1 Yɛ ɛ́ mam Pɔl, mot membok kɔ esu ɛ mɛsa mɛ mɛ di esa étɛp ɛ Yezu Klisto ɛ. Bis nɛ Timote mɔn-nyaag'am ɛ́ kwyal mɛkana mak. Bis kwyal mɛkana mak ɛ́ étɛp'ɔ, wɔy Filemɔ mɔn-nyɛɛg'es, bis dyeebakwyɛl ɛbuɛpe tɔ mɛsa mɛ Zɛɛb ɔ. 2 Bis kwyal ɛ́ bot ɛ zɛɛga mendjaala mɛ di esael tɔ ndjaŋ'ɔ yenek, zɛnɔɔ kɛl'ena Apiya, bɛ nɛ mɔn-nyɛɛg'ena Aatsipe, mot bis nɛ bɛnɔɔ di eduu tuub wat ɔ. 3 Beta náá, bi bela mbɛɛ bhwoob nɛ egwyem é mis ɛ Zɛɛb Sɛɛg'enaka nɛ Ghɛŋ Yezu Klisto.

4 É sok djas mɛ di edjaala Zɛɛb ɛ, wɔy Filemɔ, mɛ nɛ djaala étɛp'ɔ, bhii tak, mɛ ɛpebulal bhɔɔ nɛ Zɛɛb kɔ ɛsu ɛ lɔ, 5 etɛɛ náá, mɛ ɛpegwak menduk mɛ ɛdum ɛ koŋ ɛ lɔ nɛ Ghɛŋ Yezu, zɛnɔɔ lyem kwyɛl wɔ di nɛ yɛ nɛ bot ɛ zedum koŋ nɛ Zɛɛb ɔ. 6 Mɛ waab nɛ Zɛɛb náá, ɛdum ɛ koŋ nɛ Zɛɛb di ewa ɛgwakel pak'ena ɛ, nyen tɔ tsik'ɔ. Etɛɛ náá, wɔ neegu ɛnyɔɛpe embɛɛ esa djas bis di nɛ yɛ, tɔ tsik'es nɛ Klisto ɛ. 7 Mɔn-nyɛɛg, mɛkwyɛla mɔ eedjɛ mɛ mɛmyaala nɛ mɛghaaz ɛbuɛpe etɛɛ náá, wɔ eedyeebadjɛ ghwyil nɛ ɛkwyee bot ɛ di edum koŋ nɛ Zɛɛb ɔ.

8 Mɛ ɛ́ nɛ sa wat di náá, mɛ ɛpekwyɛl ɛwaab nɛ nɔ ɛ: Dáa ye di náá, mɛ ɛ́ tɔ ɛgwakel nɛ Klisto ɛ, mɛ ɛ́ nɛ ghwyil ɛlwom wɔ, wɔ sa, sa mɛ di ekwyɛl náá, wɔ sa ɛ. 9 Tin, kɔ ɛsu ɛ mɛkwyɛla mɛ mena di nɛ yɛ ɛ, mɛ kwyɛl ɛ́ ɛwaab ze nɛ nɔ, mam Pɔl, tɔa-mot, baazɛbela náá, mɛ ɛ́ kɔɔla é membok kɔ esu ɛ din ɛ Yezu Klisto. 10 Mɛ eemɛt wɔ ɛboŋ kɔ ɛsu ɛ Onezim, mot di mɔn'am kɔ ɛsu ɛ ɛdum ɛ koŋ tɔ ndjaa membok wak ɔ. 11 É ghɛŋ sok, nyɛ nabɛ ɛ́ ààbɛ vaŋ mot é mis mɔ. Deenek, é dwoo pan mos'ak nyɛ moo ɛ́ nɛ boo mɛtaŋ dum nɛ ɛkwyee ɛ nyɛ di ekwyee wɔy nɛ mam ɛ.

12 Nenak yak, mɛ ɛpeswaal wɔ nwyak, wɔ goka ɛ́, wɔ bee nyɛ dáa dhiiti kyee nyel'am wat. 13 Mɛ nakwyɛl ɛ́ náá, nyɛ lik wak é ngwoob'am étɛp nyɛ neekwyee-kwyee mɛ é di yɔ pɛ pak mɛ di tɔ membok kɔ ɛsu ɛ Mbɛɛ Bhaadal'aak. 14 Tin, mɛ nabɛ ààkwyɛl ɛsa dhiiti sonok ààpookodji wɔ. Mɛ nadi ekaab ɛ, yɛ ɛ́ zɛkɛdi tyee náá, enɛm esa ee wɔ aasa ɛ, di yii bhel. Etɛɛ náá, mot goka ɛ́ nɛ ɛsa enɛm esa ɛ́ nɛ lyem'ɛ met.

