1 É ghɛŋ na mwa, Zɛɛb naalii nɛ bɛbhaab'enaka esok nɛ esok. Nyɛ naalii nɛ nɔɔ nɛ membi mɛ mɛzel djas tɔ enuub bɛngoolel ɛ Mɛkpa ɛ Zɛɛb, 2 tin, é mɛlu mɛ mɛsik mena dika mos'aak, nyɛ kalii nɛ nena ɛ́ tɔ nuub Mɔn'ɛ. Yɛ ɛ́ nyɛy ɛ di mot aalik nɛ esa djas ɔ, dum nɛ nɛ ɛ́ Zɛɛb nakus gwoo nɛ bɔs✝. 3 Yɛ ɛ́ Mɔn tak ɛ di mɛkas mɛ duma ɛ Zɛɛb. Yɛ ɛ́ nyɛy ɛ di elyaal dáa Zɛɛb di ɛ. Nyɛ ɛ́ di epyet esonok djas nɛ ghwyil mɛkpa mɛ nuub'ɛ. Bhii nyɛ nasilal ɛdis ɛ bot edhuud e mesyem mɔɔ ɛ, nyɛ naazɛnɔɔ nyel disi pɛ tɔ gwoo, pɛ mbɔ eghɛŋ ɛ Zɛɛb na-ghaa mɛbwala✝. 4 Zɛɛb naasa náá, Mɔn'ɛ di kɔ elo e efofop. Etɛɛ náá, nyɛ naadjɛ nyɛ boo din ɛ mɛbwala dhaa yii efofop.

5 Yɛ ɛ́ tsɛɛtsɛ náá, Zɛɛb dinaa ààpake nɛ dhiiti fofop'ɛ ngɔt náá:

«Yɛ ɛ́ wɔy ɛ di Mɔn'am, kana dwoo pan mos'ak,

mɛ ɛ́ Soog✝.»

Tin, nyɛ ààpakoke-keak nɛ dhiiti fofop náá:

«Mɛ waaboodi nɛ nɛ ɛ Sɛɛg,

nyɛ aadi nɛ nam ɛ́ Mɔn✝.»

6 Tin, é sok Zɛɛb nadhis Mɔn mɛgwyak mɛ kɔ bɔs ɛ, nyɛ nabɛ ɛ́, nyɛ naake náá:

«Efofop ɛ Zɛɛb djas goka ɛ́ nɛ ɛduwal ɛ́ nyɛ✝!»

7 Dum nɛ efofop, ye nabɛ ɛ́ Zɛɛb naake náá:

«Zɛɛb eesa náá, efofop bɛ di tyee epup.

Tin, nyɛ naasa náá, bot ɛ mɛsa mɛ di tyee ngel du✝.»

8 Tin, dum nɛ Mɔn, nyɛ naake náá:

«Zɛɛb, bóó mɛkoozi mɔ ɛ́ kɔm-kɔm sii nɛ kɔm.

Deenek, yɛ ɛ́ é ɛkɛ tɔ epiki ɛ wɔ di edjɛɛd ɛyoŋ ɛ lɔ.

9 Wɔ kwyɛl ɛ́ epiki, da wɔ ɛ́ bhina ɛbiyo,

dum nɛ tɛp tak ɛ, Zɛɛb Sɛɛg, Zɛɛb'ɔ natɔ wɔ étɛp wɔ di mot-mɛsa mɛ.

Nyɛ naso wɔ mul mɛ ebotan kɔ lo ɛ́ étɛp tak,

tɔ sama bɔn-nyoog djas, yɛ ɛ́ wɔy ɛ nyɛ nasɛ́ɛ✝.»

10 Zɛɛb naabaake náá:

«É mɛken tɔɔɔ, yɛ ɛ́ wɔy Ghɛŋ ɛ nakus bɔs,

dɔɔ nɛ wɔy ɛ́ nasa gwoo nɛ mɛmbɔ mɔ met.

11 Esonok binek djas aadi ɛ́ nɛ ɛsik,

yɛ ɛ́ kabɛ wɔy ɔ, wɔy aadi ɛ́ kɔm-kɔm.

Gwoo nɛ bɔs ɛ́ waapulel dáa ekaad.

12 Wɔ waabwaada bɛ dáa bɛ di ebwaada kaad ɛ,

deenek, wɔ waakaswoola bɛ ɛ́ dáa bot di eswoola ekaad é nyel ɛ.

Yɛ kabɛ wɔy ɔɔ, wɔy ààswoola, tsik'ɔ tok nɛ ɛsik✝.»

13 Zɛɛb nabɛ ɛ́ ààke nɛ dhiiti fofop'ɛ ngɔt náá:

«Da disi pɛ kyee mbɔ eghɛŋ bam,

kɛkum dwoo mɛ aasa náá, bot ɛ mɛbhuka mɔ di dáa poba wɔ di ekɛl mɛbɔ mɔ kɔ tak ɛ✝.»

14 Efofop ɛ́ bɛzɛ? Bɛ tok esisim di esa mɛsa mɛ Zɛɛb ɔ? Zɛɛb lwom bɛ ɛ́, étɛp bɛ neegheekwyee-kwyee bot aabela tsik na kɔm-kɔm ɔ.