1 ज़ैखन दाऊद राज़ो अपने मेहले मां राने लगो, तैखन दाऊदे नातान नेबी सेइं ज़ोवं, "हेर, अवं त गैइड़ेरी लेकड़रे बनोरे मेहले मां रहताईं, पन यहोवारे करारेरो सन्दूख तेम्बु मां आहे।" 2 नातान नेबे दाऊद राज़े सेइं ज़ोवं, "ज़ैन किछ तेरे दिले मांए तैन्ने केर, किजोकि परमेशर तीं सेइं साथीए।"

3 तैस्से राती परमेशरे नातान नेबी सेइं ज़ोवं, "गेइतां मेरे दास दाऊदे सेइं ज़ो, 4 ‘यहोवा इन ज़ोते: मेरे लेई भवन तू न बनेई बटेलो ज़ैड़ी अवं रेईं। 5 किजोकि ज़ैस दिहाड़े मीं इस्राएली लोक मिस्र मुल्खे मरां आनोरे थिये, अज़ तगर अवं कोन्ची घरे मां नईं राहोरो। पन एक्‍की तेम्बु मरां होरि तेम्बु मां ते एक्‍की रानेरी ठारी पुड़ेरां होरि रानेरी ठारी पुड़ एज्जां गेइयां केरताईं। 6 ज़ैड़ी-ज़ैड़ी अवं सारे इस्राएली लोकां केरे मझ़ाटे एज्जां गेइयां केरताईं, कुन मीं इस्राएलेरे प्रधान ज़ैना मीं अपने लोकां केरि पुहाली केरनेरे लेई रखोरे थिये, कोन्ची सेइं एरी गल ज़ोई कि तुसेईं मेरे लेई गैइड़ेरी लेकड़रू घर कि न बनावं? 7 एल्हेरेलेइ, तू मेरे सेवक दाऊदे सेइं एन्च़रे ज़ो, कि सेनां केरो यहोवा इन ज़ोते, कि मीं तू गब्बां केरे गोठे ते गब्बन पत्ती-पत्ती फिरने करां इस इरादे सेइं कुजव, कि तू मेरे इस्राएली लोकां केरो प्रधान भोस। 8 ते ज़ैड़ी-ज़ैड़ी तू अव ते जेव, तैड़ी अवं तीं सेइं साथी राव, ते तेरे सारे दुश्मन तेरे सामनेरां नष्ट कियोरेन। हुनी अवं तेरू नवं बड्डे-बड्डे प्रधानां केरे नंव्वां केरू ज़ेरू महान केरेलो। 9 ते अवं अपने इस्राएली लोकां केरे लेई अक ठार च़ुनेलो, ते तैन मज़बूत केरेलो कि तैन अपने ठारी पुड़ बस्सोरे रान ते कधी इरां उरां घुमने बाले न भोन। ते बुरे लोक तैन नाश न केरि बटेले, ज़ेन्च़रे कि पेइले ज़ैखन करां मीं न्याय केरनेरे बाले अपने इस्राएली लोकन पुड़ च़ुनोरे थिये केरते थिये, 10 बल्के तैस मौके भी ज़ैखन अवं अपने इस्राएली लोकन पुड़ न्याय केरनेबालो ठहरातो थियो। ते अवं तेरे सारे दुश्मन्न दबेइ छ़डेलो। फिरी अवं तीं इन भी ज़ोताईं, कि यहोवा तेरे खानदाने मरां राज़ो बनातो रालो। 11 ज़ैखन तेरी उमर पूरी भोइ गाली ते तीं भी अपने दादे-पड़दादां केरू ज़ेरू मरनू पेलू, तैखन अवं तेरे मट्ठन मरां अक राज़ो बनेइतां तैसेरू राज़ कायम केरेलो।✝ 12 मेरे लेई अक भवन तैए बनालो, ते अवं तैसेरो तखत हमेशा मज़बूत केरेलो। 13 ते अवं तैसेरो बाजी भोल्हो ते तैन मेरू मट्ठू भोल्हु। ते ज़ेन्च़रे मीं अपनि दया तैस पुड़ेरां ज़ै तीं करां पेइलो राज़ो थियो हटाई, तेन्च़रे अवं तैस पुड़ेरां न हटेइलो,✝ 14 बल्के अवं तैस अपने भवन ते अपने राज़े मां हमेशारे लेई कायम केरेलो ते तैसेरो तखत हमेशा अटल रालो।’" 15 इन सब गल्‍लां ते एस दर्शनेरे मुताबिक नातान नेबे दाऊदे सेइं ज़ोवं।

