1 Yɛ ɛ́ mam Pɔl, nɛ Silas zɛnɔɔ Timote. Bis kwyal mɛkana mak ɛ, étɛp bot ɛ zɛɛga mendjaala ghaada Tesalonik, bot ɛ di edum koŋ nɛ Zɛɛb Sɛɛg’enaka nɛ Ghɛŋ Yezu Klisto ɔ.

2 Beta náá, Zɛɛb Sɛɛg’enaka nɛ Ghɛŋ Yezu Klisto sa bin enɛm nɛ embɛɛ nɛ ɛdjɛ bin egwyem!

3 Bɔn-nyɛɛg bam, bis goka ɛ́ nɛ ɛbulal bhɔɔ nɛ Zɛɛb mɛlu djas kɔ ɛsu ɛ len. Ye goka ɛ́ náá, bis sesa yɛ, etɛɛ náá, bis ɛpebee ɛdum ɛ koŋ ɛ len nɛ Zɛɛb ɛpetɔ́ sok, dɔɔ nɛ kwyɛl bi di nɛ yɛ pak’en ɛ, ɛpebyet mɛlu djas. 4 Yɛ ɛ́ étɛp tak ɛ bis di elii tɛp’en nɛ mɛbun djas tɔ ezɛɛga mendjaala, etɛɛ náá, bi ɛpesa zii tɔ ɛdum ɛ koŋ ɛ len nɛ Zɛɛb, ye nakoozodi mɛtiiga nɛ mezuk mɛ bi di eboma nɛ yɛ ɛ. 5 Tin, mezuk menek ɛpelyaal náá, Zɛɛb nɛ pɛ́ɛ bot tɔ epiki. Mezuk menek ɛ́ waasa náá, bi di bot ɛ di egoka nɛ ɛni tɔ Ɛyoŋ ɛ Zɛɛb bi di ezuk étɛp tak ɛ. 6 Nɛ tsɛɛtsɛ Zɛɛb ɛ́ piki, nyɛ waabulal mezuk nɛ bot ɛ di ezuk bin ɔ, 7 nɛ ɛdjɛ mɛwala nɛ biyɔ bot ɛ di ezuk ɔ, dɔɔ nɛ bisɔ pe. Tin, etɛp binek aasael ɛ é sok Ghɛŋ Yezu aatuula pɛ tɔ gwoo nɛ efofop bɛ e mɛbwala ɛ. 8 Tin, Ghɛŋ ɛ́ waatuula tɔ boo ngel du, étɛp ɛzɛwa bot ɛ di ebyen ɛgu ɛ Zɛɛb nɛ bot di ààlooba nɛ Mbɛɛ Bhaadal ɛ Ghɛŋ’enaka Yezu ɔ é feŋ. 9 Tin, feŋ yɔbɔ aadi ɛ́, na kɔm-kɔm ɛlyelɛpe, étɛp bɛ needi ɛtsetaɛpe nɛ Ghɛŋ, ɛtsetaɛpe nɛ mɛbwala mɛ duma yɛ. 10 Etɛp binek aasael ɛ́ dwoo Ghɛŋ aazyɛ ɛ. Bot ɛ edɛɛ djas ɛ́ waaduwal nyɛ, bot ɛ di edum koŋ nɛ nɛ ɔ waamyaala nɛ nɛ. Deenek, bi aadi ɛ́ tɔ lɔɔg bot ɛ tak, etɛɛ náá, bi naadum koŋ nɛ Mbɛɛ Bhaadal bis nagoola bin ɛ.

11 Yɛ ɛ́ étɛp tak ɛ, bis di ààkat ɛdjaala Zɛɛb kɔ ɛsu ɛ len. Bis ɛpedjaala nɛ Zɛɛb’es náá, nyɛ sa náá, bi kɛ dáa nyɛ nadjóo bin náá, bi kɛ ɛ. Tin, bis ɛpewaab náá, nɛ ghwyil mɛbwala mɛ, nyɛ kwyee bin étɛp bi neesa enɛm esa ee bi di ekwos ɛsa ɛ, nyɛ sa náá, ɛdum ɛ koŋ ɛ len nɛ Zɛɛb nyen tɔ mɛsa men djas bi di esa ɛ. 12 Deenek, din ɛ Ghɛŋ’enaka Yezu ɛ́ waabela duu kɔ ɛsu ɛ len, nyɛy pe ɛ́ waadjɛ bin duu. Yenek djas ɛ́ ɛkɛɛ enɛm nɛ embɛɛ Zɛɛb’es nɛ yii Ghɛŋ Yezu Klisto.