1 एहूदेरे मरनेरां बाद इस्राएली लोकेईं फिरी यहोवारी नज़री मां बुरू कियूं। 2 एल्हेरेलेइ यहोवाए तैना हासोर नगरे मां राज़ केरनेबाले कनानेरे राज़े याबीनेरे अधीन किये, ज़ेसेरो सेनापति सीसरा थियो, ज़ै गैर कौमां केरे हरोशेत नगरेरो रानेबालो थियो। 3 सीसरारे सेनापति कां लोंहेरे 900 रथ थिये, ते तै इस्राएली लोकन पुड़ 20 सालन तगर ज़ुलम केरतो राव, तैखन इस्राएली लोकेईं यहोवा कां बिनती की।

4 तैस मौके लप्पीदोतेरी कौन्श दबोरा* ज़ै नबिया थी इस्राएली लोकां केरो न्याय केरती थी। 5 तै एप्रैमेरे पहाड़ी इलाके मां रामाह ते बेतेल नगरां केरे मझ़ाटे मां दबोरारे खजूरेरे बुट्टे हैठ बिशती थी, ते इस्राएली लोक तैस कां न्यायेरे लेई गाते थिये। 6 एक्सां दबोरा नप्ताली प्रदेशे मरां केदेश नगरे मां रानेबाले अबीनोअमेरू मट्ठू बाराके जो बिस्तार भेज़तां कुजव, "कुन इस्राएली केरे परमेशर यहोवा ई हुक्म नईं दित्तोरो, कि तू गेइतां ताबोर पहाड़े पुड़ च़ढ़, ते नप्ताली ते जबूलूनी लोकन मरां 10000 सिपाही साथी ने? 7 तैखन अवं याबीन राज़ेरे सेनापति सीसरा रथ्थन ते बड़े मैन्हन समेत कीशोन दरिया तगर तेरे पासे खिचतां आनेलो; ते तैस अवं तेरे हथ्थे मां केरेलो।" 8 बाराके दबोरा जुवाब दित्तो, "अगर तू मीं सेइं साथी च़लेली त अवं गेइलो, अगर तू न च़लेली त अवं न गेइलो।" 9 तैखन दबोरा ज़ोवं, "अवं तीं साथी ज़रूर च़लेली; फिरी भी इस सफरे सेइं तेरी कोई आदर न भोल्ही, किजोकि यहोवा सीसरा एक्‍की कौन्शरे अधीन केरेलो।" तैखन दबोरा उठतां बाराके सेइं साथी केदेश नगरे जो जेई। 10 तैखन बाराके जबूलून ते नप्ताली लोक केदेश नगरे मां कुजाए; ते तैना तैस पत्ती 10000 सिपाही जे; ते दबोरा तैस सेइं साथी च़ली जेई।

11 तैस वक्ते हेबेर नंव्वेरे केनी मैन्हे ते तैन केनी लोकन मरां, ज़ैना मूसेरे शेरहेरे खानदान मरां थिये, तैनेईं अपनो आप अलग केरतां केदेश नगरेरे नेड़े सानन्नीमेरो बंज़ेरे बुट्टे तगर गेइतां अपनो डेरो तैट्ठी लेवरो थियो।

12 ज़ैखन सीसरा सेनापति ई खबर मैल्ही कि अबीनोअमेरू मट्ठू बाराक अपने सेनाई समेत ताबोर पहाड़े पुड़ पुज़ोरूए। 13 तैखन सीसरा अपने सारे लोंहेरे 900 रथ, ते अपने साथेरी सारी सेना गैर कौमां केरे हरोशेते करां कीशोन दरिया पुड़ अकोट्ठी की।✝ 14 तैखन दबोरा बाराके सेइं ज़ोवं, "उठ! किजोकि अज़ तैए दिहाड़ीए ज़ैस मां यहोवा सीसरा तेरे हथ्थे मां केरेलो। कुन यहोवा तीं अग्री नईं जेवरो?" एस पुड़ बाराक ते तैस पत्ती-पत्ती 10000 सिपाही ताबोर पहाड़े पुड़ेरां ओस्से। 15 तैखन यहोवाए सारे रथ बल्के सारी सेनाई सने सीसरा तलवारी सेइं बाराकेरे सामने डरेई छ़डो; ते सीसरा रथे पुड़ेरां ओस्तां पैदल नेश्शी जेव।✝ 16 ते बाराके गैर कौमां केरे हरोशेत नगरे तगर रथां ते सेनारो पीछो कियो, ते तलवारी सेइं सीसरारी सारी सेना मारी; ते अक भी मैन्हु न बंच़ो।

17 पन सीसरा पैदल हेबेर केनेरी कौन्श याएलेरे डेरे जो नेश्शी जेव; किजोकि हासोरेरो राज़ो याबीन ते हेबेर केनी मां दोस्ती थी। 18 तैखन याएल सीसरा सेइं मिलनेरे लेई बेइर निस्सी ते तैस सेइं ज़ोने लगी, "हे मेरे मालिक, एई, अन्तर एई, ते डर न।" तैखन तै तैस कां डेरे मां जेव, ते तैस कम्बलेरू छ़ुंहूं दित्तू। 19 तैखन सीसरा तैस सेइं ज़ोवं, "मीं ट्लिश लगोरीए, मीं थोड़ू पानी पीया।" तैखन तैसा दुद्धेरी कुप्पी खोलतां तैस दुद्ध पियावं, ते तैसा तैस पुड़ तैस कम्बलेरू छ़ुंहूं दित्तू।✝ 20 तैखन सीसरा तैस सेइं ज़ोवं, "डेरेरे दारे पुड़ खड़ी रह, ते अगर कोई एइतां तीं पुछ़े, ‘इड़ी कोई मड़दे?’ तैखन ज़ोइयां, ‘कोई भी नईं।’" 21 एसेरे बाद हेबेरेरी कौन्श याएलां डेरेरो अक लोंहेरो खीलो नियो, ते अपने हथ्थे मां अक हथोड़ो भी नेव, तै त थकोरो थियो एल्हेरेलेइ डुग्घी निड्ली मां झ़ुलोरो थियो। ते तै पोल्‍ले पव तैस कां गेइतां खीलो तैसेरे कन्ने पुड़ एरहो डोबो कि खीलो आर-पार भोइतां तल्‍ले मां डुब्बी जेव, ते तै मेरि जेव। 22 ज़ैखन बाराक सीसरारो पीछो केरतो अव, तैखन याएल तैस सेइं मिलने जो निस्सी, ते ज़ोवं, "इरां एई, ज़ैस तू तोप्पी राहोरोस तैस अवं तीं हिराली।" तैखन तैनी तैस सेइं साथी गेइतां कुन हेरू; कि सीसरा मेरि जेवरोए, ते तै खीलो तैसेरे कन्ने पुड़ डोबोरोए।

23 एन्च़रां सेइं परमेशरे तैस दिहाड़े कनानेरो राज़ो याबीन इस्राएली लोकन करां हाराव। 24 ते इस्राएली लोक कनानेरे राज़े याबीने पुड़ ताकतबर भोते जे, इड़ी तगर कि तैनेईं कनानी लोकां केरो राज़ो याबीन नष्ट कियो।