1 एक्सां नाओमी एपनी नुश्शी सेइं ज़ोने लगी, "हे मेरी कुइये, कुन अवं तेरे लेई मुन्शेरो सहारो न तोप्पी कि टब्बरेरे रूपे मां तेरू भलू भोए? 2 हुनी ज़ेसेरी नौकरेनन कां तू थी, कुन तै बोअज इश्शो भियाल नईं? तै त अज़ राती खलाड़ी मां जौ बातालो। 3 तू निहान देइतां दोग्गे तेल ला, रोड़ां लिगड़ां लेइतां खलाड़ी मां गा। पन ज़ांतगर तै मैन्हु खेइ पीतां वापस न एज्जे तांतगर तू तैस कां बांदी न भोइयां। 4 ते ज़ैखन तै झ़ुल्‍ली गाए, तैखन तू तैसेरे झ़ुल्‍लनेरी ठारी तकती रेइयां; फिरी नेड़े गेइतां तैसेरे पव्वां केरे पासे छ़ूँ खड़ू केरतां लेटी गेइयां;* फिरी तैए तीं सेइं एप्पु ज़ोलो कि तीं कुन कियोरू लोड़ते।" 5 रूत एपनी शिखी सेइं ज़ोने लगी, "ज़ैन किछ तू ज़ोचां तैन सब अवं केरेली।" 6 तैखन तै खलाड़ी मांजो च़ली जेई, ते ज़ेन्च़रे तैसेरी शिखां ज़ोवरू थियूं तैसां तेन्च़रे कियूं। 7 ज़ैखन बोअज खेइ पीतां अव, ते तैसेरो मन खुशी भोव, तैखन तै अन्नेरे एक्‍की ढेरे कां गेइतां झ़ुल्‍ली जेव। तैखन रूत च़ुपच़ारे जेई, ते तैसेरे पव्वां केरे पासे छ़ूँ खड़ू केरतां झ़ुल्‍ली जेई। 8 एध्धी राती बोअज उठतां डेरि जेव, ते अग्रोवं लिकतां तकने लगो ते कुन हेरते, कि तैसेरे पव्वां केरे पासे कोई कौन्श झ़ुल्‍लोरीए। 9 तैनी पुछ़ू, "तू कौनस?" तैखन रूत ज़ोने लगी, "अवं त तेरी दासी रूत आईं; महरबानी केरतां मीं सेइं ड्लाह बना, ते मेरी देखभाल केर किजोकि तू ज़मीनी छुटानेबालो इश्शे नेड़ेरो भियालस।" 10 तैनी ज़ोवं, "हे कुइये, यहोवारे तरफां तीं पुड़ बरकत भोए; किजोकि तू पेइले करां जादे अपने शिखरे लेई वफादार राहोरिस, किजोकि तू ड्लाहेरे लेई कोन्ची अमीर, गरीब, या कोन्ची जुवाने पत्ती नईं जेवरी। 11 एल्हेरेलेइ हुनी, हे कुइये, डर न, ज़ैन किछ तू ज़ोली अवं तीं सेइं तैन्ने केरेलो; किजोकि मेरे नगरेरे सारे लोक ज़ानतन; कि तू भली कौन्शस। 12 ते सच़ त आहे कि अवं छुटानेबालो तुश्शे भियाल आईं, पन अक होरो भी आहे ज़ैस मीं करां पेइले छुटानेरू हक्‍के। 13 ते पूरी राती इड़ी रुक, ते झ़ेझ़ां अवं तेरे बारे मां गल केरेलो, अगर तै छुटानेबालो एन कम केरनू चाहे; त रोड़ू, तैए एन केरे; पन अगर तै छुटानेबालो एन कम केरनेरे लेई राज़ी न भोए, त यहोवारी ज़िन्दगरी कसम अव्वें एन कम केरेलो। झ़ेझ़ां तगर झ़ुल्‍लोरी रा।"

14 तैखन रूत तैसेरे पव्वां केरे पासे झ़ेझ़ां तगर झ़ुल्‍लोरी राई, ते तै तैस करां पेइली उठी कि होरो कोई तैस पिशैनी न सके; ते बोअज ज़ोने लगो, "कोन्ची पतो न लोड़े लग्गोरो कि खलाड़ी मां कोई कौन्श एवरी थी।" 15 तैखन बोअजे तैस सेइं ज़ोवं, "ज़ै च़ादर तीं पलेटतां छ़ुंहें घिन्नोरी थी तैस ट्लेइतां खिलार।" ते ज़ैखन तैसां तै च़ादर ट्लाई त तैखन तैनी लगभग 25 किल्‍लो जौ नैपतां तैस छ़ुवेइतां दित्ते; फिरी तै घिन्तां नगरे मां अपने घर च़ेलि जेई। 16 ज़ैखन रूत एपनी शिखी कां अई त तैसां पुछ़ू, "हे कुइये, कुन भोवं?" तैखन तैसां ज़ैन किछ तैनी मड़दे तैस सेइं कियोरू थियूं तैसां तैस सारो बिस्तार शुनाव। 17 फिरी रूत ज़ोने लगी, "इना लगभग 25 किल्‍लो जौ तैनी मीं एन ज़ोइतां दित्तोरेन, कि एपनी शिखी कां खाली हथेइं न गेइयां।" 18 फिरी नाओमी ज़ोने लगी, "हे मेरी कुइये, ज़ांतगर तू एन न ज़ानस कि एस गल्‍लरो कुन नितीजो निसेलो, तांतगर बिशोरी रा, किजोकि अज़ तैस मैन्हु एन कम पूरू केरने बगैर चैन न एज्जेली।"