न्यायी 8

मिद्यानी लोकां केरि पूरी हार

1 तैखन एप्रैम गोट्लेरे मड़देई गिदोने पुछ़ू, "तीं असन सेइं एरहो बर्ताव किजो कियोरोए, कि ज़ैखन तू मिद्यानी लोकन सेइं लड़ने जो च़लो तैखन तीं अस न कुजाए?" एल्हेरेलेइ तैनेईं तैस सेइं बड़ी लड़ाई की। 2 गिदोने तैन्न जुवाब दित्तो, "मीं तुश्शे ज़ेरू भला हुन्ना तगर कुन कियूं? कुन एप्रैमेरी छ़डोरी दाछ़ भी अबीएजेरे खानदानेरे सारे फसली करां रोड़ी नईं? 3 तुश्शे हथ्थन मां परमेशरे ओरेब ते जेब नंव्वेरे मिद्यानेरे हाकिम दित्ते; तैखन मीं तुश्शे बराबर कुन केरि बटु?" ज़ैखन गिदोने इनां गल्‍लां ज़ोई, तैखन तैन केरि सरक ठंडी भोइ।

4 तैखन गिदोन ते तैस सेइं साथी 300 सिपाही, ज़ैना थकोरे थिये फिरी भी लड़ते राए, ते यरदन दरियारे पार आए। 5 ज़ैखन तैना सुक्‍कोत नगरे मां पुज़्ज़े, तैखन गिदोने तैट्ठेरे लोकन सेइं ज़ोवं, "मीं पत्ती एन एजनेबालन रोट्टी देथ, किजोकि एना थकोरेन; ते अवं मिद्यानेरे राज़ां केरो पीछो केरि राहोरोईं ज़ैन केरू नवं जेबह ते सल्मुन्ना आहे।" 6 सुक्‍कोत नगरेरे हाकिमेईं जुवाब दित्तो, "कुन जेबह ते सल्मुन्ना तेरे कब्ज़े एवरेन, कि अस तेरी सेनाई रोट्टी देम?" 7 गिदोने ज़ोवं, "ज़ैखन यहोवा जेबह ते सल्मुन्ना मेरे कब्ज़े मां केरेलो, तैखन अवं एस गल्‍लरे वजाई सेइं तुसन जंगलेरे कंटन बाले ते शढ्ली सेइं खुवेइलो।" 8 तैट्ठां तै पनूएल नगरे जो जेव, ते तैट्ठेरे लोकन सेइं एरी गल ज़ोई; ते पनूएल नगरेरे लोकेईं सुक्‍कोत नगरेरे लोकां केरो ज़ेरो जुवाब दित्तो। 9 तैनी पनूएल नगरेरे लोकन सेइं ज़ोवं, "ज़ैखन अवं ज़ींत्तां वापस एज्जेलो, तैखन इस गुम्मटे बिछ़ोड़ेलो।"

10 तैस वक्ते मां जेबह ते सल्मुन्ना त कर्कोर नगरे मां थिये, ते तैन सेइं साथी लगभग 15000 जुवाना केरि सेना थी, किजोकि पूर्वी लोकां केरि सारी सेनाई मां तेत्रे रेही जेवरे थिये; ते ज़ैना मारे जेवरे थिये तैना 120000 हथियारन बाले थिये। 11 तैखन गिदोन नोबह ते योगबहा नगरां केरे पूर्वेरे पासे डेरन मां रानेबालां केरे बत्ती मां गेइतां तैस सेनाई पुड़ हमलो कियो ज़ैना बे फिक्र भोइतां बिश्शोरे थिये। 12 ते ज़ैखन मिद्यानी लोकां केरे दूईये राज़े जेबह ते सल्मुन्ना नश्शे, तैखन तैनी पीछो केरतां तैना ट्लाए, ते सारी सेना निशानी। 13 ते योआशेरू मट्ठू गिदोन हेरेस नंव्वेरे चढ़ाई पुड़ेरां लड़ैई मरां वापस अऊं। 14 ते सुक्‍कोत नगरेरो एक्‍की जुवाने ट्लेइतां तैस पुछ़ू, ते तैनी सुक्‍कोतेरे 77 हाकिम ते बुज़ुर्ग लोकां केरो पतो लिखाव।

15 तैखन तै सुक्‍कोतेरे लोकन कां गेइतां ज़ोने लगो, "जेबह ते सल्मुन्ना हेरा, ज़ैन केरे बारे मां ज़ोइतां तुसेईं मेरो मज़ाक बनेवरो थियो, कि कुन जेबह ते सल्मुन्ना हुनी तेरे कब्ज़े मां आन, कि अस तेरे थकोरे मैन्हन रोट्टी देम?" 16 तैखन तैनी तैस नगरेरे बुज़ुर्ग लोक ट्लाए, ते जंगलेरे कंटन ते शढ्ल नेइतां सुक्‍कोतेरे मड़दन सबक शिखालो। 17 ते तैनी पनूएलेरो गुम्मट बिछ़ोड़ो, ते तैस नगरेरे मैन्हु मैरी छ़डे।

