1 एक्सां गिदोन ज़ैस जो यरूब्बाल* भी ज़ोतन ते सारे लोक ज़ैना तैस सेइं साथी थिये झ़ेझ़ां उठे, ते हरोद नंव्वेरे नागेरे पैनी कां नेड़े अपने डेरे लाए; ते मिद्यानी लोकां केरे डेरे तैन केरे उत्तरी पासे मोरे नंव्वेरे पहैड़ी कां वैदी मां थिये।

2 तैखन यहोवा गिदोने सेइं ज़ोवं, "ज़ैना लोक तीं सेइं साथी आन तैना एत्रे जादे आन कि अवं मिद्यानी लोकन तैन केरे हथ्थे मां न केरि सेखी, नईं त इस्राएली लोक एन ज़ोइतां मेरे खलाफ अपनि तारीफ़ केरने लग्गेले, कि अस अपने ताकती सेइं बच़ोरेम। 3 एल्हेरेलेइ तू गेइतां लोकन मां ई प्रचार केरतां शुना, ‘ज़ै कोई डरके मारे थरकतो भोए, तै गिलाद पहाड़े पुड़ेरां वापस च़ेलि गाए।’" तैखन 22000 सिपाही वापस जे, ते सिर्फ 10000 रेही जे।

4 फिरी यहोवा गिदोने सेइं ज़ोवं, "हेजू भी लोक जादे आन; तैन्न नागे कां बुन ने, तैड़ी अवं तैन तेरे लेई परखेलो; ते ज़ेसेरे बारे मां अवं तीं सेइं ज़ोलो, ‘कि इना तीं सेइं साथी च़लन,’ ते तै तीं सेइं साथी च़ले; ते ज़ेसेरे बारे मां अवं ज़ोईं, ‘ई तीं सेइं साथी न गाए,’ त तै न गाए।" 5 तैखन गिदोने तैना लोक पैनेरे नागे कां निये; तैड़ी यहोवा तैस सेइं ज़ोवं, "ज़ेत्रे कुतरेरे ज़ेरे ज़िभी सेइं चपड़-चपड़ केरतां पानी पीएले, तैन्न अलग रेखां; ते ज़ैना ज़ैंधू तल्‍ले लेइतां पानी पीएले तैन्न भी अलग रेखां।" 6 ज़ैनेईं चपड़-चपड़ केरतां पानी पियूं तैन केरि त गिनती 300 भोइ; ते होरि सारे लोकेईं ज़ैंधू तल्‍ले लेइतां पानी पियूं। 7 तैखन यहोवा गिदोने सेइं ज़ोवं, "एन 300 चपड़-चपड़ केरतां पानी पीने बालां केरे ज़िरिये अवं तुसन छुटेइलो, ते मिद्यानी लोकन तेरे हथ्थे मां केरेलो; ते बाकी लोक अपने-अपने घरे जो वापस गान।" 8 तैखन तैन 300 इस्राएली लोकेईं साथी खानेरी चीज़ां नी ते अपने-अपने नरशिंगे निये; ते तैनी इस्राएलेरे बाकी सारे मड़द अपने-अपने डेरन जो वापस भेज़े, पन तैना 300 मड़द एप्पु कां रख्खे; ते मिद्यानी लोकां केरे डेरे बुन वैदी मां लगोरे राए।

9 तैस्से राती यहोवाए गिदोने हुक्म दित्तो, "उठ, ते मिद्यानी लोकां केरे डेरन पुड़ हमलो केर; किजोकि अवं तैन्न तेरे हथ्थे मां केरताईं। 10 पन अगर तू हमलो केरने करां डरतस, त अपने सेवक फूरा साथी नेइतां डेरन कां नेड़े गेइतां शुन, 11 कि तैना कुन ज़ोई राहोरेन; तैसेरां बाद तीं तैन डेरन पुड़ हमलो केरनेरी हिम्मत एज्जेली।" तैखन तै अपने सेवक फूरा एप्पु सेइं साथी नेइतां तैन हथियारन बालन कां ज़ैना डेरन कां कूने पुड़ थिये ओस्सी जेव। 12 मिद्यानी ते अमालेकी ते सारे पूर्वी लोक त टिट्टां केरे ज़ेरेन ज़ैना जादे वैदी मां फैलोरे थिये; ते तैन केरे ऊँट समुद्रेरे बन्ने रेतरे सिक्‍कां केरे ज़ेरे गिनती करां बेइर थिये। 13 ज़ैखन गिदोन तैड़ी अव, तैखन अक मैन्हु अपने कोन्ची सैथी सेइं अपनु सुपनु ज़ोई राहोरो थियो, "शुन, मीं सुपने मां कुन लाहेरूए कि जौआं केरि अक रोट्टी बिछ़ड़ते-बिछ़ड़ते मिद्यानेरे डेरन मां अई, ते डेरे एरी टक्‍कर मारी कि तै बिछ़ड़ी जेव, ते एन्च़रे उलटोव, कि डेरो बिछ़ड़ोरो रेही जेव।" 14 तैसेरे सैथे जुवाब दित्तो, "इन योआशेरू मट्ठू गिदोन नंव्वेरे एक्‍की इस्राएली मड़देरी तलवारारे अलावा किछ नईं; तैस्सेरे हथ्थे मां परमेशरे मिद्यान सारे डेरन समेत दित्तोरोए।"

