1 Mot di emyaal náá, Yezu ɛ́ Klisto ɔ, mot tak ɛ́ mɔn ɛ Zɛɛb. Tin, mot ɛ di ekwyɛl Zɛɛb Sɛɛg ɔɔ, nyɛ baakwyɛl ɛ dɔɔ nɛ Mɔn'ɛ. 2 Beeka dáa mena di egoka nɛ ɛgu náá, mena nɛ kwyɛl bɔn ɛ Zɛɛb ɛ: Yɛ ɛ́ é ghɛŋ mena di ekwyɛl Zɛɛb nɛ ɛbaal ɛ mɛtiŋ mɛ ɛ. 3 Etɛɛ náá, ɛkwyɛl Zɛɛb ɛ́ ɛlooba nɛ mɛtiŋ mɛ. É di'enek, mɛtiŋ mɛ tak tok nɛ mezuk, 4 etɛɛ náá, bɔn ɛ Zɛɛb djas ɛ́ bot ɛ zekwak esa e bɔs'ak ɔ. Tin, sa di esa náá, bot kwak esa e bɔs'ak ɛ, yɛ ɛ́ ɛdum ɛ koŋ ɛ lena nɛ Zɛɛb. 5 Ɛzɛ aakwak esa e bɔs'ak? Yɛ ɛ́ mot di nɛ ɛmyaal náá, Yezu ɛ́ Mɔn ɛ Zɛɛb ɔ.

6 Yezu Klisto ɛ́ mot natuula kɔ bɔs'ak ɔ, nyɛ nani tɔ mɛdii ɛ́ é sok nyɛ nadi eduwa Zɛɛb ɛ. Ghiya yɛ naasee é ɛsyee ɛ lɛ. Nyɛ nabɛ ɛ́ ààzyɛ nɛ mɛdii nɛ mɛdii toto, nyɛ nabaazyɛ ɛ́ nɛ ghiya. Tin, Sisim na Dɛɛ ɛpelɛɛ náá, yɛ ɛ́ tsɛɛtsɛ, etɛɛ náá, Sisim ɛ́ etsɛɛtsɛ. 7 Deenek, yɛ ɛ́ nɛ bɛtyaasɛs ɛlɛl: 8 Yɛ ɛ́ Sisim na Dɛɛ, mɛdii zɛnɔɔ ghiya. Deenek, bɔɔ djas bɛlɛl nɛ gwakel. 9 Mena nɛ myaalka etɛp ee bot di ekaada mena ɛ, ghuna yii Zɛɛb di ebaŋa bot ɛ, yɛ ɛ́ nɛ boo mɛgham dhaa tyɛ. Yɛ ɛ́ sa nyɛ nabaŋa bot dum nɛ Mɔn'ɛ ɛ.

10 Mot di edum koŋ nɛ Mɔn ɛ Zɛɛb ɔ, mot tak nɛ gu etsɛɛtsɛ e etɛp nakaadaa nyɛ ɛ, tɔ lyem. Tin, mot di ààdum koŋ nɛ Zɛɛb ɔ, nyɛ bee ɛ́ náá, Zɛɛb ɛ́ mot etsal, etɛɛ náá, nyɛ ààmyaal etɛp ee Zɛɛb nakaada bot dum nɛ Mɔn'ɛ ɛ. 11 Beea lɛŋ nakaadaa mena ɛ: Zɛɛb naadjɛ mena tsik na kɔm-kɔm, tsik tak ɛ́ tɔ Mɔn'ɛ. 12 Mot di ekɛ sama wat nɛ Mɔn ɔ, nyɛ ɛ́ nɛ tsik tak. Tin, mot di ààkɛ sama wat nɛ Mɔn ɛ Zɛɛb ɔ, nyɛ tok nɛ tsik tak.

13 Mɛ kwyal bin etɛp bak ɛ́, étɛp bi neegu náá, bi ɛ́ nɛ tsik na kɔm-kɔm, biyɔ bot ɛ di edum koŋ nɛ Mɔn ɛ Zɛɛb ɔ. 14 Ɛbwaalel ɛ mena dika nɛ yɛ nɛ nɛ ɛ, yɛ ɛ́ náá, é sok mena di ewaab sonok tɔ ɛkwosak ɛ lɛ ɛ, nyɛ waagwak mena. 15 Ye goka ɛ́, mena guka náá, Zɛɛb nɛ gwak mendjaala mena, mena nɛ baamyaal nɛ tsɛɛtsɛ náá, mena ɛ́ waabelaka sa mena di ewaab nɛ nɛ ɛ.

16 Tin, mot ɛ bee mɔn-nyɛɛg esa mesyem di náá, yɛ aanàkɛswaala nɛ nɛ ɛsyee ɔɔ, nyɛ goka ɛ́ nyɛ djaala Zɛɛb étɛp mɔn-nyɛɛg'enɔk. É di'enek, Zɛɛb ɛ́ waadjɛ tsik nɛ mɔn-nyɛɛg tak. Yenek ɛ́ étɛp bot ɛ di náá mesyem aanàkɛswaala nɛ nɔɔ ɛsyee ɔ. Tin, yɛ ɛ́ nɛ syem wat di ekɛswaala nɛ ɛsyee ɛ, ye tok étɛp mbi yenek syem mɛ di eke náá, bɛ djaala nɛ Zɛɛb. 17 Embee mɛsa djas ɛ́ mesyem, tin, tɔ mesyem menek djas, yɛ ɛ́ nɛ mesyem mɛ di náá, yɛ aanàkɛswaala nɛ ɛsyee ɛ.

18 Mena nɛ guka náá, mot di náá, nyɛ ɛ́ mɔn ɛ Zɛɛb nɛ tsɛɛtsɛ ɔ, nyɛ tok nɛ ghwyil ɛbaasyem. Etɛɛ náá, Mɔn ɛ Zɛɛb ɛpebaal nyɛ, é di'enek, Mbee Mot tok nɛ ghwyil kɔ lɛ.

19 Mena nɛ guka náá, menaka ɛ́ bɔn ɛ Zɛɛb, deenek, bɔs'ak djas kɛ ɛ́ si bhel Mbee Mot.

20 Tin, mena nɛ guka náá, Mɔn ɛ Zɛɛb eezezyɛ, deenek nyɛ eedjɛ mena mɛtselal étɛp mena neeguka tɛtɛ Zɛɛb. Deenek menaka ɛ́ sama wat nɛ tɛtɛ Zɛɛb kɔ ɛsu ɛ Mɔn'ɛ Yezu Klisto. Yɛ ɛ́ nyɛy ɛ di Zɛɛb nɛ tsɛɛtsɛ, yɛ ɛ́ nyɛy ɛ di tsik na kɔm-kɔm.

21 Bɔn bam, kyeeka bɛzɛɛb ɛ bɛnaghisɛ!