16 तैखन दाऊद राज़ो यहोवारे तेम्बु मां अन्तर गेइतां करारेरे सन्दूखेरे सामने बिशतां प्राथना केरने लगो, "हे यहोवा परमेशर! अवं कुन आईं? ते मेरो घरानेरो कुने? कि तीं अवं इड़ी तगर पुज़ोरोईं? 17 हे परमेशर! ई तेरी नज़री मां निकड़ी ज़ेरि गल भोइ, किजोकि तीं अपने दासेरे घरानेरे बारे मां एजने बाले बड़े दिहाड़ां केरि चर्चा कियोरीए, ते हे यहोवा परमेशर! तीं मीं सेइं एरहो बर्ताव कियोरोए कि ज़ेरो अवं खास मैन्हु आईं। 18 ज़ै आदर तीं अपने दास मीं पुड़ हिराई, तैसेरे बारे मां दाऊद तीं सेइं होरू कुन ज़ोई सकते? तू त अपने दासे ज़ानतस। 19 हे यहोवा! तीं अपने दासेरे खातर ते अपने मनेरे मुताबिक इन बड्डू कम कियोरूए, कि तेरो दास तैस सेमझ़ी सखे। 20 हे यहोवा! ज़ैन किछ असेईं तेरे बारे अपने कन्नेईं सेइं शुनेरूए, तैसेरे मुताबिक तेरे बराबर कोई नईं, ते न तेरे अलावा होरो कोई परमेशरे। 21 फिरी तेरे इस्राएली लोकां केरो ज़ेरो भी कौने? तै त सैरी धेरती पुड़ अक्‍के कौमे, तैना परमेशरे गेइतां अपने खास लोक बन्नेरे लेई छुटाए, एल्हेरेलेइ कि तू बड़ां डरानेबालां कम्मां केरतां अपनु नवं महान केरस, ते अपने लोकां केरे सामने ज़ैना तीं मिस्र मुल्खे मरां छुटेइतां आनोरे थिये, कौमां-कौमां केरे लोक कढे। 22 किजोकि तीं अपने इस्राएली लोक हमेशारे लेई अपने लोक भोनेरे लेई च़ुने, ते हे यहोवा! तू एप्पु भी तैन केरो परमेशर बनो। 23 एल्हेरेलेइ, हुनी हे यहोवा, तीं ज़ै वाधो अपने दासेरे घरानेरे बारे मां कियोरोए, तै हमेशा अटल राए, ते अपने वाधेरे मुताबिक केर। 24 ते तेरू नवं हमेशा अटल राए, ते एन ज़ोइतां तेरी तारीफ़ हमेशा भोती राए, कि सेनां केरो यहोवा इस्राएलेरो परमेशरे, बल्के तै इस्राएलेरे लेई परमेशरे, ते तेरे दास दाऊदेरो घरानो तेरे सामने अटल राए। 25 किजोकि हे मेरे परमेशर, तीं एन ज़ोइतां अपने दासे पुड़ बांदू कियूं कि अवं तेरू घरानो बनेइतां रखेलो, एस वजाई सेइं तेरे दासे तेरे सामने प्राथना केरनेरी हिम्मत भोवरीए। 26 ते हुनी हे यहोवा तूए परमेशरस, ते तीं अपने दासे सेइं ई भलियाई केरनेरो वाधो कियोरोए। 27 ते हुनी तीं खुशी भोइतां, अपने दास मेरे घराने पुड़ ई बरकत दित्तोरीए, कि तै तीं कां हमेशा बनोरो राए, किजोकि हे यहोवा तीं बरकत दित्तोरीए, एल्हेरेलेइ तै हमेशा बरकत देतो रालो।"