1 Biyɔ bɔn, bi moo ɛ́ tɔ ɛgwakel nɛ Ghɛŋ Yezu, bi goka ɛ́ nɛ ɛlooba nɛ bɛbyael bin, etɛɛ náá, deenek ɛ́ di ɛnyɔɛpe. 2 Ɛtiŋ ɛ mɛkɛn di ekɛ nɛ ekɛk ɛ, yɛ ɛ́ náá:

«Duwala soog nɛ nyoog,

3 étɛp wɔ needi tɔ mɛmyaala,

étɛp wɔ neebɔya kɔ ɛko ɛ bɔs.✝»

4 Biyɔ bɛsɛɛg ɛ bɔn, nàsaka náá, bɔn bin kpaa elyem. Tin, ye goka ɛ́ náá, bi wyel bɛ tɔ mbɛɛ mɛlyo nɛ ɛdul ɛ bɛ mɛlɔ, dum nɛ sa Ghɛŋ di ààkwyɛl ɛ.

5 Biyɔ bɛkwom ɛ bot, loobaka nɛ ekukuma bin kɔ ɛko ɛ bɔs tɔ mɛsila nɛ duu djas, nɛ lyem wat, dáa bi di elooba nɛ Klisto ɛ. 6 Yɛ ààgoka náá, mɛsa mɛ bi di esa ɛ zosael ɛnyɔɛpe é sok bɛ di nɛ mis kɔ len ɛ, etɛɛ náá, bɛ needuwal bin. Tin, ye goka ɛ́ náá, bi sa mɛsa nɛ lyem wat dáa Zɛɛb di ekwyɛl ɛ, etɛɛ náá, bi ɛ́ bɛkwom ɛ Klisto. 7 Saka mɛsa nɛ mbɛɛ lyem, ɛkɛɛ bi sa ɛ́ mɛsa ɛ Ghɛŋ. Nàsaka mɛsa ɛkɛɛ náá, bi sa ɛ́ mɛsa mɛ mot. 8 Guka náá, wɔ nakoozodi kwom mot, nɛghu mot di ààdi kwom ɔ, wɔ sa embɛɛ mɛsa ɔɔ, Ghɛŋ ɛ́ waadjɛ wɔ efute.

9 Biyɔ ekukuma, dika tyee wat nɛ ekwom bin, katka ɛbɛɛg bɛ. Guka náá, biyɔ nɛ ekwom bin, biyɔ djas ɛ́ bɔn ɛ boo Kukuma di tɔ gwoo ɔ. Nyɛy mot di tɔ gwoo ɔ, nyɛ ààwa mbɛk pak bot.

10 Ɛkpa ɛ mɛsik mam ɛ́ náá, dika nɛ ɛgwakel nɛ Ghɛŋ, saaka ghwyil’en tɔ lɛ, etɛɛ náá, nyɛ ɛ́ nɛ boo ghwyil. 11 Nɔɔka bɛghɛl ɛ Zɛɛb djas, etɛɛ náá, bi neepyet dwoo dim mot mɛkɔŋ aazɛkɔɔ bin ɛ. 12 Etɛɛ náá, tuub mena di duuka ɛ, ye tok tuub mena di eduu nɛ bot ɛ bɔs’ak ɛ. Mena duuka ɛ́ nɛ embee esisim ee di pɛ ɛko ɛ, nɛ yii di nɛ ghwyil ɛbuɛpe ɛ, nɛ ekukuma, dɔɔ nɛ mɛbwala mɛ di kɔ mbee bɔs’ak ɛ. 13 Étɛp tak ɛ, ye goka ɛ́ bi nɔɔ bɛghɛl ɛ Zɛɛb djas, etɛɛ náá, é ghɛŋ embee mɛlu aatuula ɛ, bi ɛ́ nɛ ghwyil ɛpyet sok bhwoob bot ɛ mɛbhuka men. Bhii bi aaduu ɛnyɔɛpe kɛkum mɛsik ɛ, bi ɛ́ waatyaa zik. Bhet ee esodja nadi elumla dɛɛb nɛ yɛ ɛ

14 Pyetka, etsɛɛtsɛ di nɛ nen dáa bhɛtɛ é kuu. Dika nɛ epiki dáa bot di ebɔt ghun ɛ. 15 Dika nɛ zii ɛgoola Mbɛɛ Bhaadal di edjɛ bot egwyem ɛ dáa mot di ebɔt ekoko é mɛko ɛ. 16 Gheedidika nɛ ɛdum ɛ koŋ nɛ Zɛɛb dáa sa di epeebal mot ɛ. Ye waasa náá, bi dimal du mɛkɔɔ mɛ Mbee mot. 17 Nɔɔka tsik nyɛ nadjɛ bin dáa kɔtɔ dɛɛb ɛ. Da bi ɛ́ baanɔɔ Mɛkpa ɛ Zɛɛb dáa pɛl Sisim na Dɛɛ. 18 É mɛwala djas, waabka nɛ Zɛɛb tɔ membi mɛ mendjaala djas, djaalaka nɛ Zɛɛb nɛ ghwyil ɛ Sisim’ɛ. Dika ndjem tɔ mendjaala, sa bi ààkat, gheedjaalaka Zɛɛb kɔ ɛsu ɛ bot ɛ zedum koŋ nɛ Zɛɛb ɔ djas. 19 Baadjaalaka Zɛɛb kɔ ɛsu ɛ lam, étɛp nyɛ needjɛ mɛ etɛtɛ mɛkpa mɛ di egoka nɛ ɛlóo é ghɛŋ mɛ di elii ɛ. Etɛɛ náá, mɛ neewyisal sa di syela tɔ Mbɛɛ Bhaadal ɛ, ààbɛ nɛ bwoo. 20 Ye nakoozobɛ náá, nenak mɛ ɛ́ é mbok, mɛ ɛ́ ngoola-ngoola ɛ Yezu Klisto, nyɛ nalwom mɛ ɛ́ étɛp mɛ neegoola Mbɛɛ Bhaadal. Djaalaka nɛ Zɛɛb kɔ ɛsu ɛ lam, etɛɛ náá, mɛ neegoola yɛ dáa ye di egoka ɛ.

21 Tisik mɔn-nyaagam mɛ dyeebakwyɛl ɔ, mot di esa mɛsa mɛ Ghɛŋ tɔ esosoob ɔ, nyɛ waalɛɛ bin dáa mɛ di ɛ, etɛɛ náá, bi neegu sa djas mɛ di esa ɛ. 22 Mɛ dhis bin nwyak ɛ́, étɛp nyɛ neezɛdjɛ bin menduk mes, nɛ ɛbaadjɛ bin mɛghaaz.

23 Beta náá, Zɛɛb Sɛɛg’ena nɛ Ghɛŋ Yezu Klisto djɛ biyɔ djas bɔn-nyɛɛg bam egwyem, nɛ kwyɛl dɔɔ nɛ ɛdum koŋ nɛ Zɛɛb! 24 Beta náá, enɛm nɛ embɛɛ e Zɛɛb di nɛ bot ɛ di ekwyɛl Ghɛŋ’enaka Yezu Klisto nɛ lyem wat ɔ!