15 Yɛ ɛ́ nɛ ghwyil ɛdi náá, Onezim nadus wɔ é mɛmbɔ ɛ, étɛp ba ɛwala batsa, etɛɛ náá, nyɛ bula ɔɔ, nyɛ kabula ɛ́, bula wat na kɔm-kɔm. 16 Etɛɛ náá, kana dwoo pan mos'ak, wɔ aanàkabaabee nyɛ dáa kwom'ɔ. Beea nyɛ nɛ mɛtaŋ dhaa kwom, etɛɛ náá, nyɛ moo ɛ́ mɔn-nyɛɛg'ena, mot mena di ekwyɛl ɛbuɛpe ɔ. Nyɛ ɛ́ nɛ boo mɛtaŋ é mis mam nɛ é mis mɔ. Tin, ye goka ɛ́ náá, nyɛ di nɛ boo mɛtaŋ é mis mɔ dhaa-dhaŋak mam, etɛɛ náá, nyɛ ɛ́ kwom'ɔ, nyɛ ɛ́ pe ɛ́ mɔn-nyoog tɔ ɛdum ɛ koŋ nɛ Ghɛŋ.

17 Yɛ bɛ náá, wɔ ɛpeduwal mɛ dáa sɔ'ɔ ɔɔ, nɔŋa nyɛ dáa wɔ di ezyɛ nɛ ɛbee mɛ ɛ. 18 Yɛ bɛ náá, nyɛ naasa wɔ ɛbiyo ɔɔ, nɛghu nyɛ naakola wɔ dhiiti sonok ɔɔ, kɛla tɛp tak kɔ lo'am. Mɛ waatuud wɔ yɛ ɛ́ mam ɛmet. 19 Yɛ ɛ́ mam Pɔl, Mɛ kwyal mɛkana mak ɛ́ nɛ mbɔ'am met. É tɛp tak ɛ mɛ di elɛɛ náá: mam Pɔl, mɛ waatuud wɔ esa ee nyɛ nakola pɛ daa lɔ ɛ. Wɔ ààdjak náá, boo kola wɔ di nɛ yɛ nɛ nam mos ɛ́, yɛ ɛ́ tsik wɔ di nɛ yɛ yenek. 20 Yɛ ɛ́ deenek, mɔn-nyɛɛg, mɛ eekwyit wɔ mɛboŋ si, sa sa mɛ waab nɛ nɔ ɛ, kɔ ɛsu ɛ mɛkwyɛla mɛ mena di nɛ yɛ nɛ din ɛ Ghɛŋ ɛ. Mɛ kwyɛl ɛ́ wɔ sa náá, lyem'am di tɔ ghwyil nɛ din ɛ Klisto.

21 É ghɛŋ mɛ di ekwyal wɔ mɛkana mak ɛ, lyem'am ɛ́ nɛ ɛmyaal nɛ ɛbwaalel náá, wɔ aasa sa mɛ waab nɛ nɛ ɔ. Mɛ nɛ gu náá, wɔ aasa dhaa-dhaŋak yii mɛ ke náá, wɔ sa ɛ. 22 É di'enek wat, koobela mɛ dhɛŋ etɛɛ náá, ɛbwaalel ɛ lam ɛ́ náá, kɔ ɛsu ɛ mendjaala mɛ bi di edjaala étɛp'am ɛ, mɛ waabulelaa é mɛmbɔ men.

23 Epafalas, mot bis nɛ nɛ di é membok étɛp din ɛ Yezu Klisto ɔ, nyɛ eeswos wɔ, 24 zɛnɔɔ Malak, Aalistaalak, Dhemas nɛ Luk, bot ɛ bis nɛ bɛnɔɔ di esa mɛsa é di wat ɔ.

25 Betka náá, enɛm nɛ embɛɛ Ghɛŋ Yezu Klisto di tɔ esisim bin!