1 Ɛbhɛŋ ɛ mɛkɛn nabɛ ɛ́ nɛ mɛtiŋ étɛp ɛduwal ɛ Zɛɛb, zɛnɔɔ pɛt ɛbhɛŋ kɔ bɔs. 2 É di'enek, pɛt wat na mɛtsek mɛmbá naasumaa. Ɛtsek ɛ mɛkɛn nadi edjóoaa ɛ́ «Di na Dɛɛ». Tɔ tak, ye nabɛ ɛ́ nɛ boo lama na mengel etɛn nɛ ebá, zɛnɔɔ emesa nɛ emapa ee bɛ di eka buwa nɛ Zɛɛb ɛ.Esa ee di tɔ Di na Dɛɛ ɛ

3 Bhii lɛmbɛ na pip-pip, ye nadi ɛ́ nɛ dhiiti dhɛŋ sis bɛ di edjóo «Di na Dɛɛ dhaa nyel ɛ». 4 Ye nadi ɛ́ nɛ dhiiti mɔɔ buku nasael nɛ lɔɔd, étɛp ɛdik ɛ epu ele na mbɛɛ mɛnuub, nɛ tot ɛbhɛŋ nasael nɛ lɔɔd ɛ. Tɔ tot ɛbhɛŋ ɛ tak, ye nabɛ ɛ́ nɛ loŋo nasael nɛ lɔɔd ɛ, ye nadi ɛ́ nɛ mapa nadi edus pɛ ɛko di edjóoaa «Man» ɛ, zɛnɔɔ suub ɛ Aalɔn, suub tak nadi ɛ́ ye moo nɛ bɔɔ eka é go é tak. Ye nabaabɛ ɛ́ nɛ epɛk e mɛkok nakwyalaa mɛtiŋ mɛ ɛbhɛŋ kɔ tak ɛ. 5 Kɔ tot ɛbhɛŋ ɛ tak, ye nabɛ ɛ́ nɛ dhiiti edjema nadi enɔŋel nɛ efofop e duma, nadi elyaal náá, Zɛɛb ɛ́ tinaak ɛ. Mɛbhap mɔɔ nadi ɛ́ elɛsa. Piyo mɛbhap mɛ tak nadi ɛ́ ebutal tot ɛbhɛŋ. Nenak, yak tok ɛwala di náá, mena sɔs etɛp binek djas.

6 É ghɛŋ ye nadi náá, esa binek djas nabɛ ɛ́ yɛ eezekoobelaa ɛ, bɛghaa-Zɛɛb nadi ɛ́ enini mɛlu djas tɔ ɛtsek ɛ mɛken pɛt ɛbhɛŋ, étɛp ɛkɛsa mɛsa mɔɔ. 7 Tin, tɔ ɛtsek ɛ ebá e pɛt, yɛ ɛ́ boo ghaa-Zɛɛb nyɛy ɛmet ɛ di nɛ ghwyil ɛni penek, nyɛ zoni penek ɛ́, sok wat tɔ mbu. Nyɛ goka nɛ ɛni penek ɛ́ nɛ ghiya tit yii nyɛ di eka Zɛɛb buwa, étɛp mesyem mɛ met nɛ yii bot ɛ. 8 É di'enek, Sisim na Dɛɛ ɛpelyaal náá, dáa ɛtsek ɛ mɛkɛn dinaa tin ɛ, ye lyaal ɛ́ náá, Di na Dɛɛ dhaa nyel dinaa ndiila. 9 Etɛp binek nɔŋel ɛ́ nɛ etɛp ee mena kadi ebee mos'aak. Ye kwyɛl ɛlyaal ɛ́ náá, esa ee mot di egwyena nɛ Zɛɛb ɛ, zɛnɔɔ ebuwa bɛtit ee mot di eka Zɛɛb yɛ ɛ, ye tok nɛ ghwyil ɛsa náá, lyem mot di esa mbi mendjaala menek ɔ, di sɛŋ. 10 Mɛtiŋ menek dum ɛ́ nɛ esa e dek, nɛ mɛnyok, zɛnɔɔ dáa mot di egoka nɛ ɛsa étɛp ɛdis edhuud ɛ. Yɛ ɛ́ mɛzel mɛ bot nazetawa nɛ ɛsa, kɛkum é ɛwala Zɛɛb nakoobal esonok djas ɛ.