18 फिरी तैनी जेबह ते सल्मुन्ना पुछ़ू, "ज़ैना मैन्हु तुसेईं ताबोर पहाड़े पुड़ मारोरे थिये तैना केरहे ज़ेरे थिये?" तैनेईं जुवाब दित्तो, "तैना तेरे ज़ेरे थिये, हर एक्‍केरू रूप राजकुमारेरू ज़ेरू थियूं।" 19 गिदोने ज़ोवं, "तैना त मेरे सक्‍के ढ्ला थिये; यहोवारी ज़िन्दगरी कसम, अगर तुसेईं तैना ज़ींते छ़डोरे भोथे, त मीं तुस न थिये मारने।"✝8:19 गिन. 35:9-34. 20 तैखन तैनी अपने बडे मट्ठे यतेरे पासे मुड़तां तैस ज़ोवं, "उठतां इन्न मैरी छ़ड।" पन यतेरे डेरतां अपनि तलवार न ट्लाई, किजोकि तै हेजू निकड़ो थियो। 21 तैखन जेबह ते सल्मुन्ना गिदोने सेइं ज़ोवं, "तू उठतां असन पुड़ हमलो केर; किजोकि ज़ेरो मड़द भोए, तेरही तैसेरी ताकत भी भोनीए।" तैखन गिदोने उठतां जेबह ते सल्मुन्ना मारे; ते तैनी तैन केरे ऊँटां केरे गलेरे कीमती हार निये।

22 तैखन इस्राएली मैन्हेईं गिदोने सेइं ज़ोवं, "तू असन पुड़ हुकूमत केर, किजोकि तीं अस मिद्यानेरे हथ्थे करां छुटेवरेम। तू ते तेरू मट्ठू ते पोट्लड़ां भी हुकूमत केरन।" 23 गिदोने तैन सेइं ज़ोवं, "अवं तुसन पुड़ हुकूमत न केरेलो, ते न मेरू मट्ठू तुसन पुड़ हुकूमत केरेलू; यहोवा तुसन पुड़ हुकूमत केरेलो।" 24 फिरी गिदोने तैन सेइं ज़ोवं, "अवं तुसन करां किछ मगताईं; तुस मीं अपनि-अपनि लूट-पाटी मरां कन्नां केरि बैली देथ। (तैना लोक त इश्माएली थिये, एस वजाई सेइं तैन केरि बैली सोन्नेरी थी।)" 25 तैनेईं ज़ोवं, "अस ज़रूर देमेले।" तैखन तैनेईं कपड़ो बछ़ेइतां तैस पुड़ अपनि-अपनि लूट-पाटी मरां केढतां बैली छ़ेडी दित्ती। 26 ज़ैना सोन्नेरी बैली तैनी मेग्गी तैन केरो वज़न लगभग 20 किल्‍लो निस्सो; ते तैन केरे अलावा चैंदरे हार, झुमके, ते बैंगनी रंगेरां लिगड़ां ज़ैना मिद्यानी लोकां केरे राज़े लाते थिये, ते तैन केरे ऊँटां केरि शंगलां। 27 तैन केरो गिदोने अक एपोद*8:27 एपोद इड़ी एपोदेरो मतलब मूरतीए। बनावेइतां अपने ओप्रा नंव्वेरे नगरे मां रख्खो; ते सारे इस्राएली लोक व्यभिचार केरनेबैली कौन्शरे ज़ेरे तैसेरे पत्ती भोइ जे, ते तै गिदोन ते तैसेरे घरानेरे लेई फंदो बेनि जेव। 28 एन्च़रां सेइं मिद्यानी लोक इस्राएली लोकां केरे अधीन भोइ जे, ते फिरी तैनेईं घमण्डे सेइं क्रोड़ी खड़ी न की। ते गिदोनेरे ज़िन्दगी भर मतलब 40 सालन तगर मुल्खे मां आराम राव।

29 योआशेरू मट्ठू यरूब्बाल गेइतां अपने घरे मां राने लग्गू। 30 ते गिदोने 70 मट्ठां भोआं, किजोकि तैसेरी बेड़ि जादे कौन्शां थी। 31 ते तैसेरी अक रखैल थी ज़ै शेकेम नगरे मां रहती थी तैस अक मट्ठू भोवं, ते गिदोने तैसेरू नवं अबीमेलेक रख्खू। 32 योआशेरू मट्ठू गिदोन पूरे बुढापे मां मेरि जेव, ते अबीएजेरी लोकां केरे ओप्रा नंव्वेरे ड्लाव्वें मां ज़ैड़ी तैसेरो बाजी दबोरो थियो तैड़ी तै भी दब्बो जेव।

33 पन गिदोनेरे मरनेरे बाद बड़े जल्दी इस्राएली लोक यहोवा करां दूर भोए, ते व्यभिचार केरनेबैली कौन्शरे ज़ेरे बाल देबतां केरि पूज़ा केरने लगे, ते बाल-बरीत अपनो देबतो बनाव।✝8:33 न्या. 2:19;3:11-12;4:1. 34 ते इस्राएली लोकेईं अपने परमेशर यहोवा याद न रख्खो, ज़ैनी तैना च़ेवरे पासे केरे सारे दुश्मना केरे हथ्थे मरां छुटेवरे थिये; 35 ते न तैनेईं यरूब्बाल मतलब गिदोनेरी तैस सारी भलियाई एरे मुताबिक ज़ै तैनी इस्राएली लोकन सेइं कियोरी थी तैसेरे घराने सेइं महरबानी की।