विलापगीत 2

यरूशलेम नगरे पुड़ परमेशरेरो क्रोध

1 यहोवा सिय्योनेरे लोक केन्च़रे सेइं अपने क्रोधेरे बिदलारी सेइं ढक्‍के!

तैनी इस्राएलेरी शोभा अम्बरे मरां धेरती पुड़ जो शारी;

ते क्रोधेरे दिहाड़े अपने पव्वां केरि चौवकी*2:1 पव्वां केरि चौवकी मतलब यरूशलेम नगरेरो भवन। याद न की।

2 यहोवा याकूबेरी सब बेसती दया न केरतां नाश की;

तैनी सेरकोइतां यहूदारी कुइअरे मज़बूत क़िले मित्ती मां मिलाए;

तैनी हाकिमन समेत रियासत अपवित्र ठहराई।

3 तैनी क्रोधे मां इस्राएलेरू शिंग*2:3 शिंग शक्ति ज़ीले करां कटोरूए;

तैनी दुश्मनेरे सामने तैन केरि मद्दत केरने करां अपनो देइनो हथ पत्रोवं कियोरोए;

तैनी च़ेवरे पासन भस्म केरती लप्परे ज़ेरे याकूब फुकोरोए।

4 तैनी दुश्मन बेनतां धनुष च़ाढ़ू, ते बैरी बेनतां देइनो हथ अग्रोवं केरतां खड़ोए;

ते ज़ेत्रे हेरने खूबसूरत थिये, तैना सारे तैनी मारे;

सिय्योनेरी कुइअरे*2:4 सिय्योनेरी कुइअरे यरूशलेम तेम्बु पुड़ तैनी अग्गरे ज़ेरो अपनो क्रोध भड़कव।

5 यहोवा दुश्मन बनो, तैनी इस्राएल निगलो;

तैसेरे सारे भवन तैनी मिटाए, ते तैसेरे मज़बूत क़िले तबाह किये;

ते यहूदारे कुइअरी लेरां बेड़ी बधेवरिन।

6 तैनी अपनो तेम्बु बागरे झोपड़ारो ज़ेरो अचानक बिछ़ोड़ो,

अपने मिलापेरे ठैरी तैनी नाश कियोरोए;

यहोवा सिय्योने मां ठहरावरे तिहार ते आरामेरी दिहैड़ी बिसरेवरिन।

ते अपने भड़कोरे क्रोधे सेइं राज़ो ते याजक दूईये रद कियोरेन।

7 यहोवा अपनि वेदी मने मरां कढी,

ते अपनि पवित्र ठार शारी,

तैसेरे भवनेरी दिवारां तैनी दुश्मना केरे कब्ज़े मां की;

यहोवारे भवने मां ज़ींतरे खुशी मां तैनेईं एरी शौर मच़ाई कि ज़ेन्च़रे ठहरावरे तिहारेरी दिहाड़ी भोए।

8 यहोवा सिय्योनेरे कुइअरे शहरपनाह ट्लोड़नेरे बारे मां थापेरू थियूं:

तैनी डोरी छ़डी ते अपनो हथ तैस नाश केरने करां न पत्रोवं कियो;

तैनी क़िले ते शहरपनाह दूईयन करां मातम कराव, तैना दूईये साथी बिछ़ोड़े जे।

9 सिय्योन नगरेरे फाटक ज़मीनी मां डुब्बे, तैसेरे अड्डे तैनी ट्लोड़तां नाश किये।

तैसेरे राज़े ते हाकिम गैर कौमन मां रानेरे वजाई सेइं बगैर कानूने भोइ जे,

तैसेरे नेबन यहोवारू दर्शन न मैल्हे।

10 सिय्योनेरी कुइअरे बुज़ुर्ग च़ुपच़ाप बिश्शोरे आन;

तैनेईं अपने दोग्गे पुड़ धूड़ उडारी ते टाट बन्धू;

यरूशलेमेरे कुइयेईं अपनि-अपनि क्रोड़ी ज़मीनी तगर झुकाई।

11 लेरां देइ-देइ मेरी एछ़्छ़ी केरू पानी शुक्‍की जेवं;

मेरी आंट्लां शुक्‍की गैतिन;

मेरे लोकां केरि कुइयां केरे नाशेरे वजाई सेइं मेरो कलैज़ो फेटी जेवरोए,

किजोकि बच्‍चे बल्के दुद्ध पीते बच्‍चे भी नगरेरे चौके मां बेहोश पेवरेन।

12 तैना लेरां देइतां एपनी अम्मा सेइं ज़ोतन,

अन्न ते दाछ़रो रस कोड़िए?