11 Tin, Klisto nazyɛ ɛ́ dáa boo ghaa-Zɛɛb embɛɛ esa ee di kɔ ɛko ɛ bɔs ɛ. Nyɛ naani tɔ pɛt* di enyɔ dhaa tyɛ ɛ, pɛt di náá, yɛ eezedjala nɛ di tak ɛ, yii di náá, ye tok bot ɛ bɔs nasum ɛ. Bela náá, pɛt tak tok kɔ bhwak nakusaa-kusak ɛ. 12 É ghɛŋ Klisto nani-niak wat na kɔm-kɔm tɔ Di na Dɛɛ dhaa nyel ɛ, nyɛ nabɛ ɛ́ ààka buwa ghiya ngom taa nɛghu yii mɔn ngɔmbɛ. Tin, nyɛ naka ɛ́ ghiya yɛ met, da pɛk mena sok wat ekeekeee tɔ mesyem mena. 13 Ghiya engom e engɔmbɛ nɛ engom e etaa nɛghu mɛsii mɛ engɔmbɛ zedikaa, yii bɛ nadi emwam kɔ bot ɛ di nɛ edhuud ɔ, yɛ ɛ́ étɛp ye needis bɛ edhuud, nɛ étɛp ɛbulal ɛgwakel ɛ lɔɔ nɛ Zɛɛb. 14 Yɛ bɛ náá, yɛ ɛ́ deenek ɔɔ, ghiya ɛ Klisto eedhaa yenek boo dhaŋak. Nɛ ghwyil Sisim na Dɛɛ, Klisto eeka nyel'ɛ met nɛ Zɛɛb dáa tɛtɛ buwa di ààbɛ nɛ djam ɛ. Ghiya yɛ ɛ waagwyii elyem ee zepulel nɛ embee mɛsa mɛ di edul mena tɔ ɛsyee ɛ, étɛp mena neesaka mɛsa mɛ Zɛɛb, mot di nɛ tsik ɔ.

15 Dum nɛ tɛp tak ɛ́ di náá, Klisto ɛ́ di mot di eduula pak Zɛɛb nɛ bot tɔ ɛbhɛŋ na bes ɔ. Etɛɛ náá, bot ɛ Zɛɛb nazedjóo ɔ, neebela esa e lyak na kɔm-kɔm ee nyɛ nakɛk bɛ ɛ. Tin, bɛ aabela yɛ ɛ́, dum nɛ ɛsyee ɛ mot ngɔt nagwyɛ ɔ. Kɔ ɛsu ɛ tak ɛ́, bot ɛ bɔs moo mos pɛka tɔ mesyem mɛ bɛ nasa si ɛbhɛŋ ɛ na mwa ɛ.

