1 Zɛɛb naakɛk mena náá, mena waabelaka di ɛwala nyɛ nazekoobal étɛp'ena ɛ. Mena ɛ́ kobakaka, sa mot pak'enaka ààsu ɛni tɔ di ɛwala ɛlenek. 2 Etɛɛ náá, mena naagwak Mbɛɛ Bhaadal dáa bot ɛ nadi tɔ kyee dik bɛsyɛ di ààbɛ nɛ mɛdii ɛ. Tin, Mbɛɛ Bhaadal bɛ nagwak ɛ, nabɛ ɛ́ ààsa bɛ sonok, etɛɛ náá, bɛ nabɛ ɛ́ ààwa ɛdum ɛ koŋ ɛ lɔɔ nɛ sa bɛ nagwak ɛ. 3 Menabɛlka bot ɛ di edum koŋ nɛ Zɛɛb ɔ, mena ɛ́ waanika tɔ ɛwala ɛ Zɛɛb nakɛk náá:

«Myoŋ nɛ mɛsoŋ mɛ mɛ natuwal tɔ ɛbuk ɛ lam ɛ́ náá,

bɛ aanàbooni tɔ sum dik mɛ nazekoobal bɛ étɛp ɛkɛwala ɛ✝.»

Nyɛ nakake deenek ɛ́, nyɛ eezesilal mɛsa mɛ é sok nyɛ nakus bhwak ɛ. 4 É di'enek, Ekwyala lɛɛ kɔ ɛsu ɛ ɛlu ɛ etɛn nɛ ebá ɛ́ náá: «Zɛɛb naazɛwala é ɛlu ɛ etɛn nɛ ebá yii mɛsa mɛ djas nyɛ nadi esa ɛ✝.» 5 Zɛɛb nabaake tɔ Ekwyala binek ɛ́ náá: «Bɛ aanàbooni tɔ sum dik mɛ nazekoobal bɛ yɛ, étɛp bɛ neekɛwala ɛ✝.» 6 Bot ɛ nanyɛl ɛgwak Mbɛɛ Bhaadal ɔ, bɛ nabɛ ɛ́ ààni tɔ ɛwala ɛ Zɛɛb nakɛk ɛ, etɛɛ náá, bɛ nabɛ ɛ́ ààlooba. É di'enek, bɛdhiiti bot ɛ nɛ ghwyil ɛni yɔbɔ tɔ ɛwala ɛlenek. 7 Kɔ ɛsu ɛ tak ɛ Zɛɛb nabaadjɛ dhiiti ɛlu, nyɛ djóo ɛlu ɛ tak ɛ́ «mos». Nyɛ naaloozelɛɛ tɔ nuub ɛ Dhavid náá:

«Bi ɛ gwak gwood ɛ Zɛɛb mos ɔɔ,

sa bi ààlyel elyem✝.»

8 Yɛ ɛ́ pe bɛ náá, Zozue naadjɛɛd bɔn ɛ Yisalaɛl étɛp ɛkɛniigal bɛ tɔ sum dik é ɛwala ɛ Zɛɛb ✝ɔɔ, pe Zɛɛb ààpalii kɔ ɛsu ɛ dhiiti ɛlu. 9 Ye kwyɛl ɛlɛɛ náá, yɛ ɛ́ pe ɛ́ nɛ dhiiti ɛwala étɛp bɔn ɛ Zɛɛb. Ɛwala tak nɔŋel ɛ́ nɛ ɛwala ɛ ɛlu ɛ etɛn nɛ ebá. 10 Etɛɛ náá, mot aani tɔ di ɛwala ɛ Zɛɛb nazekoobal ɔ, nyɛ waawala tɔ mɛsa mɛ, dáa Zɛɛb nawala tɔ yɛ mɛsa ɛ. 11 Djhoosaka mɛghaaz étɛp ɛni tɔ ɛwala tak, etɛɛ náá, mot ngɔt needi ààwo ze, étɛp ɛbaŋa embee mɛsa mɛ bɛbhaab bena, bot ɛ nabyen ɛlooba ɔ.

12 Mɛkpa mɛ Zɛɛb ɛ́ nɛ tsik, yɛ ɛ́ nɛ ghwyil. Yɛ ɛ́ wol-wol dhaa pɛl. Mɛkpa mɛ Zɛɛb nɛ ni tɔ ɛsuk ɛ elyem, tɔ mɛtii mɛ nyel, kɛkum tɔ mɛsyel mɛ egwyes. Ye nɛ pɛ́ɛ mɛkwosak nɛ esiiza e elyem. 13 Ye tok nɛ sa di tɔ sɔ é mis ɛ Zɛɛb. Esonok djas nyɛ nasa ɛ́ popoopwon é mis mɛ. Mis mɛ nɛ bee etɛp djas. Yɛ ɛ́ pɛ daa lɛ ɛ mena aabookɛtaŋalka.

14 Djhoopyetka ghiŋ tɔ ɛdum ɛkoŋ nɛ Zɛɛb mena di egoolaka ɛ! Etɛɛ náá, menaka ɛ́ nɛ boo ghaa-Zɛɛb, mot mɛbwala nakɛkum pɛ daa Zɛɛb ɔ. Yɛ ɛ́ Yezu, Mɔn ɛ Zɛɛb. 15 Boo ghaa-Zɛɛb yena ɛ́ nɛ mezuk tɔ lyem, é ghɛŋ nyɛ di ebee mena tɔ mezuk kɔ ɛsu ɛ etɛp di edhaa mena ghwyil ɛ. Etɛɛ náá, nyɛ naawaaa tɔ mɛbhowal mɛ etɛp djas dáa menabɛlka. Tin, nyɛ nabɛ ɛ́ ààkosyem. 16 Djhootiilaka nɛ ɛbwaalel djas é bhaaz bóó ekukuma ɛ Zɛɛb, pɛ kyee di nɛ enɛm nɛ embɛɛ ɛ. Pɛ daa lɛ, mena ɛpebelaka ɛpelak nɛ enɛm nɛ embɛɛ, étɛp náá, nyɛ neekwyee mena é tɛtɛ ɛwala.