1 Ɛdum ɛ koŋ nɛ Zɛɛb, yɛ ɛ́ ɛdi nɛ ɛbwaalel náá, sa wɔ di ebun ɛ, wɔ waabela yɛ. Yɛ ɛ́ ɛmyaal nɛ lyem wat náá, sa di ààbeeaa nɛ mis ɛ, yɛ ɛ́ tak nɛ tsɛɛtsɛ. 2 Yɛ ɛ́ dum nɛ ɛdum ɛ koŋ nɛ Zɛɛb ɛ, Zɛɛb namyaal bot ɛ na mwa.

3 Yɛ ɛ́ dum nɛ ɛdum ɛ koŋ nɛ Zɛɛb ɛ, bot di egu náá, bhwak nakusaa ɛ́ nɛ Mɛkpa ɛ Zɛɛb. Ye kwyɛl ɛlɛɛ ɛ́ náá, esa ee di beeaa ɛ nasael ɛ́ nɛ esa ee nadi ààbeeaa ɛ.

4 Yɛ ɛ́ dum nɛ ɛdum ɛ koŋ nɛ Zɛɛb ɛ, Abhɛl nadjɛ Zɛɛb esa e ɛgwyena dhaa yii mɔn-nyɛɛg Kayin. Yɛ ɛ́ dum nɛ ɛdum ɛ koŋ ɛ lɛ nɛ Zɛɛb ɛ, Zɛɛb nabee nyɛ dáa mot epiki, etɛɛ náá, Zɛɛb nyɛy nyɛ ɛmet naamyaala nɛ esa e ɛgwyena ɛ lɛ. Ye nakoozodi náá, Abhɛl naazegwyɛ, etɛp nyɛ nasa ɛ́ dinaa egék.

5 Yɛ ɛ́ dum nɛ ɛdum ɛ koŋ nɛ Zɛɛb ɛ, Enɔk nabyet tɔ́ pɛ tɔ gwoo, nyɛy ààgwyɛ. Tin, mot nabɛ ɛ́ ààkabaabela nyɛ, etɛɛ náá, Zɛɛb naaben nyɛ pɛ tɔ gwoo. Ekwyala lɛɛ ɛ́ náá, ɛsok nɛ nyɛ nɛ tɔ́ tɔ gwoo, Zɛɛb naamyaala nɛ nɛ, etɛɛ náá, nyɛ nadi esa Zɛɛb edjɔɔ é mis. 6 Bela náá, Zɛɛb tok nɛ ghwyil ɛbela edjɔɔ é mis nɛ mot di ààdum koŋ nɛ nɛ ɔ. Tin, mot di etiila pɛ daa Zɛɛb ɔ, nyɛ goka nɛ ɛmyaal náá, Zɛɛb ɛ́ tak. Nyɛ nɛ djɛ efute nɛ bot ɛ di esaa nyɛ ɔ.

7 Yɛ ɛ́ dum nɛ ɛdum koŋ nɛ Zɛɛb ɛ, Noe nagwak sa Zɛɛb nalɛɛ nyɛ, dum nɛ sa nadi náá yɛ aasael ɛ. Ye nabɛ ɛ́, bot dinaa ààbee sa tak. Nyɛ naadyeebawa lyem tɔ etɛp ee Zɛɛb nalɛɛ nyɛ ɛ. Nyɛy batasa mɛsuwa mɛ nyɛ natsik nyel'ɛ met nɛ bot ɛ mɛbyel mɛ ɛ. É sok nyɛ nasa deenek ɛ́, ye nabɛ ɛ́, nyɛ naakwyesal bot djas ndjɛ sɔs. É di'enek, dum nɛ ɛdum ɛ koŋ ɛ lɛ nɛ Zɛɛb, Zɛɛb naabee nyɛ dáa mot epiki.

