1 तैन दिहाड़न मां एरू भोव कि, मैन्हु केरि बड़ी भीड़ यीशु कां फिरी अकोट्ठी भोइ। तैन कां किछ खाने जो न थियूं। तैखन यीशुए अपने चेले एप्पू कां कुजेइतां तैन सेइं ज़ोवं, 2 "मीं एन मैन्हु केरि भीड़ी पुड़ तरस एइते, किजोकि एना ट्लेइ दिहाड़ां केरे देंते मीं सेइं साथी आन, ते एन कां खाने जो किछ नईं राओरू। 3 अगर अवं एन ढ्लुखोरे घरे जो भेज़ी, त च़लते-च़लते बत्ती मां थेकतां रेइ गानेन, किजोकि एन मरां कोई-कोई दूरेरां भी आन।" 4 तैसेरे चेलेईं तैस जुवाब दित्तो, "इड़ी सुनसान ठैरी एन मैन्हन जो एत्री रोट्टी कोट्ठां आनम कि एन मैन्हु रेज़्ज़तां खान?" 5 तैखन यीशुए तैन पुछ़ू, "तुसन कां केत्री रोट्टी आन?" तैनेईं जुवाब दित्तो, "सत रोट्टी आन।" 6 तैखन यीशुए मैन्हु केरि भीड़रे पासे मुड़तां तैन जो हुक्म दित्तो कि, "ज़मीनी पुड़ बिश्शी गाथ।" तैखन तैनी तैन सत रोट्टी ट्लेइतां परमेशरेरू शुक्र केरतां ट्लोड़ी, ते अपने चेलन कां देते जेव कि तैना लोकन खाने जो देन। ते चेलेईं मैन्हन रोट्टी दित्ती। 7 तैन कां थोड़ी ज़ेरि निक्‍की मेछ़ली भी थी। यीशुए मेछ़ली केरे लेई भी परमेशरेरू शुक्र केरतां अपने चेलन सेइं ज़ोवं, "इना भी लोकन खाने जो देथ।" तेन्च़रां तैसेरे चेलेईं कियूं। 8 तैना सारे मैन्हु रोट्टी खेइतां रेज़्ज़ी जे। तैल्‍ला पत्ती, यीशुएरे चेलेईं मेछ़ली त कने रोट्टी केरे बच़्च़ोरे टुक्ड़न मरां सत टोकरे भेरतां सल्‍ले। 9 तैड़ी लगभग 4000 मड़द थिये। लोकन रोट्टी खुवानेरे पत्ती यीशुए मैन्हु भेज़ी दित्ते। 10 तैखन तै अकदम अपने चेलन सेइं साथी किश्ती मां च़ेढ़तां दलमनूता इलाके जो च़लो जेव।

11 फिरी किछ फरीसी लोक यीशु कां एइतां तैस सेइं बेंस केरने लग्गे। तैना तैस अज़मानेरे लेई तैस पुछ़ने लग्गे, "असन अम्बरेरां कोई निशान*8:11 यीशुए पेइले बड़े चमत्कार कियोरे थिये, पन फरीसी लोक तैस पुड़ विश्वास न कियो। तैना सिर्फ यीशुए गल्‍लन मां फसानेरे लेई एन्च़रां सवाल पुछ़ते थिये। हिरा।" 12 ज़ैखन यीशुए एन शुनू, त तैनी अक बड्डो ओशा छ़ेडतां ज़ोवं, "इस ज़मानेरे लोक मीं करां किजो निशान मगतन! अवं तुसन सेइं सच़ ज़ोताईं कि इस ज़मानेरे लोकन, यानी तुसन अवं कोई भी निशान न हिरेईं।" 13 तैल्‍ला पत्ती, यीशु तैन लोकन छ़ेडतां, फिरी किश्ती मां च़ढ़ो ते गलील समुन्दरेरे पार च़लो जेव।

