1 Beeka mbi kwyɛl Zɛɛb Sɛɛg di nɛ yɛ nɛ nena ɛ, mɛkwyɛla mɛ tak ɛ di esa náá, mena djóoaaka bɔn ɛ Zɛɛb. Tin, nɛ tsɛɛtsɛ menaka ɛ́ bɔn bɛ. Deenek, bot ɛ bɔs’ak nabɛ ɛ́ ààgu mena, dum nɛ tɛp tak ɛ bɛ di ààgu nyɛy Zɛɛb. 2 Bɛwɛn bam mɛ di ekwyɛl ɔ, mena mooka mos ɛ bɔn ɛ Zɛɛb. Tin, Zɛɛb dinaa ààpalyaal mena sa mena aadika djɛmɛn ɛ. Bela náá, mena nɛ guka náá, é ghɛŋ Klisto aatuula ɛ, mena aadika ɛ́ tyee wat nɛ nɛ. Deenek, etɛɛ náá, mena waabeeka nyɛ dáa nyɛ di ɛ. 3 Tin, bot djas di ewa kɔkɔ mbi yenek ɛbwaalel nɛ Klisto ɔ, tokapɛ si bhel mesyem. Tin, nyɛ moo ɛ́ dɛɛ, dáa Klisto nyɛ ɛmet di dɛɛ ɛ.

4 Bot djas di esa mesyem ɔ, bɛ ààpalooba nɛ etsi e Zɛɛb. Etɛɛ náá, ɛsa mesyem ɛ́ ɛbyen ɛlooba nɛ etsi. 5 Deenek, bi nɛ gu ɛnyɔɛpe náá, Yezu Klisto naazetuula étɛp ɛdis ɛ mesyem, nyɛ tok nɛ mesyem tɔ lɛ. 6 Tin, mot di ekɛ sama wat nɛ Yezu Klisto ɔ, nyɛ kat ɛsa mesyem. É di’enek, mot ɛ di esa mesyem ɔɔ, ye lyaal ɛ́ náá nyɛ nabɛ ɛ́ ààbee nyɛ, ààkogu nyɛ guak.

7 Bɔn bam, sa bi ààbet náá mot diibal bin. Tin, mot di ekɛ tɔ epiki ɔ, nyɛ ɛ́ piki mot, dáa Yezu nyɛ ɛmet di piki ɛ. 8 Tin, mot di ekɛ tɔ ɛsyem ɔ, nyɛ ɛ́ mɔn dim mot mɛkɔŋ, etɛɛ náá, dim mot mɛkɔŋ nakan ɛsyem ɛ́ é mɛkɛn mɛ bhwak. É di’enek, Yezu Mɔn ɛ Zɛɛb natuula ɛ́, étɛp ɛzɛpul embee mɛsa mɛ dim mot mɛkɔŋ. 9 Mot di náá, nyɛ moo ɛ́ tɛtɛ mɔn ɛ Zɛɛb ɔ, nyɛ kat ɛsyem, etɛɛ náá, tsik ɛ Zɛɛb moo ɛ́ tɔ lɛ. Dáa di náá Zɛɛb ɛ́ Sɛɛg ɛ, yɛ ààgoka náá, nyɛ baakɛ tɔ mesyem. 10 Beeka sa di ewa mbɛk popoopwon pak bɔn ɛ Zɛɛb nɛ bɔn ɛ dim mot mɛkɔŋ ɛ: Mot di ààkwyɛl mɔn-nyɛɛg ɔ nɛghu ààkɛ tɔ epiki ɔ, nyɛ tok mɔn ɛ Zɛɛb.

11 Tin, beeka mɛlyo mɛ bi nagwak é mɛkɛn ɛ: Djhookwyɛlaka pak’ena. 12 Sa mena ààdika dáa mot di edjóoaa Kayin ɛ, nyɛ nadi ɛ́ mɔn ɛ Mbee Mot, nyɛ naagó mɔn-nyɛɛg. Haaa étɛp yé nyɛ nagó nyɛ? Ye nabɛ ɛ́, etɛɛ náá, nyɛ nabɛ ɛ́ nɛ embee mɛsa. Tin, yii mɔn-nyɛɛg nadi ɛ́ mɛsa mɛ epiki.

