1 Bɔn-nyɛɛg, bis naazelyaal bin dáa bi di egoka nɛ ɛkɛ, étɛp Zɛɛb neemyaala nɛ nen ɛ. Tsɛɛtsɛ, bi eezesa yɛ. Nenak, bis ɛpedjaala nɛ nen nɛ din ɛ Ghɛŋ Yezu, baasaka, dhaa-dhaŋak yii bi nadi esesa sok ɛ. 2 Tin, bi nɛ gu mɛlyo mɛ bis zedjɛ bin dum nɛ Ghɛŋ Yezu ɛ, ɛnyɔɛpe. 3 Gwakeka ɛkwosak ɛ Zɛɛb: Bi goka ɛ́ nɛ ɛdi bot ɛ́ na dɛɛ, sa bi ààdi tɔ membyam. 4 Deenek, mot nɛ mot gu ɛbaal ɛ nyel'ɛ tɔ edɛɛ nɛ duu djas. 5 Sa bi ààbet náá, embee mɛkwosak dhaa bin ghwyil, dáa bot ɛ di ààdi bot ɛ mbyak eYuda, bot ɛ di ààgu Zɛɛb ɔ. 6 Tin, tɔ etɛp bak, sa mot ààsa mɔn-nyɛɛg ɛbiyo, nɛghu ɛkɔɔ nyɛ. Ye nabɛ ɛ́ bis eelɛɛ bin, bis naadul bin mɛlɔ náá, Ghɛŋ ɛ́ waawa bot ɛ di esa membi mɛ etɛp binek ɔ é feŋ. 7 Tin, Zɛɛb nabɛ ɛ́ ààdjóo mena étɛp mena needika tɔ mɛzɔ. Ye nabɛ ɛ́ étɛp mena needika tɔ edɛɛ. 8 Yɛ ɛ́ étɛp tak ɛ mot di ebyen mɛlyo mak ɔ, nyɛ ààbyen mot. Tin, nyɛ byen ɛ́ Zɛɛb mot di edjɛ bin Sisim na Dɛɛ ɔ.

9 É di'enek, bi tok nɛ gwyes náá, bɛ kwyal bin mɛkana kɔ ɛsu ɛ kwyɛl pak'en. Etɛɛ náá, Zɛɛb naalyaal bin dáa bi di egoka nɛ ɛkwyɛla pak'en ɛ. 10 Kwyɛl tak ɛ́, bi di etel nɛ bɔn-nyɛɛg bin djas di tɔ Masedwan ɔ. Tin, bɔn-nyɛɛg bis, bis ɛpedjɛ bin mɛghaaz étɛp bi neebaasa dhaa yii bi nadi esesa sok ɛ. 11 Tin, saaka náá, bi di tɔ egwyem, waka lyem tɔ etɛp bin met, saka mɛsa nɛ mɛmbɔ men met, dáa bis naloolyo bin ɛ. 12 É di'enek, mɛfulu men é mis mɛ bot ɛ di ààdum koŋ nɛ Zɛɛb ɔ aasa náá, bɛ djɛ bin duu. Tin, bi aanàdi ɛbɛp, étɛp dhiiti mot.

13 Bɔn-nyɛɛg, ɛkwosak ɛ les ɛ́ náá, bi gu etsɛɛtsɛ kɔ ɛsu ɛ bot ɛ nazegwyɛ ɔ, etɛɛ náá, bi needi ààdi nɛ ghoŋ tɔ elyem dáa bɛdhiiti bot, bot ɛ di ààdi nɛ ɛbwaalel ɔ. 14 Bis nɛ ɛmyaal náá Yezu naagwyɛ, gom bhis ɛsyee. Tin, bis nabaamyaal náá, kɔ lo ɛ Yezu, Zɛɛb ɛ́ waagomal bot djas nazegwyɛ, bɔɔ edum koŋ nɛ Yezu ɔ.

15 Beeka sa bis di elyo bin dum nɛ mɛkpa ɛ Ghɛŋ ɛ. Ye tok náá, bot aalik nɛ tsik kɔ bɔs é ghɛŋ Ghɛŋ aazyɛ ɔ, yɛ ɛ́ bɔɔ ɛ kwaaleebyet tɔ́ tɔ gwoo, ɛsok nɛ bot ɛ nazegwyɛ ɔ. 16 É di'enek, bot waagwak boo tsim ekomanda, gwood boo kukuma efofop, zɛnɔɔ bham tɔŋ ɛ Zɛɛb. Tin, Ghɛŋ nyɛ ɛmet aasul tɔ gwoo. Deenek, bot ɛ nazegwyɛ, bɔɔ edum ɛ koŋ nɛ Klisto ɔ, bɔɔ ɛ́ kwaadi bot ɛ mɛkɛn é ɛgom. 17 Bhii tak, bot aadi nɛ tsik kɔ bɔs dwoo lɛɛg ɔ, bɛ waabyet sama nɛ bot ɛ nazegom bhis ɛsyee ɔ, tɔ́ tɔ gwoo, tɔ eguud pɛ ɛko étɛp ɛkɛboma nɛ Ghɛŋ. É di'enek, mena aakadika ɛ́ kɔm-kɔm sama nɛ Ghɛŋ. 18 Djɛelka mɛghaaz pak'en nɛ mɛkpa mak.