1 एक्सां सोर नगरेरे राज़े हीरामे दाऊदे कां अपनो दूत भेज़े, ते तैसेरो मेहल बनानेरे लेई गैइड़ेरी लकड़ी ते बड़े चनाई केरनेबाले मिस्त्री ते ट्लखान भेज़े। 2 तैखन दाऊदे याकीन भोइ जेवं कि यहोवा तै इस्राएलेरो राज़ो बनेवरोए, किजोकि तैसेरे इस्राएली लोकां केरे खातर तैसेरू राज़ बड़ू बधोरू थियूं।

3 यरूशलेम नगरे मां दाऊदे होरे भी ड्लाह बनाए, ते तैन सेइं होरां भी मट्ठां-कुइयां भोआं। 4 तैसेरे ज़ैना बच्‍चे यरूशलेम नगरे मां भोए, तैन केरां नंव्वां इना आन: शम्मू, शोबाब, नातान, सुलैमान, 5 यिभार, एलीशू, एलपेलेत, 6 नोगह, नेपेग, यापी, एलीशामा, 7 बेल्यादा ते एलीपेलेत।

8 ज़ैखन पलिश्ती सेना शुनू कि पूरे इस्राएलेरो राज़ो बनानेरे लेई दाऊदेरू अभिषेक भोवरूए, तैखन सारे पलिश्ती सेना दाऊदे तोपतां ट्लानेरे लेई चढ़ाई की, पन दाऊद एन शुन्तां तैन केरो मुकाबलो केरनेरे लेई निस्सी जेव। 9 पलिश्ती सेना रपाईम नंव्वेरी वैदी मां आई ते तैड़ी हमलो कियो। 10 तैखन दाऊदे परमेशरे पुछ़ू, "कुन अवं पलिश्तन पुड़ हमलो केरि? कुन तू तैन मेरे हथ्थे मां केरेलो?" यहोवा तैस जुवाब दित्तो, "हमलो केर, किजोकि अवं तैन तेरे हथ्थे मां केरेलो।" 11 एल्हेरेलेइ ज़ैना इस्राएली बालपरासीम* नगरे मां आए, तैखन दाऊदे तैना तैट्ठी मारे; तैखन दाऊदे ज़ोवं, "परमेशर मेरे दुश्मन्न पुड़ पैनेरी गड्डां केरो ज़ेरो ट्लुटी जेव।" एस वजाई सेइं तैस ठारारू नवं बालपरासीम रख्खू जेवं। 12 तैड़ी पलिश्ती सिपैहेईं अपने देबतां केरि मूरती शैरी, ते दाऊदेरे हुक्मेरे मुताबिक तैना मूरती अग लेइतां फुक्‍की छ़ेडी।

13 किछ दिहाड़ना बाद फिरी होरी फेरे पलिश्ती सिपैहेईं तैस्से वैदी मां हमलो कियो। 14 तैखन दाऊदे अपने परमेशरे फिरी पुछ़ू, ते परमेशरे तैस सेइं ज़ोवं, "तू तैन पुड़ सामनेरां वार न केरां, बल्के तैट्ठां मुड़तां तूतां केरे बुट्टां केरे सामनेरां तैन पुड़ हमलो केर। 15 ते ज़ैखन तूतेरे बुट्टन मांमेइं च़लनेरी छ़ेड़ शुनोए, तैखन एन सेमझ़ां कि जंग केरनेरे लेई निस्सां, कि परमेशर पलिश्ती केरि सेना मारनेरे लेई तेरे अग्री-अग्री च़लोरोए।" 16 परमेशरेरे इस हुक्मेरे मुताबिक दाऊदे तैन्ने कियूं, ते इस्राएली सेना पलिश्ती सेना गिबोन नगरे करां लेइतां गेजेर नगरे तगर हाराई। 17 तैखन दाऊदेरी चर्चा सारे मुल्खन मां फैली जेई, ते यहोवा सैरी कौमां केरे दिलन मां तैसेरो डर भेरि दित्तो।