16 É di di náá, mɛkana mɛ mɛlik naalikaa ɔ, ye goka ɛ́ náá, ye lyaalaa náá, mot nakwyal mɛkana mɛ mɛlik mɛ tak ɔ, naazegwyɛ. 17 É di'enek, mɛkana mɛ mɛlik ààval dhiiti sonok, yɛ bɛ náá mot kwyal yɛ ɔɔ, dinaa nɛ tsik ɔ. Tin, ye val ɛ́, yɛ ɛ́ bɛ náá, mot nakwyal yɛ ɔɔ, nyɛ eezekpaa nɛ mɛsyee, gwyɛ ɔ. 18 Dum nɛ tɛp tak ɛ́ di náá, ɛbhɛŋ mɛkɛn nabɛ ɛ́ ààval sonok, ɛsok nɛ ghiya nɛ see. 19 Moiiz napookokan sok ɛ́ ɛlaa mɛtiŋ é mis mɛ bot djas, dáa ye nazodjɛaa nyɛ ɛ. Bhii tak, wɔ gwaa, nyɛ zɛnɔɔ ghiya yii ngom e etaa nɛ yii bɔɔ engɔmbɛ, dɔɔ nɛ mɛdii, myek yɛ kɔ mɛkana mɛ etsi dɔɔ nɛ é mɛnyel mɛ bot djas. Nyɛ naanɔɔ lɛɛ le di edjóoaa Izop ɛ, nɛ mɔɔ pes kaad na tɔɔbelaa tiŋal é tak, étɛp ɛduu tɔ ghiya, da myek yɛ. 20 Nyɛ naake náá: «Yak ɛ́ wak ɛ́ ghiya di elyaal ɛbhɛŋ ɛ Zɛɛb djɛ bin náá, bi duwal ɛ✝.» 21 Moiiz naabaamyek ghiya kɔ pɛt ɛbhɛŋ, nɛ kɔ esa djas di ebeaa étɛp ɛsa mɛsa mɛ Zɛɛb ɛ. 22 Etsi lɛɛ ɛ́ náá, bɛ dis edhuud é esonok djas ɛ́ nɛ ghiya. Deenek, ye tok nɛ mot di nɛ ghwyil ɛbela ɛpelak mesyem yɛ bɛ náá, ghiya ààpasee ɔɔ.

23 Yɛ bɛ náá, embaŋa-mbaŋa e esa ee di pɛ tɔ gwoo ɛ goka ɛ́ nɛ ɛdisaa edhuud ɛ deenek ɔɔ, é di'enek, esa ee di pɛ tɔ gwoo ɔ, yɛ ɛ́ nɛ gwyes buwa di nɛ boo mɛtaŋ ɛ. 24 Etɛɛ náá, Klisto nabɛ ɛ́ ààni tɔ Di na Dɛɛ di náá, bot ɛ bɔs ɛ́ nasa nɛ mɛmbɔ mɔɔ ɔ, é di di náá, yɛ ɛ́ mbaŋa-mbaŋa tɛtɛ Di na Dɛɛ ɔ. Tin, nyɛ nani ɛ́ tɔ gwoo, nyɛ ɛ́ sok bhwoob ɛ Zɛɛb étɛp'enaka. 25 Membu djas, boo ghaa-Zɛɛb bot ɛ mbyak eYuda dyeebani tɔ Di na Dɛɛ dhaa nyel ɛ́, nɛ ghiya tit. Tin, Klisto nabɛ ɛ́ ààni esok nɛ esok étɛp ɛkɛka nyel'ɛ buwa. 26 Yɛ ɛ́ pe bɛ náá, ye nasael ɛ́ deenek ɔɔ, pe Klisto nazuk ɛ́, esok nɛ esok kana bhwak nakusel ɛ. Nenak dáa ye di náá, bhwak moo ɛ́ pɛ mɛsik ɛ, Klisto nazotuula ɛ́ sok wat, nyɛ naaka nyel'ɛ met buwa, étɛp ɛpel ɛ́ mesyem. 27 Bot djas kɔ ɛko ɛ bɔs goka ɛ́ nɛ ɛgwyɛ sok wat, bhii tak, Zɛɛb ɛpɛ́ɛ bɛ. 28 Yɛ ɛ́ tyee wat dáa Klisto naka nyel'ɛ buwa étɛp ɛpel mbula mesyem mɛ bot ɛ bɔs ɛ. Tin, nyɛ waabaatuula-tuula sis, é sok yenek yɛ aanàkabaadi étɛp ɛpel ɛ́ mesyem. Deenek, yɛ aakadi ɛ́ étɛp ɛdjɛ tsik nɛ bot ɛ di egwaal ɛtuula ɛ lɛ ɔ.