14 ज़ैखन यीशुएरे चेले किश्ती मां च़ढ़े, त तैना एप्पू सेइं साथी रोट्टी नेनी बिसरी जे। किश्ती मां तैन कां अक्‍के रोट्टी थी। 15 ज़ैखन तैना समुन्दरे पार केरि राओरे थिये, त यीशुए तैन समझ़ावं कि, "खबरदार! फरीसी लोकां केरे खमीरेरे*8:15 इड़ी खमीरेरो मतलब गलत शिक्षा आए, पन यीशुएरे चेलेईं तैसेरी गल न समझ़ी। बारे मां ते कने हेरोदेस राज़ेरे खमीरेरे बारे मां होशियार रेइयथ।" 16 चेले यीशुएरी गल गलत सेमझ़तां एप्पू मांमेइं गलबात केरने लग्गे कि, "असन कां त रोट्टी नईं, एल्हेरेलेइ यीशुए एन्च़रां ज़ोवं।" 17 तैखन यीशुए तैन केरि गल ज़ैनतां, तैन सेइं ज़ोवं, "तुस एप्पू मांमेइं एन्च़रां किजो सोची राओरेथ कि असन कां रोट्टी नईं? कुन तुसेईं हेजू भी मेरी गल न समझ़ी ते कने न बुझ़ी? कुन तुश्शे मन बेसमझ़ भोइ जेवरेन? 18 कुन तुसन एछ़्छ़ी भोइतां भी न लेइहोए? ते कन भोइतां भी न शुनोए? कुन तुसन याद नईं? 19 ज़ताली 5000 मैन्हु केरे लेई पंच़ रोट्टी ट्लोड़तां दित्तोरी थी, त तुसेईं बादे मां बच़्च़ोरी रोट्टी केरे केत्रे टोकरे भेरतां सल्‍लोरे थिये?" तैनेईं तैस जुवाब दित्तो, "बारहे टोकरे।" 20 तैखन तैनी तैन पुछ़ू, "ज़ताली मीं 4000 मैन्हु केरे लेई सत रोट्टी ट्लोड़तां दित्तोरी थी, त तुसेईं रोट्टी केरे केत्रे टोकरे भेरतां सल्‍लोरे थिये?" तैनेईं तैस जुवाब दित्तो, "सत टोकरे।" 21 तैखन तैनी तैन पुछ़ू, "कुन तुसन हेजू भी समझ़ न आई?"

22 तैल्‍ला पत्ती, यीशु त तैसेरे चेले बैतसैदा नगरे मां आए। लोकेईं अक कानो मैन्हु यीशु कां आनो ते तैस कां मिन्नत की कि, "एस मैन्हु सेइं हथ लाथ ताके ऐह बेज़्झ़ोए।" 23 तैखन यीशुए तैस काने मैन्हेरो हथ ट्लेइतां ड्लोंव्वे करां बेइर नियो। तैखन तैनी तैस काने मैन्हेरी एछ़्छ़न पुड़ थुकतां, तैस पुड़ हथ रख्खे, ते तैस पुछ़ू, "कुन तू किछ लातस?" 24 तैखन तैनी मैन्हे उबरे तेकतां ज़ोवं, "हाँ, अवं मैन्हन हेरी सकताईं, तैना मीं च़लते बुट्टां केरे ज़ेरे लेइहोतन।" 25 तैखन यीशुए दूइयोवं हटे तैसेरी एछ़्छ़न पुड़ हथ रख्खे। तै कानो ध्याने सेइं लाने लगो। तैसेरी एछ़्छ़ी ठीक भोइ जेई, त तै सब किछ साफ-साफ हेरने लगो। 26 तैल्‍ला पत्ती, यीशुए तै मैन्हु एन ज़ोइतां घरे जो भेज़ो, "तू इस ड्लोंव्वे मां पव भी न रेखां (ते कने ई गल केन्ची सेइं न ज़ोइयां।)"

