1 एक्सां पलिश्ती सेना इस्राएली सेना सेइं लड़ी; ते इस्राएली पलिश्ती सेनारे सामनेरां नश्शे, ते बड़े इस्राएली सिपाही गिलबो पहाड़े पुड़ मारे जे। 2 पन पलिश्ती शाऊल ते तैसेरे मट्ठन पत्ती लगोरे राए, ते पलिश्ती सेना शाऊलेरां मट्ठां योनातान, अबीनादाब, ते मल्कीशूअ मारां। 3 शाऊले सेइं बड़ी भारी जंग भोती राई ते तीर च़लाने बालेईं शाऊल बुरे तरीके सेइं ज़खमी कियो। 4 तैखन शाऊले अपने हथियार च़लानेबाले सेइं ज़ोवं, "अपनि तलवार खिचतां मीं मार, कोन्च एरू न भोए कि ज़ैन केरो खतनो नईं भोवरो तैना एइतां मेरो मज़ाक बनान।" पन तैसेरे हथियार च़लानेबाले डेरतां एन कम केरने करां इन्कार कियो। तैखन शाऊले अपनि तलवार खड़ी केरतां तैस पुड़ बिछ़ड़ी जेव। 5 एन हेरतां कि शाऊल मेरि जेवरोए तैसेरो हथियार च़लानेबालो भी एपनी तलवारी पुड़ बिछ़ड़तां मेरि जेव। 6 एन्च़रां सेइं शाऊल ते तैसेरां ट्लाईए मट्ठां, ते तैसेरे घरानेरे सारे मड़द एक्सां मेरि जे। 7 एन हेरतां कि इस्राएली नेश्शी जेवरेन, ते शाऊल ते तैसेरां मट्ठां मेरि जेआं, तैस वैदी मां रानेबाले सारे इस्राएली अपने-अपने नगर शैरतां नेश्शी जे। ते पलिश्ती एइतां तैन मां राने लगे।

8 जंगरे होरसां ज़ैखन पलिश्ती सेना मरोरे सेनारी कीमती चीज़ां लुटने एवरी थी, तैखन तैन शाऊल ते तैसेरां मट्ठां केरि लाशा गिलबो पहाड़े पुड़ मैल्ही। 9 तैखन तैनेईं शाऊलेरां लिगड़ां खोलतां तैसेरी क्रोड़ी ते हथियार ने ते पलिश्ती केरे मुल्खेरे सैरी जगान मैन्हु एल्हेरेलेइ भेज़े कि आम लोकन मां ई खुशरी खबर देते गान ते देबतां केरू शुक्र केरन। 10 तैखन पलिश्ती सिपैहेईं तैसेरे हथियार अपने मन्दरे मां रख्खे, ते तैसेरी क्रोड़ी दागोन देबतेरे मन्दरे मां टंगी। 11 ज़ैखन गिलाद प्रदेशेरे याबेश नगरेरे सारे लोकेईं एन शुनू कि पलिश्ती सेना शाऊले सेइं कुन-कुन कियूं। 12 तैखन सब बहादर सिपाही च़ले ते शाऊल ते तैसेरां मट्ठां केरि लाशां छ़ुइतां याबेश नगरे मां एन्हीं, ते तैना लाशा याबेशे मां एक्‍की बंज़ेरे बुट्टे हैठ देब्बी ते सत दिहाड़े अफ़सोस केरनेरे लेई बरत रख्खू।

13 एन्च़रां सेइं इस धोखेरे वजाई सेइं शाऊल मारो जेव किजोकि तै यहोवा सेइं वफादार न थियो राहोरो, किजोकि तैनी यहोवारो हुक्म न थियो मन्नोरो, इड़ी तगर कि तैनी भूत साधने बाले कौन्शी करां सलाह नेवरी थी। 14 तैनी यहोवाए करां न थियूं पुछ़ोरू, एल्हेरेलेइ यहोवा तै मैरतां राज़ यिशैरे मट्ठे दाऊदे दित्तू।