1 Bɔn-nyɛɛg bam, biyɔ bot ɛ na dɛɛ, biyɔ bot ɛ Zɛɛb nadjóo ɔ, waka lyem nɛ Yezu. Tin guka náá, Yezu ɛ́ mot-lwoma ɛ Zɛɛb, nyɛ ɛ́ boo ghaa-Zɛɛb ɛdum ɛ koŋ mena di egoolaka ɛ. 2 Nyɛ nadi ɛ́ sosoob é mis ɛ Zɛɛb, mot natɔ nyɛ étɛp ɛsa mɛsa menek ɔ, dáa Moiiz nadi sosoob kɔ ndjaa-Zɛɛb djas✝ ɛ. 3 Tin, Yezu goka ɛ́ nɛ djɛaa duma dhaa duma di edjɛaa nɛ Moiiz ɛ. Etɛɛ náá, mot di esum ndjaŋ ɔ, nyɛ ɛ́ nɛ duu dhaa ndjaa tak. 4 Mendjaa djas sumaa ɛ́ nɛ mot, ghuna, Zɛɛb ɛ́ di mot di esum esonok djas ɔ. 5 Yɛ kabɛ Moiiz ɔɔ, nyɛ nabɛ ɛ́ sosoob tɔ ndjaa-Zɛɛb djas. Nyɛ nabɛ ɛ́ mot-mɛsa di egoola etɛp e Zɛɛb nadi elɛɛ ɛ. 6 Tin, Klisto ɛ́ sosoob dáa Mɔn di náá, Sɛɛg naadjɛ nyɛ ekukuma ɛdjɛɛd ndjaŋ'ɛ ɔ. Bela náá, ndjaŋ'ɛ tak ɛ́ menabɛlka, yɛ bɛ náá, mena ɛpebaalka ɛdum ɛ koŋ nɛ Zɛɛb nɛ ɛbwaalel mena dika nɛ mɛmyaala kɔ ɛsu ɛ tak ɔɔ.

7 Yɛ ɛ́ etɛp tak ɛ Sisim na Dɛɛ di elɛɛ náá:

«Mos, bi ɛ gwak gwood ɛ Zɛɛb ɔɔ,

8 sa bi ààlyel elyem, dáa bi nasa é ghɛŋ bi nakus ɛghuub nɛ nɛ

dwoo bi nawa nyɛ tɔ mɛbhowal pɛ kyee bɔs bɛsyɛ di ààbɛ nɛ mɛdii ɛ.

9 Zɛɛb ke ɛ́ náá, penek, ye nabɛ ɛ́, bɛbhaab bin naawa mɛ tɔ mɛbhowal,

ye nakoozodi bhii bɛ nazebee esa djas mɛ nasa 10 tɔ membu mɛkam-mɛná ɛ.

Yɛ ɛ́ dum nɛ tɛp tak ɛ mɛ nabiyo nɛ bot binɔk,

bhii tak, mɛ eezɛke náá: "Mɛlu djas elyem bɔɔ ɛ́ tɔ ɛdjak,

bɛ dinaa ààpatiibal sa mɛ di egwaal nɛ nɔɔ ɛ."

11 Myoŋ nɛ mɛsoŋ mɛ mɛ natuwal tɔ ɛbuk ɛ lam ɛ́ náá, bɛ aanàbooni tɔ sum dik mɛ nazekoobal bɛ étɛp ɛkɛwala ɛ✝!»

12 Bɔn-nyɛɛg, dika ndjem. Sa dhiiti mot pak'en ààdi nɛ mbee lyem di esa náá, nyɛ nàdum koŋ nɛ Zɛɛb ɛ, sa nyɛ ààlum Zɛɛb mot di nɛ tsik ɔ koŋ. 13 Djɛelka mɛghaaz pak'en mɛlu djas, dáa Ekwyala di elɛɛ náá, «dwoo lak mos», ekaab náá, mot ngɔt pak'en ɛ́ zɛkɛbyen ɛgwak, da nyɛ ɛ́ sik tɔ mesyem. 14 Tin, menaka ɛ́ bot ɛ di egyee sama nɛ Klisto ɔ, yɛ bɛ náá, mena ɛpebaalka ɛbwaalel ɛ mena dika nɛ yɛ nɛ Klisto, dáa bot nakɛkan ààwak é ze ɔɔ. 15 Ekwyala lɛɛ ɛ́ náá:

«Mos, bi ɛ gwak gwood ɛ Zɛɛb ɔɔ, sa bi ààlyel elyem,

dáa bi nasa é ghɛŋ bi nakus ɛghuub nɛ nɛ ɛ✝.»

16 Ye nabɛ bɛzɛ nagwak gwood ɛ Zɛɛb, da bɛ ɛ́ kus ɛghuub nɛ nɛ? Ye nabɛ ɛ́ bot djas Moiiz nawyisal pɛ kɔ dɛl Eziptɛ ɔ. 17 Tin, Zɛɛb nalyaal ɛbuk ɛ lɛ nɛ bɛzɛ edi membu mɛkam-mɛná? Nyɛ nalyaal ɛbuk ɛ lɛ ɛ́ nɛ bot ɛ nasyem ɔ, wɔ gwaa bɛ zɛbela ɛsyee, gwyɛ kɔ kyee bɔs bɛsyɛ di ààbɛ nɛ mɛdii ɛ. 18 É ghɛŋ Zɛɛb natuwal myoŋ nɛ mɛsoŋ mɛ náá: «Bɛ aanàkwaani tɔ sum di mɛ nazekoobal bɛ yɛ ɛ étɛp bɛ neezɛwala ɛ» tin, nyɛ nalii deenek nɛ bɛzɛ? Nyɛ nalii ɛ́ nɛ bot ɛ nakus ɛghuub nɛ nɛ ɔ. 19 Deenek, mena naabee nɛ tsɛɛtsɛ náá, bɛ nabɛ ɛ́ ààni tɔ sum dik ɛwala, etɛɛ náá, bɛ naabyen ɛdum ɛ koŋ nɛ Zɛɛb.