27 तैल्‍ला पत्ती, यीशु ते तैसेरे चेले बैतसैदा नगरे मरां निस्तां कैसरिया-फिलिप्पी नंव्वेरे नगरेरे ड्लाव्वन मां च़ेलि जे। बत्तां च़लते-च़लते यीशुए अपने चेलन पुछ़ू, "ज़ैखन लोक मेरे बारे मां गल्‍लां केरतन, त तैना मेरे बारे मां कुन ज़ोतन कि अवं कौन आईं?" 28 तैसेरे चेलेईं जुवाब दित्तो, "किछ ज़ोतन कि तू यूहन्ना आस, ज़ै बपतिस्मो देनेबालो थियो, पन किछ होरे मैन्हु ज़ोतन कि तू एलिय्याह आस, ज़ै नबी थियो, पन किछ होरे मैन्हु एन भी ज़ोतन कि तू परमेशरेरी गल्‍लां ज़ोनेबालन मरां अक मैन्हु आस।" 29 तैखन यीशुए अपने चेलन पुछ़ू, "पन तुस मेरे बारे मां कुन सोचतथ कि अवं कौन आईं?" पतरसे जुवाब दित्तो, "तू मसीह*8:29 मसीह: मतलब की, परमेशरेरे तरफां भेज़ोरो राज़ो। आस।" 30 त यीशुए तैन्न समझ़ावं कि, "मेरे बारे मां ई गल केन्ची सेइं न ज़ोइयथ।"

31 तैखन यीशु अपने चेलन शिक्षा देनो लगो कि, "मैन्हेरे मट्ठेरे लेई, यानी मेरे लेई एन ज़रूरी आहे कि मीं बड़े दुख झ़ैल्‍लनेन। यहूदी लोकां केरे बुज़ुर्गन, प्रधान याजकन, त कने शास्त्री लोकन केरां अवं निकम्मो समझ़ो गानोईं त मारो गानोईं। पन ट्लेइ दिहाड़ना पत्ती अवं फिरी ज़ींतो भोनोईं।" 32 यीशुए एना गल्‍लां तैन सेइं साफ-साफ ज़ोई। तैखन पतरस तैस अलग नेइतां डांटने लगो, "मसीह न मरे।" 33 पन यीशुए मुड़तां अपने बाकी चेलां केरे पासे तक्‍कू, ते पतरसे सेइं झ़िड़केइतां ज़ोवं, "हे शैतान, मीं करां दूर भो! (मतलब एन्च़रां न सोच! शैतान तीं करां एन्च़रां ज़ुवाते) मीं करां दूर भोइ गा। तू परमेशरेरी गल्‍लन पुड़ नईं, पन मैन्हु केरि गल्‍लन पुड़ मन लातस।"

34 तैखन यीशुए अपने चेले त कने मैन्हु केरि भीड़ एप्पू कां कुजेइतां सेब्भन सेइं ज़ोवं, "तुस अगर मेरे चेलो बन्नू चातथ, त तुस अपने आपेरो इन्कार*8:34 इन्कार केरनू: मतलब की, अपनि खुवैइश छ़डी देनी कने अपनि मर्ज़ी पुड़ नईं च़लनू। केरा त कने तुस अपनु क्रूस*8:34 क्रूस छ़ुइतां यीशु पत्ती च़लनू: मतलब कि, यीशुएरे पत्ती च़लनेरे वजाई सेइं दुख या मुसीबत झ़लनेरे लेई, त मरनेरे लेई भी तियार भोनू। छ़ुइतां मीं पत्ती च़ला। 35 किजोकि ज़ै कोई अपनि ज़िन्दगी बच़ानी चाते, त तै हमेशारी ज़िन्दगी गुवालो। पन ज़ै कोई मेरे वजाई सेइं त कने मेरे बारे मां खुशखबरी होरि लोकन शुनानेरी वजाई सेइं अपनि ज़िन्दगी गुवाते, यानी बलिदान केरते, त तै तैस बच़ालो, यानी हमेशारी ज़िन्दगी हासिल केरेलो। 36 मैन्हु अगर सारी दुनियाई हासिल केरे त अपनि हमेशारी ज़िन्दगी गुवाए, त तैस फिरी कुन फैइदो भोल्हो? 37 मैन्हु अगर अपनि हमेशारी ज़िन्दगी गुवालो, त गुवानेरे पत्ती तै कुन देइतां तैस वापस घिन्नी सकते? 38 अज़्ज़ेरे ज़मानेरे लोक परमेशरे करां दूरन त कने पापी आन। एस ज़माने मां, अगर कोई मैन्हु मीं करां त कने मेरी गल्‍लन करां शरमाते, त मैन्हेरू मट्ठू भी, यानी अवं भी तैस करां शरमालो। ज़ेइस अवं अपने बाजी केरि महिमाई सेइं साथी त कने पवित्र स्वर्गदूतन सेइं साथी वापस एज्जेलो, त तेइस अवं तैस करां भी शरमालो।"