1 ज़ैन दिहाड़न मां न्यायी लोक इस्राएली लोकन पुड़ राज़ केरते थिये, तैन दिहाड़न मां इस्राएल मुल्खे मां काल पेव, तैखन यहूदा प्रदेशेरे बैतलहम नगरेरो अक मैन्हु अपनि कौन्श ते दूईये मट्ठन साथी नेइतां मोआबेरे मुल्खे मां परदेशी बेनतां रानेरे लेई च़लो जेव।* 2 तैस मैन्हेरू नवं एलीमेलेक थियूं, ते तैसेरी कौन्शरू नवं नाओमी थियूं, ते तैसारे एक्‍की मट्ठेरू नवं महलोन ते होरि मट्ठेरू नवं किल्योन थियूं; एना एप्रात गोट्ले ते यहूदारे बैतलहम नगरेरे रानेबाले थिये। तैना मोआबेरे मुल्खे मां एइतां तैड़ी राने लगे। 3 किछ वक्तेरां बाद नाओमीरो मुन्श एलीमेलेक मेरि जेव, ते नाओमी ते तैसारां दूईये मट्ठां रेई जेआं। 4 किछ वक्तेरां बाद तैसेरे मट्ठेईं एक्‍की-एक्‍की मोआबी कौन्शी सेइं ड्लाह बनाव; एकरू नवं ओर्पा ते होरारू नवं रूत थियूं। फिरी तैना तैड़ी लगभग दश साल रां। 5 तैसेरां बाद महलोन ते किल्योन दूईये मेरि जे, तैखन नाओमी अपने दूईये मट्ठन ते मुन्शे बगैर रेई जेई।

6 एक्सां ज़ैखन तैसां मोआबेरे मुल्खे मां एन शुनू, कि यहोवाए अपनि प्रजारे लोकां केरि खबर कियोरीए, ते इस्राएल मुल्खे मां खानेरे लेई अन्न दित्तोरूए, ते तैस मुल्खे मरां एपनी दूईये नुश्शन समेत वापस गानेरे लेई तियार भोइ जेई। 7 आखर तै एपनी दूईये नुश्शन समेत तैस जगारां ज़ैड़ी तै रहती थी निस्सी, ते तैना यहूदा प्रदेशे जो वापस गानेरी बत्तां च़ेलि। 8 तैखन नाओमी एपनी दूईये नुश्शन सेइं ज़ोने लगी, "तुस अपने-अपने पेवके जो वापस गाथ। ते ज़ेन्च़रे तुसेईं अपने मुन्शन सेइं ज़ैना मेरि जेवरेन ते मीं सेइं भी भलियाई कियोरीए, तेरही भलियाई यहोवा तुसन सेइं भी केरे। 9 यहोवा एरू केरे कि तुसां फिरी अपने-अपने मुन्शां केरे घरे मां आरामे सेइं राथ।" तैखन नाओमां तैन फुम्मड़ी दित्ती ते बिश्शां ज़ोवं, ते तैना दूईये नुश्शां ज़ोरे-ज़ोरे सेइं लेरां देने लेग्गी, 10 तैखन तैना दूईये नुश्शां नाओमी सेइं ज़ोने लेग्गी, "अस ज़रूर तींए सेइं साथी तेरे लोकां केरे मुल्खे मां च़लेली।" 11 पन नाओमी ज़ोने लगी, "हे मेरी कुइयव, वापस गाथ, तुस किजो मीं सेइं साथी च़लेली? कुन मेरे पेटे मां मट्ठन ज़ैना तुश्शे मुन्श बन्न? 12 हे मेरी कुइयव, वापस अपने पेवके जो च़ेलि गाथ, किजोकि अवं मुन्श बनानेरे काबल नईं बल्के बुढी भोवरीं। ते चाहे अवं ज़ोथी भी, कि मीं उमीदे, कि अज़ राती मेरो मुन्श भोथो ते मीं मट्ठां भोथां, 13 फिरी भी तुस कुन तैन केरे जुवान भोने तगर उमीद केरतां बेलगती रैथी? ते तैन बलगने तगर बगैर मुन्शेरे रैथी? हे मेरी कुइयव, एरू नईं, किजोकि मेरो दुख तुश्शे दुखे करां बड़ो जादे; हेरा, यहोवारो हथ मेरे खलाफ खड़ो भोवरोए।" 14 तैखन तैसेरी नुश्शां ज़ोरे-ज़ोरे सेइं फिरी लेरां देने लेग्गी; ते ओर्पा तां एपनी शिखी फुम्मड़ी दित्ती ते बिश्शा ज़ोवं ते च़ली जेई, पन रूत तैस करां अलग न भोइ।

15 तैखन नाओमी रूती सेइं ज़ोने लगी, "हेर, तेरी ज़ेठानी त अपने लोकन ते अपने देबतन कांजो वापस च़ली जेई; एल्हेरेलेइ तू एपनी ज़ेठानी सेइं वापस अपने घरे जो च़ली गा।" 16 पन रूत ज़ोने लगी, "तू मीं कां ऐह मिन्नत न केर, कि अवं तीं छ़ेडतां, या शैरतां च़ली गेईं किजोकि ज़ेरहां तू गाली तेरहां अवं भी गाली; ज़ैड़ी तू राहेली तैड़ी अवं भी राहेली; तेरे लोक मेरे लोक भोल्हे, ते तेरो परमेशर मेरो परमेशर भोल्हो; 17 ज़ैड़ी तू मरेली तैड़ी अवं भी मरेली, ते तैड़ी मीं दबेले। अगर मौत छ़ेडतां कोन्ची होरी वजाई सेइं अवं तीं शैरतां अलग भोइ गेईं, त यहोवा मीं सेइं एरहो बर्ताव केरे बल्के तैस करां भी जादे केरे।" 18 ज़ैखन नाओमी एन हेरने लगी कि तै मीं सेइं साथी च़लनेरे लेई तियारे, फिरी तैसां तैस सेइं होरि गल न की।

19 आखरकार तैना दूईये कौन्शां तैट्ठां च़ेलि पेई, ते बैतलहम नगरे मां पुज़्ज़ी। तैन केरे बैतलहम नगरे मां पुज़ने पुड़ सारे नगरे मां खलबली मेच़ि जेई; ते कौन्शां एक्‍की होरि सेइं ज़ोने लेग्गी, "कुन ई तै नाओमी आहे?" 20 तैसां तैन सेइं ज़ोवं, "मींजो नाओमी न ज़ोथ, मींजो मारा ज़ोथ, किजोकि सर्वशक्तिमान परमेशरे मीं बड़ो दुख दित्तोरोए। 21 अवं भरपूर च़ली जेवरी थी, पन यहोवा अवं खाली हथेइं वापस भेज़ोरी आईं। एल्हेरेलेइ यहोवाए मेरे खलाफ गवाही दित्तोरिए, ते सर्वशक्तिमान परमेशरे मीं दुख दित्तोरोए, फिरी तुस मींजो किजो नाओमी ज़ोतथ?"

22 ते तैना जौ कटनेरे शुरुआती मां बैतलहम नगरे मां पुज़्ज़ी। एस्से वजाई सेइं नाओमी एपनी मोआबी नुश्शी रूती सेइं साथी वापस अई ज़ै मोआब मुल्खेरां एवरी थी।