न्यायी 18

दानी लोक मीकारी मूरती पूज़ा केरतन

1 तैन दिहाड़न मां इस्राएली लोकां केरो कोई राज़ो न थियो। दान गोट्लेरे लोक रानेरे लेई कोई हिस्सो तोप्पी राहोरे थिये; किजोकि इस्राएलेरे गोट्लन मां तैन केरो हिस्सो तैस मौके तगर न थियो मैल्होरो। 2 तैखन दानी लोकेईं अपने सब कुलन मरां पंच़ बहादर सिपाही सोरा ते एश्ताओल नगरन मरां मुल्खेरो भेद कढने ते तैसेरी हेरजाच केरनेरे लेई एन ज़ोइतां भेज़े, "गेइतां मुल्खे मां हेरजाच केरा।" एल्हेरेलेइ तैना एप्रैमेरे पहाड़ी मुल्खे मां मीकारे घरे मां रुके। 3 ज़ैखन तैना मीकारे घरे मां थिये, तैखन तैनेईं तैस जुवान लेवेरी गल पिशानी; एल्हेरेलेइ तैसेरे पासे मुड़तां तैस पुछ़ू, "तू इड़ी केनि आनो? ते तू इड़ी कुन केरतस? ते इड़ी तीं कां कुने?" 4 तैनी तैन सेइं ज़ोवं, "मीका मीं सेइं बड़ो रोड़ो बर्ताव कियोरोए, ते अवं तैनी याजकेरू कम केरनेरे लेई रखोरोइं।" 5 तैनेईं तैस सेइं ज़ोवं, "महरबानी केरतां परमेशरे पुछ़, कि असन पतो च़ले कि ज़ैन सफर अस केरतम तैन कामयाब भोल्हु या नईं।" 6 याजके तैन सेइं ज़ोवं, "सुखे सेइं च़ले गाथ। ज़ैन सफर तुस केरतथ तैस पुड़ यहोवारी सिद्धी नज़रे।"

7 तैखन तैना पंच़ सिपाही च़ले जे, ते लैश नगरे जो गेइतां तैड़ी लोक हेरे कि सीदोनी लोकां केरे ज़ेरे निडर, बे फिक्र, ते सुखे सेइं रहते थिये; ते एस मुल्खेरो कोई अधिकारी नईं, ज़ै तैन्न कोन्ची कम्मे मां रोके, ते इना सीदोनी लोकन करां दूर रहतन, ते होरि लोकन सेइं कोई बर्ताव न रखन। 8 तैखन तैना सोरा ते एश्ताओल नगरन जो अपने रिश्तेदारन कां जे, ते तैन केरे रिश्तेदारेईं तैन्न पुछ़ू, "तुसेईं कुन खबर आनोरीए?" 9 तैनेईं जुवाब दित्तो, "एज्जा, अस तैन लोकन पुड़ हमलो केरम; किजोकि असेईं तै मुल्ख हेरो तै बड़ो रोड़ो आहे। तुस किजो च़ुपच़ारे रहतथ? तैड़ी च़ेलतां तैस मुल्खे अपने कब्ज़े मां नेनेरे लेई आलस न केरा। 10 तैड़ी पुज़तां तुसन निडर रानेबाले लोक, ते खुल्‍लो-डुल्‍लो मुल्ख मैल्हेलो; ते परमेशरे तै तुश्शे हथ्थे मां दित्तोरोए। तै एरी ठारे ज़ैस मां सैरी धेरतरी चीज़न।"

11 तैखन तैट्ठां सोरा ते एश्ताओल नगरन मरां दानी लोकां केरे कुलेरे 600 लोक जंगरे हथियार बेन्धतां च़ेलि पे, 12 तैनेईं गेइतां यहूदा प्रदेशेरे किर्यत्यारीम नगरे मां डेरे खड़े किये। एस वजाई सेइं तैस जगारू नवं अज़ तगर महनेदान रावं, तै त किर्य्यत्यारीमेरे उतरेरे पासे। 13 तैसेरां बाद तैट्ठां तैना अग्रोवं गेइतां एप्रैम गोट्लेरे पहाड़ी इलाके मां मीकारे घरेरे नेड़े आए।

