1 तैखन बोअज बैतलहम नगरेरे फाटके* कां गेइतां बिश्शी जेव; ते ज़ैस छुटानेबाले भियालेरी चर्चा बोअजे कियोरी थी, तै भी अव। तैखन बोअज ज़ोने लगो, "हे दोस्त, इड़ी एइतां बिश्शी गा;" ते तै तैड़ी गेइतां बिश्शी जेव। 2 तैखन बोअजे नगरेरे दश बुज़ुर्ग लोकन कुजेइतां ज़ोवं, "इस गल्‍लरे गवाह बन्नेरे लेई एज्जा।" ते तैना आए। 3 तैखन बोअज तैस छुटानेबाले भियाले सेइं ज़ोने लगो, "नाओमी ज़ै मोआब मुल्खेरां वापस एवरीए तै इश्शे भियाल एलीमेलेक ज़ै मेरि जेवरोए तैसेरे ज़मीनरो अक हिस्सो बेच़नो चातीए। 4 एल्हेरेलेइ मीं सोचू कि ऐह गल तीं सेइं समझ़ेइतां ज़ोइलो, कि तू तैस ज़मीनरे हिस्से इन बिश्शोरे बुज़ुर्ग लोकां केरे सामने घिन्तां ने। ते अगर तू तैस छुटाने चास, त छुटा; ते अगर तू छुटानो न चास, त मीं सेइं ज़ो, कि अवं सेमझ़ी कि तेरे अलावा तैस छुटानेरू हक होरि कोन्ची भी नईं, ते तेरे बाद अवं आईं।" तैनी ज़ोवं, "अवं तैस छुटेइलो।" 5 फिरी बोअज तैस सेइं ज़ोने लगो, "ज़ैखन तू तैस ज़मीनी नाओमी करां घिन्तां नेस, त तै रूत मोआबी ज़ै मुओरे एलीमेलेकेरी नुश ते मुओरे महलोनेरी कौन्शे तैना भी एप्पु कां रेखनी पेनिन, कि मुओरे केरू नवं तैस तैन केरे हिस्से मां च़लतू राए।" 6 तैखन छुटानेबालो भियाल ज़ोने लगो, "अवं तैस छुटेई न सेखी, किजोकि कोन्च एरू न भोए मेरे अपने बच्‍चे अपने ज़मीनरे बारस न भोइ बटन। एल्हेरेलेइ मेरे छुटानेरू हक तू ने, किजोकि अवं तैस छुटेई न सेखी।"

7 तैस वक्ते मां इस्राएले मां छुटानेरे ते किछ बदलनू भोए तैसेरे बारे मां सारू पक्‍कू केरनेरे लेई ई रुवाज़ थियो, कि मैन्हु अपनि जुट्टी* खोलतां होरि कां देतो थियो। इस्राएले मां साबत एन्च़रे सेइं भोतू थियूं। 8 एल्हेरेलेइ तैनी छुटानेबाले बोअजे सेइं एन ज़ोवं, "कि तू तैस घिन्तां ने," ते तैनी अपनि जुट्टी खोलतां तैसेरे हवाले की। 9 तैखन बोअजे बुज़ुर्ग लोकन ते सारे लोकन सेइं ज़ोवं, "कि तुस अज़ एस गल्‍लरे गवाहथ कि ज़ैन किछ एलीमेलेक ते ज़ैन किछ किल्योन ते महलोनेरू थियूं, तैन सब किछ अवं नाओमी करां घिन्तां नेने लगोरोईं। 10 फिरी महलोनेरी विधवा रूत मोआबी भी अवं अपनि कौन्श बनानेरे लेई एस इरादे सेइं कबूल केरने लगोरोईं, कि मुओरेरू नवं तैसेरे अपने हिस्से पुड़ च़लतू राए, कोन्च एरू न भोए कि मुओरेरू नवं तैसेरे ढ्लान मरां ते नगरे मरां मिटी गाए; तुस लोक अज़ गवाह भोवरेथ।" 11 तैखन नगरेरे फाटके पुड़ ज़ेत्रे लोक बिश्शोरे थिये तैनेईं ते बुज़ुर्ग लोकेईं ज़ोवं, "अस गवाह अहम। ई कौन्श ज़ै तेरे घरे मां एवरीए तैस सेइं यहोवा इस्राएलेरे खानदाने मां उपजाने बैली राहेल ते लिआरो* ज़ेरो सलूख केरे। ते तू एप्राता गोट्ले मां बहदरी केरस, ते बैतलहम नगरे मां तेरू बड़ू नवं भोए। 12 ते ज़ै औलाद यहोवा एस जुवान कौन्शरे ज़िरिये पैदा केरे तैसारे वजाई सेइं तेरो घरानो पेरेसेरो* ज़ेरो भोइ गाए, ज़ै तामारी सेइं यहूदारे ज़िरिये पैदा भोव।"

13 तैखन बोअजे रूती सेइं ड्लाह बनाव। ते ज़ैखन तै तैस कां जेव तैखन यहोवारे दयाई सेइं तै दोज़ींती भोइ जेई, ते तैस अक मट्ठू भोवं। 14 तैखन बैतलहम नगरेरे कौन्शेइं नाओमी सेइं ज़ोवं, "यहोवा धने, ज़ैनी तू अज़ छुटानेबाले भियाले बगैर न छ़डी; इस्राएले मां एसेरू बड्डू नवं भोल्हु। 15 ते ई तेरे जानी मां जान आन्ने बालो ते तेरो बुढे बारे पालने बालो भोल्हो, किजोकि तेरी नुश ज़ै तीं सेइं प्यार केरतीए सत मट्ठन करां भी तेरे लेई जादे, ते तैसारू एन मट्ठू आहे।" 16 फिरी नाओमी तैस मट्ठे अपने कुम्मे मां रेखतां तैसेरी देखभाल केरने लगी। 17 ते तैसारी पड़ोसन कौन्शां एन ज़ोने लेग्गी, "नाओमी अक मट्ठू पैदा भोवरूए।" ते तैनेईं मट्ठेरू नवं ओबेद रख्खू। ज़ेसेरे मट्ठेरू नवं यिशै ते पोट्लड़ेरू नवं दाऊद थियूं।

18 पेरेसेरी खानदानी ईए, पेरेसेरू मट्ठू हेस्रोन, 19 ते हेस्रोनेरू राम, ते रामेरू अम्मीनादाब, 20 ते अम्मीनादाबेरू नहशोन, ते नहशोनेरू सलमोन, 21 ते सलमोनेरू बोअज, ते बोअजेरो ओबेद, 22 ते ओबेदेरू यिशै, ते यिशैरू मट्ठू दाऊद* भोव।✝