1 Bɔn-nyɛɛg, bi tok nɛ gwyes náá, bɛ kwyal mɛkana kɔ ɛsu ɛ ɛwala nɛ dwoo etɛp bak djas aasael ɛ. 2 Etɛɛ náá, biyɔ bɛmet nɛ gu ɛnyɔɛpe náá, dwoo Ghɛŋ aabula ɛ, yɛ aadi ɛ́ zaka. Tin, nyɛ aazyɛ ɛ́ é pum dáa mot djii. 3 É ghɛŋ bot aakeke náá: «Bis ɛ́ ɛnyɔɛpe, bis ɛ́ tɔ egwyem ɛ», é di'enek ɛ, mezuk aatuula kɔ lɔɔ zaka, dáa moma di egwak ɛbɛl ɛ. Tin, mot ngɔt aanàkwaadi kiid é mezuk menek. 4 Deenek, biyɔ bɔn-nyɛɛg, bi tok tɔ ghooghom, etɛɛ náá, dwoo tak neetuula bin zaka, dáa mot djii di etuula tɔ ndjaŋ ɛ. 5 Nɛ tsɛɛtsɛ biyɔ djas ɛ́ bot ɛ gwyɛ, bot ɛ mwos. Tin, mena tokeka bot ɛ pum, ààbɛ bot ɛ ghooghom. 6 Tin, sa mena ààdjaka egó dáa bɛdhiiti bot, mena goka ɛ́ nɛ ɛdi ɛ́ ndjem, nɛ ɛdi ɛ́ bot ɛ di edil elyem ɔ. 7 Bot ɛ́ di edja gɔ́ ɔ, bɛ dyeebadja gɔ́ ɛ́ é pum. Bot di edɛ mɛnyok ɔ, bɛ dyeebadi nɛ elangi e tak ɛ́ é pum. 8 Yɛ kabɛ menabɛlka bot ɛ mwos ɔɔ, mena gokaka ɛ́ nɛ ɛdi bot ɛ́ ɛdil ɛ lyem. Djhoonɔɔka ɛdum ɛ koŋ nɛ Zɛɛb, nɛ kwyɛl dáa ghun, da ɛbwaalel ɛ tsik ɛ́ di dáa kɔtɔ dɛɛb. 9 Deenek, Zɛɛb nabɛ ɛ́ ààdjóo mena étɛp nyɛ neepɛ́ɛ mena, tin, ye nabɛ ɛ́ étɛp mena needika nɛ tsik nɛ din ɛ Ghɛŋ'enaka Yezu Klisto. 10 Klisto nagwyɛ ɛ́ kɔ ɛsu ɛ lena, étɛp mena needika nɛ tsik sama nɛ nɛ ye nakoozodi náá, menaka ɛ́ ndjem, nɛghu menaka ɛ́ é egɔ́. 11 Djɛelka mɛghaaz nɛ ɛlyoel pak'en tɔ ɛdum ɛ koŋ nɛ Zɛɛb dáa bi di boozezyɛ nɛ ɛsesa ɛ.

12 Bɔn-nyɛɛg, bis waab nɛ nen náá, bi duwal bot ɛ di esa mɛsa pak'en ɔ, bot ɛ Ghɛŋ nalwom bɛ náá, bɛ djɛɛd bin nɛ ɛdul ɛ bin mɛlɔ ɔ. 13 Tin, lyaalka bɛ náá, bi nɛ looba nɛ nɔɔ, bi ɛ́ nɛ kwyɛl nɛ nɔɔ dhaa tyɛ, kɔ ɛsu ɛ mɛsa mɛ bɛ di esa ɛ. Dika tɔ egwyem pak'en.

14 Bɔn-nyɛɛg, bis ɛpedjɛ bin mɛghaaz náá: Dulka bɛtsak-bel ɛ bot mɛlɔ, djɛka bot ɛ di nɛ bwoo ɔ mɛghaaz, kwyeeka elɛtɛ e bot, dika nɛ ɛmaad ɛ lyem nɛ bot djas. 15 Bi ɛ́ kobaka, sa mot ààbulal ɛbiyo nɛ ɛbiyo. Tin, gheesaaka ɛsa enɛm esa pak'en dɔɔ nɛ bot djas.

16 Dika mɛlu djas tɔ mɛmyaala. 17 Djaalaka ngwyis, 18 bulalka bhɔɔ nɛ Zɛɛb é etɛp djas, yenek ɛ́ ɛkwosak ɛ Zɛɛb dum nɛ biyɔ, bot ɛ di tɔ ɛgwakel nɛ Yezu Klisto ɔ.

19 Sa bi ààlu Sisim na Dɛɛ náá, nyɛ sa mɛsa mɛ. 20 Sa bi ààdyamal mɛkpa mɛ bɛngoolel ɛ Mɛkpa ɛ Zɛɛb. 21 Tin, sɔska etɛp djas, da bi ɛ́ baal sa di nyɔ ɛ. 22 Tsetaka nɛ membi mɛ esa djas di ebiyo ɛ.

23 Beta náá, Zɛɛb nyɛy ɛmet mot di ɛsuk ɛ egwyem ɔ, sa náá, bi di tɔ edɛɛ nyel djas. Deenek, nyɛ baal esisim bin, elyem bin, dɔɔ nɛ mɛnyel men djas, étɛp bi needi ààbɛ nɛ ndjɛ, dwoo Ghɛŋ'enaka Yezu Klisto aabula ɛ. 24 Zɛɛb mot nadjóo bin ɔ, nyɛ waasa náá etɛp binek djas sael, etɛɛ náá, nyɛ ɛ́ sosoob.

25 Bɔn-nyɛɛg, djaalaka pe étɛp'es.

26 Swoselka pak'en nɛ mɛbeedela, dáa bɔn-nyɛɛg tɔ ɛdum ɛ koŋ nɛ Zɛɛb.

27 Deenek, mɛ ɛpedjaala nɛ nen nɛ din ɛ Ghɛŋ náá, bi laa mɛkana mak é mis mɛ bɔn-nyɛɛg bin djas tɔ ɛdum ɛ koŋ nɛ Zɛɛb.

28 Betka náá, enɛm nɛ embɛɛ Ghɛŋ'enaka Yezu Klisto di nɛ nen.