भजन संहिता 142

ज़ुलमे करां छुटनेरे लेई बिनती

दाऊदेरो मश्कील, ज़ैखन तै कुढी मां थियो: प्राथना

1 अवं यहोवा कां मद्दतरे लेई बिनती केरताईं,

अवं यहोवा कां बिनती केरताईं,

2 अवं अपने दुखेरी गल्‍लां तैस सेइं पूरी रोड़ेच़ारे ज़ोताईं,

ते अवं एपनी सैरी तकलीफां यहोवारे सामने रखेलो।

3 ज़ैखन मेरी आत्मा मेरे अन्तर परेशान भोइ राहोरी थी,

त तैखन तू मेरी हालती ज़ानतो थियो!

ते ज़ैस बत्तां अवं गानेबालो थियो, तैस्से बत्ती मां मेरे दुश्मनेईं मेरे लेई फंदे लेइतां छ़डोरे थिये।

4 मीं देइने पासे तक्‍कू, पन मीं कोई न तक्‍के,

मेरे लेई छ़पनेरी ठार, कोई नईं ज़ै मेरी जानरी फिक्र केरे।

5 हे यहोवा, मीं तीं कां बिनती की;

अवं ज़ोताईं, कि तू मेरी छ़पनेरी ठारस,

मेरे ज़ींते वक्ते तू मेरो हिस्सो आस।

6 मद्दतरे लेई मेरी चिन्डन पुड़ ध्यान केर,

किजोकि अवं बड़ो पस्त भोवरोईं,

ज़ैना मेरो पीछो केरने लगोरेन, तैन करां मीं बच़ा;

किजोकि तैना मीं करां जादे ताकतबरन।

7 मीं कैदखाने मरां बेइर कढ, ताके अवं तेरे नंव्वेरू शुक्र केरि!

धर्मी लोक मेरे आसे पासे जम्हां भोल्हे;

किजोकि तू मीं पुड़ एसान केरेलो।