नहूम 2

नीनवे नगरेरो विनाश

1 यहोवा ज़ोवं, हे नीनवे अक हमलो केरनेबालो तीं पुड़ च़ेढ़ी राहोरोए। अपने क़िले मज़बूत रख, बत तकतो खबरदार रा; ते अपनि कमर कस; ते जंगरे लेई तियारी केर।

2 यहोवा याकूबेरी सारी शान-ओ-शोकत इस्राएलेरी शानरी ज़ेरि फिरी बहाल केरेलो, किजोकि उज़ाड़ने बालेईं तैना उज़ाड़े ते दाछ़री डैलड़ी केरो नाश कियोरोए।

3 तैसेरे शूरबीर सिपैहेईं ढालां लाल रंगे सेइं रेंगी, ते तैसेरे जंग लड़ने बालेईं सिपैहेईं लाल रंगेरां लिगड़ां लेवरन। तियैरारे दिहाड़े लोंह अग्गरू ज़ेरू चमकते, ते भाले हिलाए गातन। 4 सड़कन मां रथ बड़े तेज़ी सेइं दौड़तां, ते चौकां केरे मैइदाने मां इरां उरां दौड़ेई राहोरेन; तैना मसालां केरे ज़ेरे लेइहोतन; तैना बिजलरे ज़ेरे दौड़तन। 5 तै अपने शूरबीरन*2:5 शूरबीरन सेनारे अधिकारी याद केरते; तैना च़लते-च़लते ठोकर खातन, तैना शहरपनाहरे पासे बड़े लूशी गातन, हिफाज़त केरनेबाली ढाल एपनी जगाई पुड़ रख्खोरीए। 6 दरियां केरे फाटक खुल्‍ली गातन, ते मेहल बिछ़ड़तां ढेर भोइ गातन। 7 नीनवे नगरेरे लोक गुलैमी मां च़ले गाले, ते तैन केरि नौकरैनी दुखेरे मारे छाती पिटतां मातम केरेली। 8 नीनवे नगरी ज़ैखन करां बनोरीए, तैखन करां तालाबेरी ज़ेरिए, फिरी भी अधिकारी नेश्शी गातन, ते "खड़े भो; खड़े भो" एन्च़रे ज़ोने सेइं कोई तुत्तर न फिराए। 9 चाँदी लुट्टा, सोन्नू लुट्टा, तैसेरे रखोरे बड़े धन, ते शान-ओ-शोकतरी मन पसंद चीज़ां केरू कोई सबूत नईं।

10 नीनवे नगरी खाली, सुनसान ते बेरान भोइ जेवरीए! हिम्मत ट्लुटी जेई, ते पव थरकतन। ते तैन सेभी केरे कमरी मां बड़ी तकलीफ भोइ, ते सेभी केरू तुत्तर ट्लेक्‍की जेवं! 11 शेरां केरि तै कुढ, ते जुवान शेरां केरि खानेरी ठार कोड़ि राई। ज़ैस मां शेर ते शेरनी बे फिक्र भोइतां अपने बच्‍चन समेत फिरतन। 12 शेर त अपने बच्‍चां केरे लेई बड़ो शिकार मारतो थियो, ते एपनी शेरनरे लेई शिकारेरू गल ट्लेइतां नेतो थियो, ते एपनी कुढन शिकारे सेइं भरतो थियो।

13 सेना केरो यहोवा परमेशर एन ज़ोते, अवं तेरे खलाफ आईं, ते तैसेरे ठारन भस्म केरतां तूए मां उडारेलो, ते तैसेरे जुवान शेरां केरे ज़ेरे जुवान तलवारी सेइं मारे गाले; अवं तेरे शिकारे धेरती पुड़ेरां नाश केरेलो, ते तेरे दूतां केरू ज़ोनू फिरी न शुनोलू।