13 Bɔn-nyɛɛg bam, sa bi ààdjoka, yɛ bɛ náá bot ɛ bɔs’ak ɛpebhina bin ɔɔ. 14 Tin, mena nɛ guka náá, mena eezedus tɔ ɛsyee, mena moo ɛ́ tɔ tsik. Mena nɛ guka yɛ, etɛɛ náá, mena nɛ kwyɛlka bɔn-nyɛɛg bina. Deenek, mot di ààdi tɔ kwyɛl ɔ, nyɛ ɛ́ si ghwyil ɛsyee. 15 Tin, mot di ebhina mɔn-nyɛɛg ɔ, nyɛ ɛ́ dáa mot di egó bot ɔ. Deenek, bi nɛ gu náá, bot ɛ di egó bot ɔ, bɛ tok nɛ ghwyil ɛbela tsik na kɔm-kɔm.

16 Beeka dáa mena di egu tyee mena di egoka nɛ ɛkwyɛl bɔɔ bɛsɔ bina ɛ: Yezu Klisto naadjɛ tsik’ɛ kɔ ɛsu ɛ lena. Deenek, ye goka ɛ́ náá, menabɛlka pe baadjɛ tsik’enaka étɛp bɔn-nyɛɛg bina. 17 Tin, mot ɛ di nɛ mɛvu mɛ bɔs’ak, da nyɛ ɛ́ bee mɔn-nyɛɛg ezuk, nyɛy ààgek nyɛ ghoŋ ɔɔ, nyɛ aake náá, nyɛ nɛ kwyɛl Zɛɛb dáa? 18 Bɔn bam, mɛkwyɛla mɛ mena di ekwyɛlaka ɛ, sa yɛ ààdi yii mɛkpa mɛ nuub nɛghu yii elɛŋ toto, ye goka ɛ́ mena lyaal tɛtɛ mɛkwyɛla tɔ esesɛɛ binaka.

19 Beeka dáa mena aaguka náá, menaka ɛ́ bot ɛ etsɛɛtsɛ ɛ. Beeka dáa elyem binaka aasila é mis ɛ Zɛɛb ɛ. 20 Ye nakoozodi náá, elyem bina ɛpedjɛ mena mɛbɛ, mena nɛ guka náá, Zɛɛb eedhaa elyem bina nɛ mɛbɔk, nyɛ nɛ gu etɛp djas. 21 Tin, bɔn-nyɛɛg bam mɛ di ekwyɛl ɔ, yɛ bɛ náá elyem bina ààpadjɛ mena mɛbɛ ɔɔ, deenek, mena ɛ́ nɛ ghwyil ɛdi nɛ ɛbwaalel nɛ Zɛɛb. 22 É di’enek, nyɛ nɛ djɛ mena esa djas ee mena di ewaab nɛ nɛ ɛ, etɛɛ náá, mena nɛ looba nɛ mɛtiŋ mɛ, mena nɛ sa esa ee nyɛ di emyaala nɛ yɛ ɛ. 23 Beeka ɛtiŋ ɛ nyɛ nadjɛ mena ɛ, yɛ ɛ́ náá, mena goka ɛ́ nɛ ɛdum koŋ nɛ din ɛ Mɔn’ɛ Yezu Klisto, da mena ɛ́ kwyɛlaka pak’enaka dáa Klisto nalɛɛ mena ɛ. 24 Tin, mot di elooba nɛ mɛtiŋ ɛ Zɛɛb ɔ, nyɛ kɛ ɛ́ sama wat nɛ Zɛɛb, tin, Zɛɛb ɛ́ tɔ lɛ. Beea dáa mena di eguka náá Zɛɛb ɛ́ tɔ lena ɛ: Yɛ ɛ́ kɔ ɛsu ɛ Sisim na Dɛɛ nyɛ djɛ mena ɛ.