14 तैखन ज़ैना पंच़ मैन्हु लैश नगरेरो भेद कढने जेवरे थिये, तैना अपने साथी इस्राएली लोकन सेइं ज़ोने लगे, "कुन तुस ज़ानतथ कि एन घरन मां अक एपोद, किछ कुल देबतो, अक घड़ाई कियोरी ते अक ढालोरी मूरतीए? एल्हेरेलेइ हुनी सोचा, कि कुन कियोरू लोड़ते।" 15 तै तैट्ठां मुड़तां तैस जुवान लेवेरे घरे जेव, ज़ैन मीकारू घर थियूं, ते तैसेरो हाल चाल पुछ़ो। 16 ते तैना 600 दानी मड़द फाटके मां हथियार बेन्धतां खड़े राए। 17 ते ज़ैना पंच़ मैन्हु मुल्खेरो भेद कढने जेवरे थिये, तैनेईं तैड़ी अन्तर गेइतां तै घड़ाई कियोरी मूरती, ते एपोद, ते कुल देबते, ते ढालोरी मूरती नेइ, ते तै याजक फाटके मां तैन हथियार बन्धोरे 600 लोकन साथी खड़ो थियो। 18 ज़ैखन तैन पंच़ मैन्हेईं मीकारे घरे मां गेइतां घड़ाई कियोरी मूरत, एपोद, ते कुल देबतो, ते ढालोरी मूरत आनोरी थी, तैखन याजके तैन पुछ़ू, "एन तुस कुन केरतथ?" 19 तैनेईं तैस ज़ोवं, "च़ुप रा, किछ न ज़ो, ते असन लोकन सेइं साथी च़ेलतां, इश्शे लेई बाजी केरो ज़ेरो सलाहकार ते याजक बन। तेरे लेई कुन रोड़ू आहे? एन कि एक्‍की मैन्हेरे घरानेरो याजक भोस, या एन, कि इस्राएली केरे एक्‍की गोट्ल ते कुलेरो याजक भोस?" 20 तैखन याजक खुश भोव, एल्हेरेलेइ तै एपोद, कुल देबतो, ते घड़ाई कियोरी मूरत नेइतां तैन लोकन साथी च़लो जेव।

21 तैखन तैना मुड़े, ते बाल बच्‍चन, जानबरन, ते सामाने एप्पु अग्री केरतां च़ेलि पे। 22 ज़ैखन तैना मीकारे घरे करां दूर निस्सी जेवरे थिये, तैखन ज़ैना मैन्हु मीकारे घरेरे नेड़े घरन मां रहते थिये तैना अकोट्ठे भोइतां दानी लोकां केरे नेड़े पुज़्ज़े। 23 ते दानी लोकन जो आवाज़ दित्ती, तैखन तैनेईं तुत्तर फिरेइतां मीका सेइं ज़ोवं, "तीं कुन भोवं कि तू एत्रो बड़ो जथो घिन्तां एवरोस?" 24 तैनी ज़ोवं, "तुस त मेरे बनेवरे देबतन ते याजक घिन्तां च़लोरेथ; फिरी मीं कां कुन रेई जेवं? ते तुस मीं किजो पुछ़तथ कि तीं कुन भोवरूए?" 25 दानी लोकेईं तैस सेइं ज़ोवं, "तेरी आवाज़ असन मां न शुनोए, कोन्च एरू न भोए कि सेरकोरे मैन्हु तुसन लोकन पुड़ हमलो केरन ते तू ते तेरे घरेरे लोक भी मारे गान।" 26 तैखन दानी लोक अपने बत्तां च़ले; ते मीका एन हेरतां कि तैना मीं करां जादे ज़ोरे बालेन बेदलोइतां अपने घरे जो वापस जेव।

27 तैखन तैना मीकारी बनेवरी चीज़ां ते तैसेरे याजक साथी नेइतां लैश नगरेरे नेड़े आए, ज़ैस मां लोक निडर भोइतां आरामे सेइं रहते थिये, ते तैनेईं तैना तलवारी सेइं मारे, ते नगर अग लेइतां फुक्‍की छ़डू। 28 ते कोई तैन बच़ानेबालो न थियो, किजोकि तै सीदोन नगरे करां दूर थियो, ते तैना बाकी मैन्हन सेइं कोई बर्ताव न थिये रखते। ते तैन बेत्रहोब नगरेरी वैदी मां थियूं। तैखन तैनेईं नगर मज़बूत कियूं, ते तैस मां राने लगे। 29 ते तैनेईं तैस नगरेरू नवं इस्राएलेरे एक्‍की मट्ठे पुड़ अपने पूर्वजे दानेरे नंव्वे पुड़ दान रख्खू; पन पेइले तैस नगरेरू नवं लैश थियूं। 30 तैखन दानी लोकेईं तै घड़ाई कियोरी मूरत खड़ी की; ते मुल्खेरी गुलैमरे मौके तै योनातान ज़ैन गेर्शोमेरू मट्ठू ते मूसेरू पोट्लड़ू थियूं, तै ते तैसेरे खानदानेरे लोक दान गोट्लेरे याजक बनोरे राए।✝18:30 2 राज़. 15:29. 31 ते ज़ैखन तगर परमेशरेरू घर शीलो नगरे*18:31 शीलो नगरे व्यव. 12:1-32. मां बनोरू रावं, तैखन तगर तैनेईं मीकारी घड़ाई कियोरी मूरती तैड़ी रख्खी।