकां केरो ज़ेरो आंधरेरे ठैरन मां बस्सनेरे लेई मजबूर कियो।

7 मेरे च़ेवरे पासन तैनी बाड़ बन्धोरोए कि अवं निस्सी न सेखी;

तैनी अवं भारी शंगली सेइं बन्धोरोईं।

8 अवं ज़ोरे-ज़ोरे सेइं फरियाद केरताईं,

फिरी भी तै मेरी प्राथना न शुने;

9 मेरी बत्तां तैनी घोड़ां केरि दिवारन सेइं रोकतां रेखोरिन,

मेरी बत्तां तैनी टैरी कियोरिन।

10 तै मेरे लेई ढोक लेइतां बिश्शोरे इछ़ ते ढोक लेइतां शेरेरो ज़ेरोए;

11 तैनी अवं मेरे बत्तन करां बिसराव,

ते अवं छ़िन्दो; तैनी अवं उज़ाड़ो।

12 परमेशरे अपनु धनुष खिचतां अवं अपने तीरे सेइं निशानो बनाव।

13 तैनी अपने तीरन सेइं मेरो दिल ज़खमी कियो;

14 सारे लोक मीं पुड़ हसतन ते पूरे दिहैड़ी मेरो गीतां ज़ोइतां मज़ाक बनातन।

15 तैनी अवं सखत दुखे सेइं भरो,

ते नागदौना पियेइतां रज़ानो।

16 तैनी मेरे दंत सिक्‍कन सेइं ट्लोड़े,

ते अवं मांज़नी सेइं ढक्‍को;

17 ते अवं मने मरां केढतां सुखे करां दूर कियो;

मीं सुख बिसरोरोए;

18 एल्हेरेलेइ मीं अपने आपे सेइं ज़ोवं, "मेरी शक्ति च़ली जेई,

ते मेरी उमीद ज़ै यहोवा पुड़ थी, तै ट्लुटी जेई।"

19 मेरो दुख ते दरबदर फिरनू, मेरू नागदौने

ते बिषेरू पीनू याद केर!

20 अवं तैन्ने पुड़ सोचतो रहताईं,

इस सेइं मेरो प्राण ढेली गाते।

21 पन अवं इन याद केरताईं, एल्हेरेलेइ मीं उमीदे:

22 असां मिटी न जे; ई यहोवारी महाकरुणारो फले, किजोकि तैसेरी दया कधे खतम न भोए।

23 रोज़ झ़ेझ़ां तैसेरी करुणा ते दया नंव्वी भोती रैतिन; तेरी सच़्च़ाई महाने।

24 मेरे मने ज़ोवं, "यहोवा मेरो हिस्सोए, इस वजाई सेइं अवं तैस मां उमीद रखेलो।"

25 ज़ैना यहोवारो इंतज़ार केरतन ते तैस कां गातन, तैन केरे लेई यहोवा भलोए।

26 यहोवा करां छुटकारेरी उमीद रेखतां च़ुपच़ाप रानू ठीके।

27 मड़देरे लेई जुवैनी मां सबरारू जुऊं छ़ूनू भलूए।

28 तै इन ज़ैनतां च़ुपच़ाप राए, कि परमेशरे तैस पुड़ इन जुऊं छ़डोरूए;

29 तै अपनु तुत्तर धूड़ी मां रख्खे, कुन पतो किछ उमीद भोए;

30 तै अपनि खाखोड़ी अपने बाने बालेरे पासे केरे, ते बदनामी झ़ैलतो राए।

31 किजोकि प्रभु असन हमेशा न शारेलो,

32 चाए तै दुख भी दे, फिरी भी अपने बड़े करुणारे वजाई सेइं तै दया भी केरते;

33 किजोकि तै मैन्हु अपने मने सेइं न त दबाते ते न दुख देते।

34 धेरतरे कैदन पव्वन हैठ ढ्लेन्च़नेरे लेई,

35 कोन्ची मैन्हेरू हक मारनू परमप्रधान परमेशरेरे सामने मारनू,

36 ते कोन्ची मैन्हेरो मुकदमो बिगाड़नो,

इना ट्लाई कम्मन यहोवा हेरी न सके।

37 अगर यहोवा हुक्म न दित्तोरो भोए, तैखन कौने

कि वचन ज़ोए ते तैन पूरू भोए?

