1 अबीमेलेकेरे मरनेरां बाद इस्राएली लोकन छुटानेरे लेई इस्साकार गोट्ले मरां अक मैन्हु खड़ो भोव ज़ेसेरू नवं तोला थियूं। तैसेरे बाजी केरू नवं पूआ ते तैसेरे दादेरू नवं दोदो थियूं। ते तै एप्रैमेरे पहाड़ी प्रदेशेरे शामीर नगरे मां रहतो थियो। 2 तै 23 सालन तगर इस्राएलेरो न्याय केरतो राव। फिरी तै मेरि जेव ते तै शामीर नगरे मां दब्बो जेव।

3 तोलारे मरनेरां बाद गिलादी याईर उठो, तै 22 सालन तगर इस्राएलेरो न्याय केरतो राव। 4 ते तैसेरां 30 मट्ठां थियां ज़ैना गेधी केरे 30 बच्‍चन पुड़ सुवारी केरतां थियां; ते तैना गिलादेरे 30 नगरन पुड़ राज़ केरते थिये, ते अज़ तगर तैन जो हब्बोत्याईर* ज़ोतन। 5 ते याईर मेरि जेव, ते तै कामोन नगरे मां दब्बो जेव।

6 तैखन इस्राएली लोकेईं फिरी यहोवारी नज़री मां बुरू कियूं, मतलब बाल देबतां केरि ते अश्तोरेत देबी केरि ते अराम, सीदोन, मोआब, अम्मोनी लोकां, ते पलिश्ती लोकां केरे देबतां केरि पूज़ा केरने लगे; ते यहोवा करां दूर भोए, ते तैसेरी आराधना न की।✝ 7 एल्हेरेलेइ यहोवारी सरक इस्राएली लोकन पुड़ भड़की, ते तैनी तैना पलिश्ती ते अम्मोनी लोकां केरे अधीन किये, 8 ते तैस्से साल पलिश्ती ते आमोनी इस्राएली लोकन सताने ते तैन पुड़ ज़ुलम केरने लगे। बल्के यरदन दरियारे पार एमोरी लोकां केरे मुल्ख गिलादे मां रानेबाले सारे इस्राएली लोकन पुड़ 18 सालन तगर ज़ुलम केरते राए। 9 अम्मोनी लोक यहूदा ते बिन्यामीनेरे गोट्लां केरे लोकन ते एप्रैमेरे गोट्लेरे लोकन सेइं लड़नेरे लेई यरदन दरियारे पार गाते थिये, इड़ी तगर कि इस्राएली लोक बड़े मुसीबती मां पेई जे। 10 तैखन इस्राएली लोकेईं एन ज़ोइतां यहोवा कां बिनती की, "असेईं ज़ै अपने परमेशर छ़ेडतां बाल देबतां केरि पूज़ा कियोरीए, ई असेईं तेरे खलाफ बड़ो पाप कियोरोए।" 11 यहोवा इस्राएली लोकन जुवाब दित्तो, "कुन मीं तुस मिस्री, एमोरी, अम्मोनी, ते पलिश्ती लोकां केरे हथ्थे मरां न थिये छुटेवरे? 12 फिरी ज़ैखन सीदोनी, ते अमालेकी, ते माओनी लोकेईं तुसन पुड़ ज़ुलम कियो; ते तुसेईं मीं कां बिनती की, तैखन मीं तुस तैन केरे हथ्थे मरां भी न छुटाए? 13 फिरी भी तुसेईं अवं शारो ते बाकी देबतां केरि पूज़ा की; एल्हेरेलेइ अवं हुनी तुसन न छुटेइलो। 14 एल्हेरेलेइ गाथ, ज़ैन देबते तुसेईं च़ुनोरेन तैन कां बिनती केरा; तुश्शे दुखेरे मौके तैन्ना तुसन छुटान।" 15 पन इस्राएली लोकेईं यहोवा सेइं छंदे केरतां ज़ोवं, "असेईं पाप कियोरोए; एल्हेरेलेइ ज़ैन किछ तेरी नज़री मां रोड़ू भोए तैन्ने असन सेइं केर; पन हुन्ना असन छुटा।" 16 तैखन तैना बाकी देबतन अपने दरमियाने मरां दूर केरतां यहोवारी आराधना केरने लगे; ते तैस इस्राएलेरे लोकां केरे दुखेरे वजाई सेइं अफ़सोस भोव।

17 तैखन अम्मोनी लोकेईं अकोट्ठे भोइतां गिलाद प्रदेशे मां अपने डेरे लाए; ते इस्राएली लोकेईं भी अकोट्ठे भोइतां मिस्पा* नगरे मां अपने डेरे लाए। 18 तैखन गिलादेरे हाकिम एक्‍की होरि सेइं ज़ोने लगे, "ज़ै मैन्हु अम्मोनी लोकन सेइं जंग शुरू केरेलो? तैए गिलादेरे सारे रानेबालां केरो प्रधान बनेलो।"