न्यायी 21

बिन्यामीनी केरे लेई कौन्शां केरो इंतज़ाम

1 इस्राएली लोकेईं मिस्पा नगरे मां कसम खेइतां ज़ोवरू थियूं, "असन मां कोई अपनि कुई अरो कोन्ची बिन्यामीनी सेइं ड्लाह न बनालो।" 2 इस्राएली बेतेल नगरे जो गेइतां ज़ोरे-ज़ोरे सेइं लेरां देते राए ड्लवझ़ी तगर परमेशरेरे सामने बिश्शोरे राए। 3 ते प्राथनाई मां ज़ोते थिये, "हे इस्राएलेरे परमेशर यहोवा, इस्राएले मां एरू किजो भोवं, कि अज़ इस्राएले मां एक्‍की गोट्लेरी कमी भोवरीए?" 4 फिरी होरसां तैनेईं झ़ेझ़ां उठतां तैड़ी वेदी बनेइतां होमबलि ते मेलबलि यहोवा जो च़ाढ़ी। 5 तैखन इस्राएली लोक एक्‍की होरि पुछ़ने लगे, "इस्राएलेरे सारे गोट्लन मरां कौने ज़ै यहोवारे सामने सभाई मां न थियो एवरो?" तैनेईं त भारी कसम खेइतां ज़ोवरू थियूं, "ज़ै कोई मिस्पा मां यहोवारे सामने न एज्जे तै पक्‍को मारो गालो।" 6 तैखन इस्राएली लोक अपने ढ्लान बिन्यामीनेरे बारे मां एन ज़ोइतां पसताने लगे, "अज़ इस्राएले मरां अक गोट्ल केट्टी जेवरोए। 7 असेईं ज़ै यहोवारी कसम खेइतां ज़ोवरूए, कि अस तैन सेइं अपने कोन्ची कुई अरो ड्लाह न बनालेमे, एल्हेरेलेइ बच़ोरे बिन्यामीनी केरे लेई कौन्शां मैल्हनेरे लेई कुन केरम?"

8 ज़ैखन तैनेईं एन पुछ़ू, "इस्राएलेरे गोट्लन मरां कौने ज़ै मिस्पा नगरे मां यहोवारे सामने न थियो एवरो?" तैखन ई पतो च़लो, कि गिलाद प्रदेशेरे याबेश नगरे मरां कोई छेंवनी मां सभाई मां न थियो एवरो। 9 मतलब ज़ैखन लोकां केरि गिनती की, तैखन ई पतो लग्गो कि गिलादी याबेशेरे रानेबालन मां कोई इड़ी नईं एवरो। 10 एल्हेरेलेइ इस्राएली लोकेईं बारहे हज़ार सिपेही ई हुक्म देइतां भेज़े: "तुस गेइतां कौन्शां ते बाल-बच्‍चन समेत गिलाद प्रदेशेरे याबेश नगरे तलवारी सेइं नाश केरा। 11 ते तुसेईं ज़ैन केरनू भोल्हु तैन इन आहे, कि सारे मड़दन ते ज़ेत्री कौन्शां ड्लेवरिन तैन मारा।" पन अड्लाई कुइयां नईं मैरनी। 12 एल्हेरेलेइ तैनेईं एन्च़रे कियूं ते तैन्न गिलाद प्रदेशेरे याबेश नगरेरे रानेबालन मरां च़ेवर शौव जुवान कुइयां मैल्ही ज़ैन केरो ड्लाह न थियो भोवरो; ते तैन तैना शीलो जो ज़ै कनान मुल्खे मां आहे डेरन पुड़ एन्हीं।

