1 इस्राएलेरां इना 12 मट्ठां थियां; रूबेन, शिमोन, लेवी, यहूदा, इस्साकार, जबूलून, 2 दान, यूसुफ, बिन्यामीन, नप्ताली, गाद ते आशेर।

3 यहूदेरां मट्ठां, एर, ओनान ते शेला, तैसेरां इना ट्लाई मट्ठां, शूआ नंव्वेरे एक्‍की कनानी कौन्शरे कुइये सेइं पैदा भोआं। ते यहूदारू मट्ठू एर, यहोवारी नज़री मां बुरू थियूं, इस वजाई सेइं यहोवा तैन मारू। 4 ते यहूदारी नुश तामार थी ते यहूदारां तामारी सेइं दूई मट्ठां पेरेस ते जेरह पैदा भोआं। ते यहूदारां कुल पंच़ मट्ठां थियां।

5 पेरेसेरां मट्ठां हेस्रोन ते हामूल थियां। 6 ते जेरहेरां मट्ठां: जिम्री, एतान, हेमान, कलकोल ते दारा सारे मिलतां पंच़ मट्ठां भोआं। 7 फिरी कर्मी* एरू मट्ठू आकार थियूं, ज़ै अर्पण कियोरी चीज़ां केरे बारे मां धोखेबाज़ी केरतां इस्राएली लोकन दुख देनेबालो भोव। 8 ते एतानेरू मट्ठू अजर्याह थियूं। 9 हेस्रोनेरां ज़ैना मट्ठां भोआं तैना इनां थियां, यरहमेल, राम, ते कलूबै।✝ 10 ते रामेरू मट्ठू अम्मीनादाब ते अम्मीनादाबेरू मट्ठू नहशोन थियूं, नहशोन यहूदा खानदानेरो प्रधान बनो। 11 ते नहशोनेरू मट्ठू सल्मा ते सल्मारू मट्ठू बोअज थियूं। 12 बोअजेरू मट्ठू ओबेद ते ओबेदेरू मट्ठू यिशै थियूं।✝ 13 ते यिशैरू बड्डू मट्ठू एलीआब ते दूइयोवं अबीनादाब ट्लेइयोवं शिमा, 14 च़ेवरोवं नतनेल ते पंच़ोंव रद्दैं। 15 शेइयोवं ओसेम ते सत्तोवं मट्ठू दाऊद थियूं।✝ 16 एन केरि बेइनां सरूयाह ते अबीगैल थी। ते सरूयाहेरां ट्लाई मट्ठां इनां थियां: अबीशै, योआब ते असाहेल। 17 ते अबीगैलरू मट्ठू अमासा थियूं, ते अमासारो बाजी इश्माएली येतेर थियो।

18 हेस्रोनेरे मट्ठे कालेबेरी अजूबा ते यरीओती नंव्वेरी कौन्शन सेइं मट्ठां भोआं। तैना मट्ठां इनां आन: येशेर, शोबाब ते अर्दोन। 19 ज़ैखन अजूबा मेरि जेई, तैखन कालेबे एप्राता सेइं ड्लाह बनाव, ते ज़ैस सेइं हूर नंव्वेरू मट्ठू भोवं। 20 ते हूरेरू मट्ठू ऊरी ते ऊरी एरू मट्ठू बसलेल थियूं।

21 एसेरां बाद हेस्रोने 60 सालां केरि उमरी मां माकीरेरे कुइये सेइं ड्लाह बनाव। हेस्रोन तैस कां जेव ते तैसां सगूबे ज़र्म दित्तू। माकीरे गिलाद प्रदेश बसावरू थियूं। 22 ते सगूबेरू मट्ठू याईर थियूं, ज़ैस कां गिलाद प्रदेशे मां 23 नगर थिये। 23 पन गशूर ते अराम नगरां केरि सेना याईरेरी बेस्तन ते ड्लाव्वन समेत कनात ते आसे पासेरे नगरन पुड़ कब्ज़ो कियो। इना सब नगर मिलेइतां 60 थिये। इना सब गिलादेरे बाजी माकीरेरे खानदाने मरां थिये। 24 ते ज़ैखन हेस्रोन कालेब एप्राता मां मेरि जेव, तैखन तैसेरी अबिय्याह नंव्वेरी कौन्शरो अशहूर पैदा भोव ज़ैनी तकोआ नगर बसाव।

