1 Yɛ ɛ́ mam Pɔl zɛnɔɔ Silas nɛ Timote. Bis kwyal mɛkana mak ɛ́ étɛp bot ɛ zɛɛga mendjaala mɛ ghaada Tesalonik, bot ɛ zedum koŋ nɛ Zɛɛb Sɛɛg'enaka nɛ Ghɛŋ'enaka Yezu Klisto ɔ. Beta náá, enɛm nɛ embɛɛ nɛ egwyem di nɛ nen!

2 Bis nɛ bulal bhɔɔ nɛ Zɛɛb mɛlu djas kɔ ɛsu ɛ len. É ghɛŋ bis di edjaala ɛ, bis nɛ baadjaala kɔ ɛsu ɛ biyɔ djas. 3 Sok bhwoob Zɛɛb Sɛɛg'enaka bis nɛ taala mɛlu djas dáa bi di ghiŋ tɔ ɛdum ɛ koŋ nɛ Zɛɛb, nɛ mɛsa mɛ kwyɛl, zɛnɔɔ ɛbwaalel bi di nɛ yɛ nɛ Ghɛŋ'enaka Yezu Klisto ɛ. 4 Bɔn-nyɛɛg, bis nɛ gu náá, Zɛɛb nɛ kwyɛl bin, nyɛ nasɛ́ɛ bin ɛ, étɛp bi needi bɛ. 5 Deenek, é sok bis nagoola bin Mbɛɛ Bhaadal ɛ, ye nabɛ ɛ́ ààbɛ mɛkpa nɛ mɛkpa toto. Tin, ye nabɛ ɛ́ nɛ ghwyil, nɛ Sisim na Dɛɛ dɔɔ nɛ ɛbwaalel djas. É sok mena nadika sama ɛ, bi nabee mɛfulu mɛ bis nadi nɛ yɛ kɔ ɛsu ɛ len ɛ. 6 Tin, bi naabaŋa mɛfulu mes, nɛ yii Ghɛŋ. Ye nakoozodi mezuk men, bi naabatamyaal Mɛkpa ɛ Zɛɛb nɛ mɛmyaala mɛ Sisim na Dɛɛ di edjɛ ɛ. 7 É di'enek, bi moo ɛ́ bot ɛ di náá, bot ɛ zedum koŋ nɛ Zɛɛb pɛ ghaada Masedwan nɛ bot ɛ ghaada Akayi aakadu mɛfulu mɔɔ ɛ. 8 Tin, yɛ ɛ́ kɔ kyee dik'en ɛ mɛkpa ɛ Ghɛŋ nakan ɛgoolaaa, deenek, ye naakɛ kɔ kyee dik Masedwan djas nɛ kyee dik Akayi. Tin, é edi djas, bot djas nɛ gu ɛdum ɛ koŋ ɛ len nɛ Zɛɛb, bis tok nɛ ghwyil ɛbaalii kɔ ɛsu ɛ tak. 9 Bot djas ɛpelii dáa bi nabe bis, é sok bis nadi pɛ yebɔ ɛ, nɛ dáa bi nakat ɛduwal ɛ́ bɛzɛɛb ɛ ekpaka-ekpaka e bɛnagisɛ, étɛp ɛdum ɛ koŋ nɛ Zɛɛb, nyɛy mot di tɛtɛ Zɛɛb, di nɛ tsik ɔ. 10 Tinaak, bi ɛpebwood náá, Mɔn'ɛ, mot di edus pɛ tɔ gwoo ɔ zyɛ. Mɔn'ɛ tak ɛ́ Yezu, mot Zɛɛb nagomal pak bot ɛ zegwyɛ ɔ. Yɛ ɛ́ Mɔn'ɛ tak ɛ kwaapɛk mena é epɛ́ɛ e Zɛɛb di ezyɛ ɛ.