1 Yɛ kabɛ menabɛlka ɔɔ, menaka ɛ́ kuku bɛtɛ nɛ bɛtyaasɛs. Djhoodiska esa djas di esa náá, mena nàkɛka ɛnyɔɛpe ɛ, daŋ-daŋ ɛ mesyem mɛ mena di esesaka ngwyis ɛ. Tin, djhoopatka kaab di náá, mena waakaabka kɛkum pɛ ɛsik ɛ. 2 Mis mena goka ɛ́ nɛ ɛgwyák ɛ́ Yezu, nyɛy ɛ́ di esa náá, mena dika nɛ ɛdum ɛ koŋ nɛ Zɛɛb, nyɛy ɛ́ di baasa náá, ɛdum ɛ koŋ ɛ lena nɛ Zɛɛb kum di di edjala ɔ. Nyɛ naamyaal ɛgwyɛ kɔ mɛlaaba, ààgwak sen, etɛɛ náá, nyɛ nadi ɛ́ ebee mɛmyaala mɛ di ebwood nyɛ bhii tak ɛ. Nenak, nyɛ ɛ́ ndiindel pɛ mbɔ eghɛŋ bóó mɛkoozi Zɛɛb.

3 Taalaka nyɛ nɛ dáa nyɛ nazemaad swaka bot ɛ mesyem ɛ. Deenek, bi aanàbet náá, bi kwyeselaa, bi aanàbula pɛ bhis tɔ ɛdum ɛ koŋ nɛ Zɛɛb. 4 Etɛɛ náá, tuub bi di eduu nɛ syem ɛ, bi dinaa ààpaduu yɛ kɛmyaal náá, bi gwyɛ. 5 Bi eezedjisa mɛghaaz mɛ Zɛɛb di edjɛ bin dáa bɔn bɛ ɛ?

«Mɔn'am sa wɔ ààbyasal feŋ Ghɛŋ di ewa wɔ é tak ɛ,

é sok nyɛ di ewa wɔ é feŋ ɛ, sa wɔ ààbula bhis.

6 Etɛɛ náá, Ghɛŋ dyeebawa é feŋ ɛ́ mot nyɛ di ekwyɛl ɔ,

nyɛ dyeebamyak ɛ́, mot nyɛ di ebee nyɛ dáa mɔn'ɛ ɔ✝.»

7 Maadka mezuk mɛ Zɛɛb di ezuk bin, é sok nyɛ di ewa bin é feŋ ɛ, nyɛ bee bin tin ɛ́ dáa bɔn bɛ. Yɛ ɛ́ nɛ mɔn di náá, sɛɛg ààwa nyɛ é feŋ é? 8 Yɛ bɛ náá, bi ààpawaaa é feŋ, dáa nyɛ di esa nɛ bɔn bɛ ɔɔ, é di'enek, ye lyaal ɛ́ náá, bi tok bɛtɛtɛ bɔn bɛ. Tin, ekwyɛl ɛlɛɛ ɛ́ náá, bi ɛ́ bɔn bel. 9 Djhoopookonɔɔka geka bɛsɛɛg bena kɔ ɛko ɛ bɔs. É ghɛŋ bɛ nadi ewa mena é feŋ ɛ, mena nadi egwak bɛ. Haaa, gwata nɛ Sɛɛg'enaka mot di pɛ tɔ gwoo ɔ, mena goka ɛ́ nɛ gwak nyɛ dhaa tyɛ, étɛp mena needika nɛ tsik. 10 Deenek, bɛsɛɛg bena nadyeebawewa mena é feŋ ɛ, é ba mɔɔ pes ɛwala dáa elyem bɔɔ di ekwyɛl ɛ. Tin, Zɛɛb wa mena é feŋ ɛ, étɛp mɛvu mena met, etɛɛ náá, mena neebela di tɔ edɛɛ bɛ. 11 É ghɛŋ mena di ewaaa é feŋ ɛ, yɛ ɛ́ nɛ menaka ɛ́ dáa ɛwala ɛ ghoŋ tɔ lyem, ààbɛ yii mɛmyaala. Bhii tak, bot ɛ nawaaa é kwaambi yenek mbi feŋ ɔ, bɛ aakadi ɛ́ bɛ moo bot ɛ epiki, nɛ bot ɛ egwyem.

12 Sɛɛbka mɛmbɔ men zetsak ɛ, lyelka mɛboŋ men di epwak ɛ! 13 Beta náá, mɛko men du mɛze mɛ di piki ɛ, etɛɛ náá, mɛko mɛ mot di nɛ djam ɔ, ɛ́ zɛkɛpiiza, tin, ye nyɔ ɛ́ ye tsak-tsakak.