25 हेस्रोनेरे बड्डे मट्ठे यरहमेलेरां इनां मट्ठां भोआं: राम ज़ैन तैसेरू बड्डू मट्ठू थियूं, ते बूना, ओरेन, ओसेम ते अहिय्याह। 26 ते यरहमेलेरी अक होरि कौन्श थी, ज़ैसारू नवं अतारा थियूं। तै ओनामेरी अम्मा थी। 27 ते यरहमेलेरे बड्डे मट्ठे रामेरां मट्ठां मास, यामीन ते एकेर थियां। 28 ते ओनामेरां मट्ठां शम्मै ते यादा थियां। ते शम्मैरां मट्ठां नादाब ते अबीशूर थियां। 29 ते अबीशूरेरी कौन्शरू नवं अबीहैल थियूं, ते तैस सेइं अहबान ते मोलीद पैदा भोए। 30 ते नादाबेरां मट्ठां सेलेद ते अप्पैम थियां। सेलेद त बेऔलाद मेरि जेव ते अप्पैमेरू मट्ठू यिशी थियूं। 31 ते यिशी एरू मट्ठू शेशान ते शेशानेरू मट्ठू अहलै थियूं। 32 फिरी शम्मैरे ढ्ला यादारां मट्ठां येतेर ते योनातान थियां। येतेर त बेऔलाद मेरि जेव। 33 योनातानेरां मट्ठां पेलेत ते जाजा थियां। यरहमेलेरे खानदाने मरां ऐनां भोए। 34 शेशाने त मट्ठां न भोआं, सिर्फ कुइयां भोइ। शेशाने कां यर्हा नंव्वेरो अक मिस्री गुलाम थियो। 35 ते शेशाने अपने कुइयरो ड्लाह तैस सेइं बनाव, ते तैस सेइं अत्तै नंव्वेरू मट्ठू भोवं। 36 ते अत्तैरू मट्ठू नातान ते नातानेरू जाबाद, 37 जाबादेरू एपलाल, एपलालेरू ओबेद, 38 ते ओबेदेरू येहू, येहूएरू अजर्याह, 39 अजर्याहेरू हेलेस, हेलेसेरू एलासा, 40 एलासारू सिस्मै, सिस्मैरू शल्‍लूम, 41 शल्‍लूमेरू यकम्याह ते यकम्याहेरू मट्ठू एलीशामा थियूं।

42 फिरी यरहमेलेरे ढ्ला कालेबेरां इनां मट्ठां भोआं, तैसेरू बड्डू मट्ठू मेशा ज़ै जीपेरो बाजी भोव। ते मारेशारू मट्ठू हेब्रोन भी तैसेरे खानदाने मरां भोवं। 43 ते हेब्रोनेरां मट्ठां कोरह, तप्पूह, रेकेम ते शेमा थियां। 44 ते शेमारू मट्ठू रहम थियूं। योर्कामेरो बाजी रहम थियो। ते रेकेमेरू मट्ठू शम्मै थियूं। 45 ते शम्मैरू मट्ठू माओन थियूं। ते माओने बेतसूर नगर बसाव। 46 फिरी एपा ज़ै कालेबेरी रखैल थी, तैस सेइं हारान, मोसा ते गाजेज पैदा भोए। ते हाराने अक मट्ठू भोवं तैनी अपने ढ्लाएरे नंव्वे पुड़ तैसेरू नवं गाजेज रख्खू। 47 फिरी याहदैरां मट्ठां रेगेम, योताम, गेशान, पेलेत, एपा ते शाप थियां। 48 ते माका ज़ै कालेबेरी रखैल थी, तैसेरां मट्ठां शेबेर ते तिर्हाना थियां। 49 फिरी तैस शाप ते शवा नंव्वेरां दूई होरां मट्ठां भोआं, शाप, ज़ैनी मदमन्ना नगर बसाव, ते शवा, ज़ैनी मकबेना ते गिबा नगरां बसां। ते कालेबेरी कुई अकसा थी। 50 कालेबेरे खानदाने मां इनां भोए। एप्रातारे बड्डे मट्ठे हूरेरे मट्ठे शोबाले किर्यत्यारीम नगर बसाव, 51 सल्मा बैतलहम नगर बसाव ते हारेपे बेतगादेर नगर बसाव। 52 ते किर्यत्यारीम नगर बसाने बाले शोबालेरे खानदाने मां हारोए अध्धे मनुहोत नगरेरे रानेबाले, 53 ते किर्यत्यारीमेरे कुले मरां येतेरी, पूती, शूमाती ते मिश्राई ते एन सेइं सोराई ते एश्ताओली निस्से। 54 बैतलहम नगर बसाने बाले सल्मारे खानदाने मां नतोपाई, अत्रोतबेत्योआब ते अधे मानहती, सोरी। 55 याबेस नगरेरे मां रानेबाले लिखनेबालां केरे कुले मरां तिराती, शिमाती ते सूकाती भोए। इनां रेकाबेरे घरानेरे पूर्वज हम्मतेरे खानदानेरे केनी कुलेरे लोकन।