न्यायी 2

इस्राएली लोक हुक्म न मन्न

1 एक्सां यहोवारे तरफां भेज़ोरो दूत गिलगाल नगरे मरां बोकीम नगरे मां गेइतां ज़ोने लगो, "मीं तुस मिस्र मुल्खे मरां एन्हतां एस कनान मुल्खे मां पुज़ाए, ज़ेसेरे बारे मां मीं तुश्शे दादे-पड़दादन सेइं कसम खेवरी थी। ते मीं ज़ोवरू थियूं, ‘ज़ै करार मीं तुसन सेइं कियोरोए, तैस अवं कधी न ट्लोड़ेलो; 2 एल्हेरेलेइ तुस एस मुल्खेरे रानेबाले बाकी लोकन सेइं कोई करार न केरथ; तुस तैन केरि वेदन बिछ़ोड़ी छ़ेडथ।’ पन तुसेईं मेरो हुक्म न मन्नो। तुसेईं एरू किजो कियूं?✝2:2 गिन. 33:50-56. 3 एल्हेरेलेइ अवं ज़ोताईं, ‘अवं तैन लोकन तुश्शे सामनेरां न कढेलो; ते तैना तुश्शे दुश्मन बनेले, ते तैन केरे देबते तुश्शे लेई फंदो भोल्हे।’" 4 ज़ैखन यहोवारे दूते सारे इस्राएली लोकन सेइं एना गल्‍लां ज़ोई, तैखन तैना लोक ज़ोरे-ज़ोरे लेरां देने लगे। 5 ते तैनेईं तैस ठारारू नवं बोकीम*2:5 बोकीम इस शब्देरो मतलब "लेरां देनी।" रख्खू। ते तैड़ी तैनेईं यहोवारे लेई बलि च़ाढ़ी। 6 ज़ैखन यहोशूए इस्राएली लोक वापस भेज़ोरे थिये, तैखन इस्राएली लोक तैस मुल्खे पुड़ कब्ज़ो केरनेरे लेई अपने-अपने हिस्से पुड़ जो जे।

यहोशूएरी मौत

7 ते यहोशूएरे ज़िन्दगी भर, ते तैन बुज़ुर्ग लोकां केरे ज़िन्दगी भर ज़ैना यहोशूएरे मरनेरे पत्ती ज़ींते राए ते तैनेईं हेरोरू थियूं कि यहोवा इस्राएली लोकां केरे लेई केरां-केरां बड्डां कम्मां कियोरन, इस्राएली लोक यहोवारी सेवा केरते राए। 8 तैखन यहोवारो सेवक नूनेरू मट्ठू यहोशू 110 सालां केरि उमरी मां मेरि जेवं। 9 ते तै तिम्नथेरेस नगरे मां ज़ै एप्रैमेरे पहाड़ी मुल्खे मां गाश नंव्वेरे पहाड़ेरे उत्तरेरे पासे, तैस्से हिस्से मां तै दब्बो जेव। 10 ते यहोशूएरे पीढ़रे सारे लोक मेरि जे; तैखन तैसेरां बाद ज़ै होरी पीढ़ी भोइ तैसेरे लोक न त यहोवाए ज़ानते थिये ते न तैसेरे कम्मे ज़ैन तैनी इस्राएली लोकां केरे लेई कियोरू थियूं।✝2:10 प्रेरित. 13:36.