14 Saka mɛghaaz mɛ ɛdi ɛ́ tɔ egwyem nɛ bot djas, nɛ ɛdi ɛ́ tɔ tsik na dɛɛ ɛ. Etɛɛ náá, yɛ di ààbɛ deenek ɔɔ, ye tok nɛ mot ngɔt aabee Ghɛŋ. 15 Bi ɛ́ koobaka, sa mot ààsaa náá, nyɛ su enɛm nɛ embɛɛ e Zɛɛb. Sa mot ngɔt pak'en ààdi dáa le di nɛ bhum na gwyee-gwyee ɛ, etɛɛ náá, nyɛ ɛ́ zɛkɛpul bɛtɛ nɛ bot pak'en nɛ mɛgwyee mɛ. 16 Sa mot ngɔt tɔ len ààsa mɛzɔ, sa mot ààbyasal esa e dɛɛ, dáa Ezau mot nagwyena etooba bɛ étɛp edee ɔ. 17 Biyɔ bɛmet nɛ gu náá, bhii tak, nyɛ nadi ɛ́ nɛ gwyes náá, sɛɛg sɛɛ nyɛ mɛtel. Tin, wɔ gwaa sɛɛg byen ɛsɛɛ nyɛ mɛtel. É di'enek, nyɛ nabɛ ɛ́ ààbela ghwyil ɛswoola lyem sɛɛg, ye nakoozodi mɛgwyɛ mɛ.

18 É ghɛŋ bi nakunaa nɛ Zɛɛb ɛ, bi nabɛ ɛ́ ààtiila nɛ ɛtsok ɛ di náá, bot ɛ nɛ ghwyil ɛmɛt ɛ, ɛtsok ɛ Sinayi nɛ boo du'ɛ, nɛ ghooghom'ɛ, nɛ pum'ɛ, nɛ boo ghuu'ɛ, 19 bɔn ɛ Yisalaɛl nabɛ ɛ́ bɛ eegwak lii tɔŋ, bɛ naagwak gwood tuud. É ghɛŋ bɛ nagwak yɛ ɛ, bɛ naabyen ɛbaagwak gwood tak. 20 Deenek, bɛ nabɛ ɛ́ ààbɛ nɛ ghwyil ɛmaad lwomel'enek: «Mot aazomɛt ɛtsok ɛlak ɔ, ye nakoozodi tit, nyɛ aagóaa ɛ́ nɛ mɛkok✝.» 21 Kɔ ɛsu ɛ esa ee bɛ nadi ebee ɛ, wɔ gwaa, Moiiz zɛke náá: «Mɛ ɛpepwak, mɛ ɛpedyeebagwak bwoo✝!»

22 Tin, bi naakunaa nɛ ɛtsok ɛ Siyɔŋ, bi naakunaa nɛ ghaada Zɛɛb mot di nɛ tsik ɔ. Yɛ ɛ́ Ghaada Yeluzalɛm di pɛ tɔ gwoo ɛ, yɛ ɛ́ pɛ efofop bɛdhet nɛ bɛdhet di tɔ ɛbyoŋ ɛ. 23 Bi nabɛ ɛ́, bi naazekunaa nɛ dhiiti zɛɛga bot ɛ nadi tɔ ɛbyoŋ ɔ. Zɛɛga tak nabɛ ɛ́ yii bɔn mɛgwyak ɛ Zɛɛb, bot ɛ di náá, min mɔɔ moo ɛ́ ekwyala pɛ tɔ gwoo ɔ. Bi eezekunaa nɛ Zɛɛb, mot di nɛ ghwyil ɛpɛ́ɛ bot ɛ bhwak djas ɔ. Bi eezekunaa nɛ esisim e bot ɛ epiki di náá, bɛ eezedjala ɛ. 24 Bi nabɛ ɛ́, bi eezekunaa nɛ Yezu, mot di nduula-nduula ɛbhɛŋ ɛ na bes ɔ, nɛ ghiya yɛ nasee ɔ, ghiya tak ɛpetuud ɛlyelɛpe dhaa-dhaŋak ghiya ɛ Abhɛl.

25 Dika ndjem, sa bi ààbyen ɛgwak mot di elii nɛ nen ɔ. Bot ɛ nabyen ɛgwak ɛ mot nadi edul bɛ mɛlɔ kɔ bɔs ɔ, bɛ naaboma nɛ yɔbɔ feŋ. Ye kwyɛl ɛlɛɛ ɛ́ náá, dɔɔ nɛ menabɛlka pe, mena aanàdus é feŋ, mena aadi ààlooba nɛ mot di elii nɛ nena pɛ tɔ gwoo ɔɔ. 26 É ghɛŋ sok, gwood'ɛ naasa náá, bɔs dheegel, nenak, nyɛ eekɛk mena náá: «Mɛ waabaadheeg bɔs dheega sis, dɔɔ nɛ gwoo✝.» 27 Mɛkpa mɛ di ekeaa wak náá: «dheega sis», kwyɛl ɛlɛɛ ɛ́ náá, esa ee nakusaa ɛ waadheegel dhaa tyɛ, bhii tak, yɛ ɛ́ diib, étɛp ɛdjɛ di nɛ esonok di náá, ye tok nɛ ghwyil ɛdheegel ɛ.

28 Djhoobulalka bhɔɔ nɛ Zɛɛb, etɛɛ náá, mena waabelaka ɛyoŋ ɛ di ààdheegel ɛ. Djhoolyaalka bhɔɔ tak tɔ ɛsa ɛ mɛsa mɛ Zɛɛb tyee wat di náá, lyem'ɛ waamyaala nɛ yɛ ɛ. Djhoosaka yɛ tɔ ɛkaab nɛ ɛlooba nɛ nɛ. 29 Etɛɛ náá, Zɛɛb'enaka ɛ́ du di edik esonok djas ɛ.