8 Yɛ ɛ́ dum nɛ ɛdum koŋ nɛ Zɛɛb ɛ, Abalaam nalooba nɛ ndjóoel ɛ Zɛɛb é sok nyɛ nadjóo nyɛ ɛ. Wɔ gwaa, nyɛ zɛtɔ́ pɛ kyee dik Zɛɛb nakɛk náá, nyɛ aadjɛ nyɛ ɛ. Tin, nyɛ naazɛtɔ́, ààgu pɛ kyee nyɛ di etɔ́ ɛ. 9 Dum nɛ ɛdum ɛ koŋ ɛ lɛ nɛ Zɛɛb, nyɛ naadi tyee ndjoŋ kɔ kyee dik Zɛɛb nakɛk nyɛ ɛ. Tin, nyɛ nadidi ɛ́ pɛ tɔ epɛt, tyee wat nɛ Izak, zɛnɔɔ Zakɔɔb, bot ɛ nabela mbi ekɛk e tak wat ɔ. 10 Etɛɛ náá, Abalaam nadi ebwood ɛ́ boo ghaada di nɛ ghus-zumal na lyel-lyel ɛ. Ghaada di náá, Zɛɛb nyɛy ɛmet ɛ di mot di ekoobal dáa yɛ aasael ɛ, yɛ ɛ́ nyɛy nyɛ ɛmet di sumel tak.

11 Yɛ ɛ́ dum nɛ ɛdum koŋ nɛ Zɛɛb ɛ, Saala ye nakoozodi náá, nyɛ nabɛ ɛ́ kwyiid tɔ́a-moma, Zɛɛb naadjɛ nyɛ ghwyil ɛbela ɛbum, bya. Tin, nyɛ nabɛ ɛ́ nɛ boo ɛbwaalel náá, Zɛɛb ɛ́ sosoob nɛ ekɛk bɛ. 12 Étɛp tak ɛ bhaab'enaka ngɔt Abalaam di ɛsuk ɛ mɛbyel mɛ bot ɛbuɛpe, ye nakoozodi náá, nyɛ nabɛ ɛ́ nyɛ moo tɔa-mot, nyɛ eezekunaa nɛ ɛsyee. Bot ɛ mɛbyel mɛ tak bu ɛ́ dáa ekwyikwyen tɔ gwoo, nɛghu dáa bɛsyɛ é ɛboŋ ɛ boo dii mɛsɔn, mot tok nɛ ghwyil ɛlaa bɛ.

13 Bot binɔk djas nagwyɛ ɛ́, bɔɔ edum koŋ nɛ Zɛɛb, bɛ nagwyɛ ɛ́ ààbela ekɛk e Zɛɛb nakɛk bɛ ɛ. Tin, bɛ nazobee yɛ ɛ́ ɛtsetaɛpe, deenek, bɛ naamyaala nɛ yɛ. Bɛ naagu yɛ popoopwon náá, bɛ nabɛ ɛ́ bɛndjoŋ, ekpaa-goŋ kɔ bɔs. 14 Bot ɛ di elii deenek ɔ, bɛ lyaal popoopwon ɛ́ náá, bɛ ɛpesaa kyee dik di náá, yɛ aadi ɛ́ yɔbɔ ɛ. 15 Tin, bɛ ɛpedi etaala kyee dik bɛ nadus pɛ yiizaag ɔɔ, pe bɛ eezebela ze ɛsik ɛ́ penek. 16 Nɛ tsɛɛtsɛ, bɛ nakwyɛl ɛ́ mbɛɛ kyee dik di eedhaa yak ɛ, kyee dik di tɔ gwoo ɛ. Dum nɛ tɛp tak ɛ di náá, Zɛɛb tok nɛ sen ɛmyaal náá, nyɛ di Zɛɛb'ɔɔ. Tin, nyɛ eezekoobal bɛ tɛtɛ ghaada.

17 Yɛ ɛ́ dum nɛ ɛdum koŋ nɛ Zɛɛb ɛ, Abalaam naka Izak buwa, é ghɛŋ Zɛɛb nawa nyɛ tɔ mɛbhowal ɛ. Nyɛ nadi ɛ́ nyɛ moo babeega, étɛp ɛka sɛɛŋɛlɛ mɔn'ɛ ngɔt é buwa, dhi nyɛ di egu náá, nyɛ naabela ekɛk. 18 Zɛɛb naalɛɛ nɛ nɛ náá:

«Yɛ ɛ́ dum nɛ Izak ɛ wɔ aabela bɛdha ɛ mɛ nakɛk wɔ ɛ.»