इस्राएली लोक परमेशरे लेई वफादार न राए

11 एल्हेरेलेइ इस्राएली लोक तैन केरने लगे ज़ैन यहोवारी नज़री मां बुरू थियूं, ते बाल नंव्वेरे देबतेरी मूरती केरि पूज़ा केरने लगे; 12 तैना अपने दादे-पड़दादां केरे परमेशर यहोवा, ज़ैनी तैना मिस्र मुल्खे मरां केढतां आनोरो थिये, शैरतां होरि देबतां केरि पूज़ा केरने लगे, ते तैन कां मथ्थो टेको; ते यहोवाए सरक दुवाई। 13 ते तैना यहोवाए छ़ेडतां बाल देबते ते अश्तोरेत देबी केरे मूरती केरि पूज़ा केरने लगे। 14 एल्हेरेलेइ यहोवा इस्राएली लोकन पुड़ बड़ो जादे क्रोधे भोव, ते तैनी तैना लुटेरां केरे हावाले किये ज़ैना तैन्न लुटने लगे; ते तैनी तैना च़ेवरे पासां केरे दुश्मना केरे हावाले किये; ते तैना फिरी अपने दुश्मना केरे सामने टिकी न सके। 15 ज़ैखन भी इस्राएली लोक जंग केरनेरे लेई निस्ते थिये, त यहोवा तैन केरे खलाफ भोतो थियो, ज़ेन्च़रे यहोवाए तैन सेइं ज़ोवरू थियूं, बल्के यहोवा तैन सेइं कसम खेवरी थी; एन्च़रां सेइं तैना बड़े मुसीबती मां पेई जे।

16 फिर भी यहोवाए तैन केरे लेई न्यायी*2:16 न्यायी पुराने नियमेरे न्यायी लोकां केरे प्रधान भोते थिये ज़ेन्च़रे अज़्ज़ेरे वक्ते मां बड़े ठैरन भोतन। तैना सिर्फ लोकां केरे मसले हल न थी केरते बल्के इस्राएलन लोकन सही बत भी हिराते थी। ठहरातो थियो ज़ैना तैन्न लुटने बालां केरे हथ्थे मरां छुटाते थिये।✝2:16 प्रेरित. 13:20. 17 पन तैना अपने न्याय केरनेबालां केरि गल भी न थिये मन्ते; तैना यहोवा सेइं वफादार न थिये रहते, ते होरि देबतां केरि पूज़ा केरते थिये। तैन केरे दादे-पड़दादे ज़ैना यहोवारो हुक्म मन्ते थिये, तैन केरि तै पुरानी रीत तैनेईं लूशी छ़ेडी दित्ती, ते तैन केरे मुताबिक न कियूं। 18 ज़ैखन भी यहोवा तैन केरे लेई न्याय केरनेबाले ठहरातो थियो तैखन तै तैस्से साथी रेइतां तैसेरे ज़िन्दगी भर तैन्न दुश्मना केरे हथ्थे मरां छुटातो थियो; किजोकि यहोवा तैन केरू करलानू ज़ैन अंधेर केरने ते ज़ुलम केरनेबालां केरे वजाई सेइं भोतू थियूं शुन्तां दुखी थियो। 19 पन ज़ैखन न्याय केरनेबालो मेरि गातो थियो, तैखन तैना फिरी होरि देबतां केरि मूरतन पत्ती च़ेलतां तैन केरि पूज़ा केरते, ते तैन्न कां झुकतां अपने दादे पड़दादन करां जादे बिगड़ी गाते थिये; ते अपने बुरे कम्मन ते ज़िद्दी चाल न थिये छ़डते। 20 एल्हेरेलेइ यहोवारी सरक इस्राएले पुड़ भेड़की जेई; ते तैनी ज़ोवं, "इस कौमां तै करार ट्लोड़ो ज़ै मीं तैन केरे दादे-पड़दादन सेइं कियोरो थियो, ते मेरी गल न मन्नी। 21 इस वजाई सेइं ज़ैन गैर इस्राएली कौमन यहोशू मरते बार छ़ेडी जेवरोए तैन मरां अवं हुनी कोन्ची भी तैन केरे सामनेरां न कढेलो। 22 ज़ैस सेइं तैन केरे ज़िरिये अवं इस्राएली लोकां केरि अज़मैइश केरीं, कि ज़ेन्च़रे तैन केरे दादे-पड़दादे मेरे बत्ती पुड़ च़लते थिये तेन्च़रे इना भी च़लेले या नईं।" 23 एल्हेरेलेइ यहोवाए तैन कौमां अकदम न केढी, बल्के राने दित्ती, ते तैनी तैना यहोशूएरे हथ्थे मां भी न थी कियोरी।