1 Dɔɔ nɛ biyɔ boa, loobaka nɛ botom bin, etɛɛ náá, yɛ bɛ nɛ bɛdhiiti botom pak’ɔɔ di ààkwyɛl Mɛkpa ɛ Zɛɛb ɔɔ, bɛ needum koŋ nɛ Zɛɛb, ààbɛ kɔ ɛsu ɛ mɛkpa. Bɛ dum koŋ nɛ Zɛɛb ɛ, kɔ ɛsu ɛ embɛɛ mɛfulu mɛ bɛl bɔɔ. 2 Etɛɛ náá, bɛ waabee dáa etsik bin moo kɛ tɔ edɛɛ ɛ, nɛ dáa bi di elooba nɛ nɔɔ ɛ. 3 É di’enek, nàsaaka náá, bi di nɛ ɛghɛɛ nyel, é ɛkomsa mɛnyel étɛp ɛdi bɛnɛm ɛ boa, nɛ esonok dáa: Epyeeda elo, emayaka nalulaa nɛ lɔɔd ɛ, nɛghu ekaad e ghoŋ. 4 Tin, ye goka ɛ́ náá, enɛm bin di enɛm e lyem. Yɛ ɛ́ esa di elyaal náá, mot ɛ́ nɛ sisim mɛtela nɛ yii egwyem ɛ. Mbi yenek enɛm ɛ́ nɛ boo mɛtaŋ é mis ɛ Zɛɛb. 5 É ghɛŋ na mwa, yenek nabɛ ɛ́ enɛm e boa na dɛɛ, boa nadi ewa ɛbwaalel ɛ lɔɔ nɛ Zɛɛb ɛ. Bɛ nadi esesa deenek ɛ́, étɛp ɛlooba nɛ botom bɔɔ. 6 Tin, yɛ ɛ́ dáa moma di edjóoaa Saala ɛ, nyɛ nadi ɛ́ elooba nɛ ngom Abalaam, nyɛ nadi edjedjóo nyɛ ɛ́ nɛ din ɛ «ghɛŋ’am». Nenak yak, bi moo ɛ́ bɔn Saala, bi ɛ di esa enɛm esa ɔɔ, sa bi ààbem ba nɛ mot. 7 Tin, yɛ kabɛ biyɔ botom ɔɔ, bi goka ɛ́ nɛ ɛbe ɛ bɛl bin, ààdjisa náá, boa nɛ tsak dhaa biyɔ. Djɛka bɛ duu, etɛɛ náá bi nɛ bɛnɔɔ djas, bi ɛ́ waabela tɛtɛ tsik Zɛɛb nakɛk ɛ. É di’enek, bi ɛ sa deenek ɔɔ, ye tok nɛ dhiiti sonok ààlu mendjaala men.

8 Tin, ye goka ɛ́ náá, bi di nɛ esiiza nɛ ɛkwosak ɛ wat, dika nɛ kwyɛl pak’en dáa bɔn-nyɛɛg. Dika nɛ lyem ghoŋ, nɛ ɛdjɛel duu pak’en. 9 Sa bi aabulal ɛbiyo kɔ ɛbiyo, sa bi aabulal mɛlee kɔ mɛlee. Tin, yalaka, nɛ esɛɛa mɛtel etɛɛ náá, yɛ ɛ́ esɛɛa mɛtel mɛ Zɛɛb nakɛk bin, é sok nyɛ nadjóo bin ɛ. 10 Ekwyala na Dɛɛ lɛɛ ɛ́ náá:

«Mot di ekwyɛl ɛmyaala nɛ mbɛɛ tsik,

nɛ ɛbaamyaala nɛ ɛdi tɔ embɛɛ mɛlu ɔ,

mot tak ààgoka nɛ ɛlɛɛ elɛŋ etsal,

sa tɔ nuub mot tak ààwyisal elɛŋ e mɛkɔŋ.

11 Nyɛ goka ɛ́ nɛ ɛliig ɛ koŋ nɛ ɛbiyo,

nyɛ goka ɛ́ nɛ ɛsa enɛm esa,

nyɛ goka ɛ́ nɛ ɛwa zii tɔ ɛsɛɛga ɛ egwyem.