19 Deenek, Abalaam nabɛ ɛ́ nɛ ɛbwaalel náá, Zɛɛb ɛ́ nɛ ghwyil ɛgomal Izak mɔn'ɛ pak myoŋ. Dum nɛ tɛp tak ɛ, Zɛɛb nabulal nyɛ mɔn tak. Tin, ye lyaal ɛ́ ɛkɛɛ Izak gomelaa ɛ́, pak bɛmyoŋ.

20 Dum nɛ ɛdum ɛ koŋ nɛ Zɛɛb, Izak naasɛɛ Zakɔɔb nɛ Ezau mɛtel, étɛp esa ee di eezyɛ pɛ sok ɛ.

21 Dum nɛ ɛdum ɛ koŋ nɛ Zɛɛb, Zakɔɔb naasɛɛ bɔn ɛ Zozɛf mɛtel, ɛsok nɛ nyɛ nɛ gwyɛ. Nyɛ nadi epyet nɛ suub étɛp ɛ́ ɛduwal ɛ Zɛɛb.

22 Dum nɛ ɛdum ɛ koŋ nɛ Zɛɛb, Zozɛf, ɛsok nɛ nyɛ nɛ gwyɛ, nyɛ naalɛɛ náá, bɔn ɛ Yisalaɛl ɛ́ waawyis tɔ dik Eziptɛ. Nyɛ naabaalɛɛ nɛ nɔɔ náá, bɛ wyis nɛ egwyes e nyel'ɛ.

23 Dum nɛ ɛdum ɛ koŋ nɛ Zɛɛb, sɛɛg nɛ nyɛɛg ɛ Moiiz naasyel nyɛ, edi bɛngɔn ɛlɛl bhis ɛbyel ɛ lɛ. É sok bɛ naabee náá, mɔn tɔlɔɔ tak nabɛ ɛ́ nɛm ɛ, bɛ nabɛ ɛ́ ààgwak bwoo ɛbyen ɛlooba nɛ mɛtiŋ mɛ Mɛkoozi Falaɔŋ.

24 Dum nɛ ɛdum koŋ nɛ Zɛɛb, é sok Moiiz nadi nyɛ moo boo-mot ɛ, nyɛ naabyen náá bɛ djóo nyɛ, mɔn ɛ ɛsyes ɛ Falaɔŋ. 25 Moiiz, naamyaal náá, nyɛ tiigaa sama wat nɛ bɔn ɛ Zɛɛb, nɛ náá, nyɛ di ɛ́ tɔ mɛmyaala mɛ etɛp e mesyem, mɛmyaala mɛ esa ee di ààbɔya ɛ. 26 Nyɛ nadi ebee ɛ́ náá, ɛdukaa dáa Klisto nadukaa ɛ́, yɛ eedhaa mɛvu djas di kɔ kyee dik Eziptɛ ɛ, nɛ boo mɛtaŋ. Etɛɛ náá, mis mɛ nadi egwyák ɛ́, efute bɛ yii di ezyɛ ɛ.

27 Dum nɛ ɛdum ɛ koŋ nɛ Zɛɛb, Moiiz naadus kɔ dik Eziptɛ, ààkaab ɛbuk ɛ Falaɔŋ. Nyɛ nabɛ ɛ́ ghiŋ tɔ ɛdum ɛ koŋ ɛ lɛ nɛ Zɛɛb ɛkɛɛ náá, nyɛ nadi ebee Zɛɛb, mot di ààbeeaa ɔ. 28 Dum nɛ ɛdum koŋ nɛ Zɛɛb, Moiiz naakus ɛbyoŋ ɛ pak. Tin, nyɛ naazɛke náá, bɛ lɔɔb ghiya é mɛbɛ mɛ mendjaa. Etɛɛ náá, é sok fofop ɛsyee aadhaŋ ɛ, nyɛ needi ààgó bɔn mɛgwyak mɛ bot ɛ mbyak Yisalaɛl.

29 Dum nɛ ɛdum koŋ nɛ Zɛɛb ɛ, bɔn ɛ Yisalaɛl nasɛɛ boo dii mɛsɔn na tɔɔbelaa nɛ mɛko mɔɔ, ɛkɛɛ ye nabɛ ɛ́ tɛtɛ gba bot di eezyɛ nɛ ɛdhaŋ ɛ. Tin, é sok bot ɛ Eziptɛ nawaabaŋaa bɛ ɛ, bɔɔ djas naasi bhɛɛɛ tɔ boo dii mɛsɔn.