38 आफत ते भलियाई, कुन दूईये परमप्रधान परमेशरेरे हुक्मे सेइं न भोए?

39 एल्हेरेलेइ ज़ींते मैन्हु किजो कुड़कुड़ातन?

ते मड़द अपने पापेरे सज़ाही किजो बुरू मन्ने?

40 अस चाल चलने ध्याने सेइं परखम,

ते यहोवारे पासे फिरम!

41 असां सुर्गे मां रानेबाले परमेशरेरे पासे मन लाम

ते हथ फैलाम ते ज़ोम:

42 "हे यहोवा असेईं त पाप ते बगावत कियोरीए,

ते तीं माफ़ न कियूं।

43 तेरो क्रोध असन पुड़े, तू असन पत्ती पेवरोस,

तीं तरस खाने बगैर मारे।

44 तीं अपनो आप बिदलारी सेइं घेरो कि तीं तगर प्राथना न पुज़्ज़ी सके।

45 तीं असां कौमां-कौमां केरे लोकां केरे दरमियाने मां कूड़ेरे ज़ेरे बनाए।✝

46 इश्शे सारे दुश्मनेईं असन पुड़ अपनु-अपनु आशी खोल्‍लू;

47 डर ते खड्डो, उज़ाड़ ते विनाश, असन पुड़ पेवरेन;

48 मेरी एछ़्छ़ी मेरे लोकां केरे कुइअरे विनाशेरे वजाई सेइं पैनेरी गड्डां बगाने लेगोरिन।

49 मेरी एछ़्छ़न सेइं लगातार ऐंखरू बगतां रालां,

50 ज़ैखन करां यहोवा सुर्गे मरां इश्शे पासे न तक्‍के;

51 अपने नेगरी मां रानेबाले सब जुवान कौन्शां केरो हाल हेरने पुड़ मेरो दुख बड़ो बधो।

52 ज़ैना बगैर वजां मेरे दुश्मन बनोरेन, तैनेईं बेरहमी सेइं च़ुड़ोलवेरो ज़ेरो मेरो शिकार कियोरोए;✝

53 तैनेईं अवं खड्डे मां छ़ेडतां मेरे ज़िन्दगरो अन्त केरनेरे लेई मीं पुड़ घोड़ शारे*;

54 मेरे क्रोड़ी पुड़ां पानी बगू, मीं ज़ोवं, ‘अवं हुनी नाश भोइ जेव।’

55 हे यहोवा, मीं डुग्घे गढे मरां तीं कां प्राथना की;

56 तीं मेरी शुनी कि ज़ै फरियाद अवं ज़ोरे सेइं केरताईं तैस तू अनशुनी न केर!

57 ज़ैखन मीं तीं कां प्राथना की, तैखन तीं मीं सेइं ज़ोवं, ‘न डर!’

58 हे यहोवा, तीं मेरो मुकदमो लेड़तां मेरे प्राण बच़ाए।

59 हे यहोवा, ज़ै अन्याय मीं पुड़ भोवरोए तै तीं लाहोरोए; तू मेरो न्याय केर।

60 ज़ै बदलो मेरे दुश्मनेईं मीं सेइं नेव, ते ज़ैना योजना मेरे खलाफ बनेई, तैना भी तीं लेवरिन।

61 हे यहोवा, ज़ैना योजना ते निन्दा तैना मेरे खलाफ केरतन, तैना भी तीं शुनोरिन।

62 मेरे दुश्मना केरि गल्‍लां, ते ज़ैन किछ भी तैना मेरे खलाफ लगातार सोचतन, तैन्न तू ज़ानतस।

63 तैन केरू उठनू बिशनू ध्याने सेइं हेर;

तैना मीं पुड़ मज़ाकेरू गीत ज़ोतन।

64 हे यहोवा, तू मेरे दुश्मना केरे कम्मां केरे मुताबिक तैन्न बदलो देलो।

65 तू तैन केरो मन सुन्न केरेलो; तेरी लानत तैन पुड़ भोल्ही।

66 हे यहोवा, तू अपने क्रोधे सेइं तैन निशैनी-निशैनी दुनियाई मरां नाश केरेलो।"