12 Etɛɛ náá, mis ɛ Ghɛŋ ɛ́ kɔ bot ɛ di ekɛ tɔ epiki ɔ.

Tin, Ghɛŋ ɛ́ ndjem étɛp ɛgwak mendjaala mɔɔ,

deenek, Ghɛŋ ààkwyɛl bot ɛ di esa ɛbiyo ɔ✝.»

13 Deenek, ɛzɛ aasa bin ɛbiyo, yɛ bɛ náá, bi nɛ sa enɛm esa nɛ lyem wat ɔɔ? 14 Tin, yɛ bɛ náá dhiiti dwoo bi ɛpezuk, étɛp enɛm esa ee bi nadi esa ɔɔ, yɛ ɛ́ tin ɛ mɛvu étɛp’en. É di’enek, sa bi ààdi nɛ bwoo nɛ bot, sa bi ààdi zɛm-zɛm✝. 15 Tin, guka tɔ elyem bin náá, Klisto nyɛy ɛmet ɛ́ dɛɛ, nyɛy ɛ di Ghɛŋ yebɔ. É sok bɛ aadji bin náá, étɛp yé bi di nɛ ɛbwaalel ɔ, dika ndjem nɛ ɛdjɛ yebɔ taŋal. 16 Saka deenek nɛ ɛsila ɛ lyem, nɛ duu djas. Dika nɛ lyem sɛŋ. Deenek, bot ɛ di ebyak bin kɔ ɛsu ɛ embɛɛ mɛfulu men yii ekeletyɛ ɔɔ, bɛ waabela sen bhii mɛbhekel mɔɔ. 17 Yɛ bɛ náá, yɛ ɛ́ tɔ ɛkwosak ɛ Zɛɛb ɔɔ, ye nyɔ ɛ́ náá, mot zuk étɛp ɛsa enɛm esa, ààbɛ náá nyɛ zuk étɛp ɛsa ɛbiyo.

18 Deenek, Klisto nagwyɛ ɛ́ sok wat étɛp mesyem mɛ bot. Nyɛy mot nadi mot epiki ɔ, nyɛ nagwyɛ ɛ́, étɛp bot ɛ di ààdi bot ɛ epiki ɔ. Nyɛ nagwyɛ ɛ́, étɛp ɛbulal bin tɔ ɛgwakel nɛ Zɛɛb. Yɛ ɛ́ nyel’ɛ ɛ nyɛ naka étɛp bɛ neegó. Tin, Sisim na Dɛɛ nabɛ ɛ́ ye naagomal nyɛ bhis ɛsyee. 19 Tin, nyɛ naatɔ́ kɛtuud Mbɛɛ Bhaadal nɛ esisim e bot ɛ nazegwyɛ nadi tɔ membok ɔ. 20 É ghɛŋ na mwa, yɛ ɛ́ bot binɔk wat ɛ nadi ààlooba nɛ Zɛɛb, é ghɛŋ Zɛɛb nadi emaad tɔ bhwood ɛ, é ɛwala ɛ mot nɛ din Noe nadi esa boo mɛsuwa ɛ. Yɛ ɛ́ ba bim bot ɛ nani tɔ mɛsuwa mɛ tak. Yɛ ɛ́ bot ɛtɛn nɛ elɛl ɛ natsak é bhyoŋ. 21 Tin, mɛdii mɛ bhyoŋ tak kalyaal mos ɛ, ɛduwa Zɛɛb di etsik bin ɛ. Ɛduwa Zɛɛb tak tok étɛp ɛdis mendi di é mɛnyel men ɛ. Yɛ ɛ́ étɛp ɛwaab nɛ Zɛɛb náá, nyɛ sa náá, mena di nɛ elyem sɛŋ. Yɛ ɛ́ kɔ ɛsu ɛ Yezu Klisto mot naagomelaa pak myoŋ ɔ, ɛduwa Zɛɛb di edjɛ mena tsik. 22 Bhii tak, nyɛ naabyet tɔ́ tɔ gwoo, nyɛ ɛ́ moo mos ɛ́ ndiindel pɛ mbɔ eghɛŋ ɛ Zɛɛb. Nenak, efofop nɛ esisim, dɔɔ nɛ ghwyil mɛbwala di tɔ gwoo ɛ, bɛ ɛ́ si ghwyil’ɛ.