1 इस्राएलेरू बड्डू मट्ठू त रूबेन थियूं, पन तैनी अपने बाजी केरि रखैली सेइं कुकर्म कियो, तैस वजाई सेइं बड्डे भोनेरू हक इस्राएले यूसुफेरे मट्ठन दित्तोरू थियूं। एल्हेरेलेइ वंशावली बड्डे भोनेरे मुताबिक न भोइ। 2 यहूदा अपने ढ्लान करां ताकतबर भोइ जेव, ते प्रधान तैसेरे खानदाने मरां भोव, पन बड्डे भोनेरू हक यूसुफेरू थियूं। 3 इस्राएलेरे बड्डे मट्ठे रूबेनेरां मट्ठां इनां थियां: हनोक, पल्‍लू, हेस्रोन ते कर्मी। 4 योएलेरू मट्ठू शमायाह, शमायाहेरू गोग, गोगेरू शिमी, 5 शिमीएरू मीका, मीकारू रायाह, रायाहेरू बाल, 6 बालेरू बएराह, ते तै रूबेनी लोकां केरो प्रधान थियो। पन अश्शूरेरे राज़े तिग्लत्पिलेसेरे तै गुलाम बनेइतां अपने मुल्खे जो नेव। 7 ते तैसेरे ढ्लां केरि खानदानी लिखनेरे मौके तैना अपने-अपने कुलां केरे मुताबिक इना भोए, प्रधान त यीएल थियो, फिरी जकर्याह, 8 ते अजाजेरू मट्ठू बेला ज़ैन शेमारू पोट्लड़ू ते योएलेरू पड़पोट्लड़ू थियूं, तैना अरोएर नगरे मां नबो पहाड़े ते बालमोन नगरे तगर रहते थिये। 9 ते पूर्वेरे पासे तै तैस सुनसान ठैरारे बन्ने तगर राव ज़ै फरात दरिया तगर पुज़ते, किजोकि तैन केरे जानबर गिलाद प्रदेशे मां बेधी जेवरे थिये। 10 ज़ैस वक्ते शाऊल राज़ो थियो तैस वक्त रूबेन गोट्लेरे लोकेईं हग्री लोकन सेइं जंग की, ते तैनेईं हग्री हाराए; तैखन तैना गिलाद प्रदेशेरे पूर्वेरे पासे अपने डेरन मां राने लगे।

11 गादी लोक तैन केरे नेड़े सल्का नगरे तगर बाशान प्रदेशे मां रहते थिये। 12 प्रधान त योएल थियो, ते दूइयोवं शापाम, फिरी यानै, ते शापात, इनां बाशाने मां रहते थिये। 13 ते तैन केरे सत ढ्ला अपने-अपने पूर्वजां केरे घराना केरे मुताबिक मीकाएल, मशुल्‍लाम, शेबा, योरै, याकान, जीअ, ते एबेर थिये। 14 इन अबीहैलेरू खानदान थियूं। अबीहैल हूरीएरू मट्ठू थियूं, हूरी योराहेरू मट्ठू, योराह गिलादेरू मट्ठू, गिलाद मीकाएलेरू मट्ठू, मीकाएल यशीशैरू मट्ठू, यशीशै यहदोएरू मट्ठू, यहदो बूजेरू मट्ठू थियूं। 15 एन केरे पूर्वजां केरे घरानेरो प्रधान अब्दीएलेरू मट्ठू, ते गूनी एरू पोट्लड़ू अही थियूं। 16 एना गादी लोक बाशाने मां, गिलाद प्रदेश ते तैसेरे ड्लाव्वन मां, ते शारोनेरे सारे चरागान मां तैसेरे होरि पासे तगर रहते थिये। 17 ई सारी वंशावली ज़ैस वक्ते लिखी जेई, तैस वक्ते यहूदा प्रदेशे पुड़ योताम राज़ो राज़ केरतो थियो ते इस्राएल मुल्खे पुड़ यारोबाम राज़ो राज़ केरतो थियो। 18 रूबेनी ते गादी ते मनश्शेरे अधे गोट्लेरे जंग लड़नेबाले सिपाही ज़ैना ढाल बन्धने, तलवार च़लाने, ते धनुषे सेइं तीर मारनेरे काबल ते ज़ैनेईं जंग केरनी शिखोरी थी, तैना 44760 थिये, ज़ैना जंगी मां गांनेरे काबल थिये। 19 तैनेईं हग्री लोकन सेइं ते यतूर, नापीश ते नोदाब नगरां केरे लोकन सेइं जंग कियोरी थी। 20 ते तैन केरे खलाफ एन मद्दत मैल्ही, ते हग्री तैन सेभन समेत ज़ैना तैस सेइं थिये, तैन केरे हथ्थे मां दित्ते जे, किजोकि जंगी मां तैनेईं परमेशरे करां मद्दतरे लेई बिनती कियोरी थी, ते तैनी तैन केरि बिनती एल्हेरेलेइ शुनी, कि तैनेईं तैस पुड़ भरोसो कियो। 21 ते इस्राएली लोकेईं हग्री लोकां केरे इनां जानबर भी ने, ऊँट त 50000, गब्बां 250000, गधे 2000, ते लोक 100000 गुलाम बनेइतां नीए। 22 पन बड़े हग्री दुश्मन मरोरे थिये किजोकि तै लड़ाई परमेशरेरी तरफां भोवरी थी। ते रूबेन, गाद ते मनश्शेरे अधे गोट्लां केरे लोक तैन केरि जगाई मां गुलैमरे वक्ते तगर बस्सोरे राए।

23 फिरी मनश्शेरे अधे गोट्लेरे लोक तैस मुल्खे मां बेस्सी जे, ते तैना बाशाने करां लेइतां बालहेर्मोन ते सनीर ते हेर्मोन पहाड़े तगर फैली जे। 24 ते तैन केरे पूर्वजां केरे घराना केरे प्रधान इनां थिये: एपेर, यिशी, एलीएल, अज्रीएल, यिर्मयाह, होदव्याह ते यहदीएल, इनां बड़े बहादर जंग लड़नेबाले ते नामी ते अपने पूर्वजां केरे घरानेरे प्रधान थिये। 25 पन तैना अपने पूर्वजां केरे घराना केरे परमेशरे सेइं वफादार न राए, ते तैस मुल्खेरे कनानी लोक ज़ैना परमेशरे तैन केरे सामने नाश कियोरे थिये, तैन केरे देबतन पत्ती बदचलन कौन्शरे ज़ेरे च़लने लगे। 26 एल्हेरेलेइ इस्राएलेरे परमेशरे अश्शूरेरे राज़ो पूल ते अश्शूरेरे राज़े तिग्लत्पिलेसेरेरो मन भड़कव, ते तैनेईं रूबेनी, गादी ते मनश्शेरे अधे गोट्लेरे लोक गुलाम बनेइतां हलह नगर, हाबोर दरिया ते हारा नगर ते गोजान दरियारे बन्ने पुड़ पुज़ाए। ते तैना अज़ तगर तैड़ी रहतन।