13 तैखन सारे इस्राएली लोकेईं तैन राहोरे बिन्यामीनी लोकां केरे नेड़े ज़ैना रिम्मोन नंव्वेरे चट्टानी पुड़ थिये ज़ोइतां भेज़े, ते तैनी तैन सेइं शैन्तरो समझोतो केरनेरे बारे मां ज़ोवं। 14 तैखन बिन्यामीनी लोक तैस वक्ते वापस जे; ते तैन तैना कुइयां दित्ती ज़ैना गिलाद प्रदेशेरे याबेश नगरे कुइयन मरां ज़ींती छ़ेडी जेवरी थी; फिरी भी तैना तैन केरे लेई घट थी। 15 तैखन लोक बिन्यामीनेरे बारे फिरी एन ज़ोइतां पसताए, कि यहोवा इस्राएलेरे गोट्लन मां कमी कियोरीए।

16 तैखन इस्राएली बुज़ुर्ग लोकेईं पुछ़ू, "बिन्यामीनी कौन्शां नाश भोइ जेई, त बच़ोरे मड़दां केरे लेई कौन्शां बनानेरे लेई अस कुन इंतज़ाम केरम?" 17 फिरी तैनेईं ज़ोवं, "बच़ोरे बिन्यामीनी केरे लेई कोई हिस्सो लोड़ते, एरू न भोए कि इस्राएले मरां अक गोट्ल मिटी गाए। 18 पन अस त अपनि कोन्ची कुइयरो तैन सेइं ड्लाह न बनेई सखम, किजोकि असेईं इस्राएली लोकेईं एन ज़ोइतां कसम खेवरीए कि लानती भोए तै ज़ै कोन्ची बिन्यामीनी सेइं अपनि कुइयरो ड्लाह बनाए।" 19 फिरी तैनेईं एक्‍की होरि सेइं ज़ोवं, "शुना, शीलो नगर ज़ै बेतेलेरे उत्तरेरे पासे, ते तैस सड़करे पूर्वेरे पासे ज़ै बेतेल नगरे मरां शेकेम नगरेरे पासे जो गातीए, ते लबोना नगरेरे दक्षिणेरे पासे, तैस मां हर साल यहोवारू अक तिहार मनाव गाते।" 20 एल्हेरेलेइ इस्राएली प्रधानेईं बिन्यामीनी सिपेहिन ऐह हुक्म दित्तो, "तुस गेइतां दाछ़री बागरे मझ़ाटे छ़ेपतां बिश्शोरे राथ, 21 ते हेरते राथ; ते अगर शीलो नगरेरी कुइयां नच़ने जो निस्सन, ते तुस दाछ़री बागी मरां निस्तां शीलो नगरेरे कुइयन मरां अपने लेई अक-अक कुई अपनि कौन्श बनेइतां बिन्यामीनेरे इलाके जो च़ले गेइयथ। 22 ते ज़ैखन तैन केरे बाजी या ढ्ला असन कां लड़ने जो एज्जेले, तैखन अस तैन सेइं ज़ोमेले, ‘महरबानी केरतां तैन असन देथ, किजोकि लड़ाई भोनेरे मौके असेईं तैन मरां हर एक्‍केरे लेई कौन्श नईं बंच़ेवरी; ते तुसेईं लोकेईं त तैन केरो ड्लाह नईं कियोरो, नईं त तुस हुनी दोषी ठहरेले।’" 23 तैखन बिन्यामीनी लोकेईं एन्च़रे कियूं, मतलब तैनेईं अपनि गिनतरे मुताबिक तैन नच़ने बैली कुइयन मरां ट्लेइतां नी; तैखन अस अपने हिस्से जो वापस जे, ते नगरन जो बसेइतां तैन मां राने लगे। 24 तैस्से वक्ते इस्राएली लोक भी तैट्ठां च़ेलतां अपने-अपने गोट्लन मां ते अपने-अपने घराने जो जे, ते तैट्ठां तैना अपने-अपने हिस्से जो च़ले जे।

25 तैन दिहाड़न मां इस्राएली लोकां केरो कोई राज़ो न थियो ज़ैस ज़ैन ठीक लगतू थियूं तै तैन्ने केरतो थियो।