तैना नगरेरे चौके मां ज़खमी कियोरे मैन्हु केरे ज़ेरे बेहोश पेवरे

अपने प्राण अपने-अपने अम्मरे कुम्मे मां बल्हे-बल्हे देतन।

13 हे यरूशलेमेरे कुइये, अवं तीं सेइं कुन ज़ोईं?

अवं तेरू ऊपाम कैस सेइं देईं?

हे सिय्योनेरे कुइये, अवं कौ ज़ेरि चीज़ तेरी ज़ेरि बनेइतां तीं तसल्‍ली देईं?

किजोकि तेरो दुख सुमन्दरेरो ज़ेरो बड़ोए;

तीं कौन बझ़ेइं सकते?

14 तेरे नेबेईं दर्शनेरी गल्‍लां केरो दावो केरतां तीं सेइं फुज़ूल ते बेवकूफरी गल्‍लां ज़ोवरिन;

तैनेईं तेरो अधर्म बांदो न कियो, न त तू गुलाम न भोथो;

पन तैनेईं तीं सेइं बेकार ते झूठे वचन ज़ोए।

ज़ैना तेरे लेई मुल्खे मरां कढे गानेरी वजा भोए।

15 सब मुसाफर तीं पुड़ च़ैड़ी बज़ातन;

तैना यरूशलेमेरी कुइये पुड़ इन ज़ोइतां च़ैड़ी बज़ातन ते क्रोड़ी हिलातन,

कुन ई तैए नगरीए ज़ैस जो बड़ी खूबसूरत

ते सारे धेरतरे खुशरी वजा ज़ोते थिये?✝2:15 मत. 27:39.

16 तेरे सारे दुश्मनेईं तीं पुड़ आशी खोलोरूए,

तैना च़ैड़ी देतन ते दंत कटतन, तैना ज़ोतन, असेईं तै निगली!

ज़ैस दिहैड़ी अस बलगते थिये तै ई आए,

तै असन मैल्ही, असेईं तै लाई!

17 यहोवा ज़ैन किछ थापेरू थियूं तैन्ने कियोरू भी आए,

ज़ै वचन तै पुराने ज़माने करां ज़ोतो एवरोए तैए तैनी पूरो भी कियो;

तैनी दया केरने बगैर तू बिछ़ोड़ोरोस, तैनी दुश्मन तीं पुड़ खुश किये,

ते तेरे दुश्मना केरि शक्ति बधाई।

18 तैना प्रभुएरे पासे तने मने सेइं फरियाद केरतन!

हे सिय्योनेरी कुइयरी शहरपनाह,

अपना ऐंखरू रात दिहैड़ी दरियारे ज़ेरि बगाती रा!

थोड़ो ज़ेरो भी आराम न केर, न तेरी अछ़री पुतली चैन ने!

19 रातरे हर पहरे करां पेइले उठतां चिन्डां मार!

प्रभुएरे सामने अपने मनेरी गल्‍लां पैनेरी ज़ेरि उलटा!

तेरे बाल बच्‍चे ज़ैना हर एक्‍की सड़करे ड्लेखी ढ्लुखरे वजाई सेइं बेहोश पेने लगोरेन,

तैन केरे प्राणेरे खातर अपने हथ तैसेरे पासे खिलार।

20 हे यहोवा नज़र केर, ते ध्याने सेइं हेर कि तीं इना सब दुख कैस दित्तोरेन?

कुन कौन्शां अपने फल मतलब अपने कुम्मेरे बच्‍चन खान?

हे प्रभु कुन याजक ते नबी तेरे पवित्र ठैरी मां मारे गान?

21 सड़कन मां मट्ठां ते बुढे दूईये ज़मीनी पुड़ पेवरेन;

मेरी कुइयां ते जुवान लोक तलवारी सेइं मारे जेवरेन;

तीं क्रोध केरनेरे दिहाड़े तैना मारे;

तीं दया न केरतां तैना मारोरेन।

22 मेरे डरेरे वजा तीं ठहरावरे तिहारेरी भीड़रे ज़ेरे च़ेवरे पासना कुजेवरेन;

ते यहोवारे क्रोधेरे दिहाड़े न त कोई हिस्सो निस्सो ते न कोई बच़ोरो राहोरोए;

ज़ैना बच्‍चे मीं कुम्मे मां ट्लाए ते पालोरे थिये, मेरे दुश्मनेईं तैना मारे।