30 Yɛ ɛ́ dum nɛ ɛdum koŋ nɛ Zɛɛb ɛ, eboo epap e ghaada Yeliko nabik, bhii bɔn ɛ Yisalaɛl nasa mɛlu mɛ etɛn nɛ ebá ekii ghaada ɛ.

31 Dum nɛ ɛdum ɛ koŋ nɛ Zɛɛb ɛ Layaab, moma mɛzɔ nadi ààgwyɛ sama nɛ bot nadi ààlooba nɛ Zɛɛb ɔ. Etɛɛ náá, nyɛ naasyel bɔn ɛ Yisalaɛl ɛnyɔɛpe, bot nazyɛ zɛbee ghaada tɔ sɔ ɔ. 32 Bi kwyɛl náá, mɛ baake dáa? Mɛ tok nɛ bɛtɛ nɛ ɛwala étɛp ɛkaada bin etɛp kɔ ɛsu ɛ Zedeɔŋ, Bhalak, Samsɔŋ, Zɛfete, nɛ Dhavid, zɛnɔɔ Samyɛl dɔɔ nɛ bɛdhiiti bɛngoolel ɛ Mɛkpa ɛ Zɛɛb. 33 Yɛ ɛ́ dum nɛ ɛdum koŋ nɛ Zɛɛb ɛ, bɛ nakwak mɛyoŋ, bɛ nakɛ tɔ epiki, bɛ nabela sa Zɛɛb nakɛk bɛ ɛ. Bɛ naadiyal bɛghee enuub, 34 bɛ naadimal eboo mu, bɛ naadus é eban e ɛsyee ɛ bɛ nadi ekwyɛl ɛgó bɛ nɛ epɛl ɛ, bɛ naabaabela ghwyil bhii mɛbɛ́, bɛ naalyaal ghwyil'ɔɔ, é sok bɛ nadi elumla dɛɛb ɛ, wɔ gwaa, bɛ sɔ esodja e edhiiti mɛdhik mɛ sis.

35 Dum nɛ ɛdum ɛ koŋ nɛ Zɛɛb, boa naabee dáa bot bɔɔ nazegwyɛ ɔ nagom ɛ.

Bɛdhiiti bot naatiigaa ɛlyelɛpe, bɔɔ gwyɛ. Bɛ naabyen mɛpɛka, étɛp ɛbela tɛtɛ tsik bhis ɛsyee. 36 Tin, bɛdhiiti naadukaa, biaa nɛ eghwyɛs, bak bɛdhiiti naakɔlaa nɛ ekel e ghwooz, waaa é membok. 37 Bɛdhiiti bot naagóaa nɛ mɛkok, syakaa ebil ebá, góaa nɛ epɛl. Bɛdhiiti bot nabɛ ɛ́ etɔ́ nɛ ɛtwol edi nɛ edi, ekaad bɔɔ nabɛ ɛ́ eket e etaa nɛ yii ebhata, bɛ nabɛ ɛ́ bɛdjel ɛ bot, bɛ nadi etiigaa nɛ ɛzukaa. 38 Bhwak nabɛ ɛ́ ààgoka nɛ mbi binɔk bot. Bɛ nadi ekɛ ghooghoŋ ɛbat-bat pɛ kyee mɛdhik bɛsyɛ di ààbɛ nɛ mɛdhii ɛ, nɛ pɛ kɔ mɛtsok. Bɛ nadi edjedjaasi ɛ́ tɔ egho e mɛkok dɔɔ nɛ tɔ ebhik di tɔ bɔs ɛ.

39 Zɛɛb naamyaal bot binɔk djas kɔ ɛsu ɛ ɛdum ɛ koŋ ɛ lɔɔ nɛ nɛ. Bela náá, bɛ nabɛ ɛ́ ààbela sa Zɛɛb nakɛk ɛ. 40 Tin, nɛ tsɛɛtsɛ, ye nabɛ ɛ́, Zɛɛb naazekobal mena sa di ɛnyɔɛpe nɛ nena ɛ. Tin, Zɛɛb nakwyɛl ɛ́ náá, bɛ di bot ɛ zedjala ɔ sama wat nɛ nena.