15 तैस सुपनेरे बारे मां ते तैसेरो मतलब शुन्तां गिदोने यहोवारी आराधना की; ते इस्राएलेरे डेरन मां वापस गेइतां ज़ोवं, "उठा, यहोवा मिद्यानी सेना तुश्शे कब्ज़े मां कियोरीए।" 16 तैखन तैनी तैन 300 मड़दां केरे ट्लाई हिस्से बनाए, ते तैन सेभी मड़दां केरे हथ्थे मां अक-अक नरशिंगो ते बिंगो घड़ो दित्तो, ते घड़न मां अक मसाल थी। 17 फिरी गिदोने तैन सेइं ज़ोवं, "मीं हेरां, ते तेन्च़रे केरां; शुना, ज़ैखन अवं तैन डेरां केरे कूने पुड़ पुज़्ज़ी, तैखन ज़ेरू अवं केरीं तेन्च़रे तुस भी केरथ। 18 मतलब ज़ैखन अवं ते मेरे सारे साथी नरशिंगो बज़ान तैखन तुस भी डेरां केरे च़ेवरे पासे नरशिंगो बज़ेइयथ, ते नहरे देइयथ, ‘यहोवारी ते गिदोनेरी तलवार।’"

19 एध्धी राती मां ज़ेरि पहरेदारां केरि बदली भोइ जेवरी थी तेन्च़रे गिदोन अपने साथी 100 मड़दन समेत डेरां केरे कूने पुड़ जेव; ते नरशिंगो बज़ाव ते अपने हथ्थां केरे घड़े भन्ने। 20 तैखन ट्लाईए झुण्डेईं नरशिंगे बज़ाए ते घड़े भन्ने; ते अपने-अपने बांए हथ्थे मां मसाल ते देइने हथ्थे मां फुक देनेरे लेई नरशिंगो नेइतां चिन्डां मारने लगे, "यहोवारी तलवार ते गिदोनेरी तलवार।" 21 तैखन तैना डेरन कां च़ेवरे पासे अपने-अपने जगाई पुड़ खड़े राए, ते सारे सेनारे लोक दौड़ने लगे; ते तैनेईं चिन्डां मैरी-मैरी तैना निशाने। 22 ते तैनेईं 300 नरशिंगे बज़ाए, ते यहोवा एक्‍की-एक्‍की मड़देरी तलवार तैसेरे सैथी पुड़ ते सारी सेनाई पुड़ च़लावाई; त सेनारे लोक सरेरारे पासे बेतशित्ता नगरे तगर ते तब्बात नगरे कां नेड़े आबेल-महोला नगरे तगर नश्शे। 23 तैखन इस्राएली मड़द नप्ताली ते आशेर ते मनश्शेरे सारे मुल्खे मरां अकोट्ठे भोइतां मिद्यानी लोकन पत्ती पे। 24 ते गिदोने एप्रैमेरे सारे पहाड़ी मुल्खे मां एन ज़ोने जो दूत भेज़े, "मिद्यानी लोकन सेइं लड़ाई केरने जो च़ले एज्जा, ते यरदन दरियारे बन्ने पुड़ां बेतबारा तगर तैन करां पेइले अपने कैबू मां नेथ।" तैखन सारे एप्रैमी मड़देई अकोट्ठे भोइतां यरदन दरियाए करां बेतबारा तगर अपने कब्ज़े मां कियूं। 25 ते तैनेईं ओरेब ते जेब नंव्वेरे दूई मिद्यानेरे हाकिम ट्लाए; ते ओरेब ज़ै ओरेब नंव्वेरे पहैड़ी पुड़, ते जेब, जेब नंव्वेरे दाछ़रे कुण्डे पुड़ मारो; ते तैना मिद्यानी केरे पत्ती पे; ते ओरेब ते जेबेरी क्रोड़ी यरदन दरियाए पार गिदोने कां नी।