1 Mɛlkisedɛk yenɔk nabɛ ɛ́ mɛkoozi mɛ kyee dik Salɛm, nyɛ nabaadi ɛ́ ghaa-Zɛɛb, Zɛɛb na vyɛɛg-vyɛɛg. É ghɛŋ, Abalaam nabula kɛlumla dɛɛb nyɛ nakwak bɛmɛkoozi ɛ, Mɛlkisedɛk naatɔ́ kɛboma nɛ nɛ. Bhii tak, nyɛ nasɛɛ Abalaam mɛtel. 2 Abalaam naadjɛ nyɛ ndyaal wat tɔ endyaal kam esa ee nyɛ nabela ɛ. Guka náá, din ɛ Mɛlkisedɛk kwyɛl ɛlɛɛ ɛ́: «Mɛkoozi mɛ epiki». Baabela náá, Mɛlkisedɛk ɛ́ mɛkoozi mɛ kyee dik Salɛm, ye kwyɛl ɛlɛɛ ɛ́: «Mɛkoozi mɛ egwyem». 3 Nyɛ tok nɛ dhaad mɛbyel. Bot ààgu ɛbyel ɛ lɛ nɛ ɛsyee ɛ lɛ. Nyɛ ɛ́ tyee Mɔn ɛ Zɛɛb, nyɛ ɛ́ ghaa-Zɛɛb kɔm-kɔm sii nɛ kɔm.

4 Beeka, Mɛlkisedɛk nadi ɛ́ boo kuma mot, bhaab'enaka Abalaam naadjɛ nyɛ ndyaal wat tɔ endyaal kam esa ee nyɛ nabela é dɛɛb ɛ. 5 Etsi ɛ Moiiz lɛɛ kɔ ɛsu ɛ bɛghaa-Zɛɛb, bot ɛ mɛbyel ɛ Levi ɛ́ náá, ye goka ɛ́ bɛ nɔɔ ndyaal wat tɔ endyaal kam e esa e bot ɛ mbyak Yisalaɛl djas. Ye kwyɛl ɛlɛɛ ɛ́ náá, bɛ nɔɔ ndyaal wat tɔ endyaal kam tak nɛ bɔn-nyɛɛg bɔɔ met, bɔn-nyɛɛg bɔɔ tak ɛ́ pe ɛ́ bɛdha ɛ Abalaam. 6 Mɛlkisedɛk nabɛ ɛ́ ààbɛ dha ɛ Levi. Tin, nyɛ naanɔɔ ndyaal wat tɔ endyaal kam kɔ esa ee Abalaam nabula nɛ yɛ é dɛɛb ɛ. Bhii tak, nyɛ naasɛɛ Abalaam mot nabela ekɛk e Zɛɛb ɔ mɛtel. 7 Tin, mot di esɛɛ mot mɛtel ɔ, nyɛ eedhaa mot bɛ di esɛɛ nyɛ mɛtel ɔ, mot tok nɛ ghwyil ɛsuu mɛso kɔ ɛsu ɛ tak. 8 Bɛdha ɛ Levi, bot ɛ di enɔɔ ndyaal wat tɔ endyaal kam kɔ esa e bot ɔ, bɛ ɛ́ bot di náá, bɛ waagwyɛ djɛmɛn ɔ. Tin, Mɛlkisedɛk mot nanɔɔ ndyaal wat tɔ endyaal kam kɔ esa e Abalaam ɛ́ nɛ tsik, dáa Ekwyala di elɛɛ ɛ. 9 É di'enek, bot ɛ nɛ ghwyil ɛke náá, é sok Abalaam nadjɛ ndyaal wat tɔ endyaal kam bɛ ɛ, ye kwyɛl ɛlyaal ɛ́ náá, bɛdha ɛ Levi, bot ɛ di enɔɔ ndyaal wat tɔ endyaal kam ɔ, bɛ naabaadjɛ yɔbɔ ndyaal wat tɔ endyaal kam. 10 É di'enek, é ghɛŋ Mɛlkisedɛk natɔ́ kɛboma nɛ Abalaam ɛ, ye nabɛ ɛ́ Levi dinaa ààbyel.

11 Etsi e bot ɛ mbyak Yisalaɛl lɛɛ ɛ́ náá, yɛ ɛ́ bɛdha ɛ Levi ɛ di egoka nɛ ɛdi ɛ́ bɛghaa-Zɛɛb. Bɔn ɛ Levi nadi bɛghaa-Zɛɛb ɛ́ tyee mbi yii Aalɔn. Tin, mbi yɔbɔ ɛdi ɛ́ bɛghaa-Zɛɛb nabɛ ɛ́, ààdjala dáa ye di egoka ɛ. Yɛ ɛpedi ɛnyɔɛpe ɔɔ, haaa étɛp yé yɛ aabaadi nɛ dhiiti ghaa-Zɛɛb mbi yii Mɛlkisedɛk? 12 Etɛɛ náá, é ghɛŋ bɛ di eswoola mɛzel mɛ ɛdi ɛ́ bɛghaa-Zɛɛb ɛ, ye baagoka ɛ́ náá, bɛ swoola etsi. 13 Etɛp bak liiaa ɛ́ kɔ ɛsu Ghɛŋ'enaka. Nyɛ nabɛ ɛ́ mot mbyak sis, tɔ yɔbɔ mbyak, ye nabɛ ɛ́ ààbɛ nɛ ghaa-Zɛɛb. 14 Menabɛlka djas nɛ guka náá, Ghɛŋ'enaka nabyel ɛ́ tɔ dhaad mɛbyel ɛ Yuda. Bela náá, é ghɛŋ Moiiz nadi elii dum nɛ bɛghaa-Zɛɛb ɛ, nyɛ nabɛ ɛ́ ààtuwal mbyak tak.

15 Beeka sa wat di elyaal náá, etɛp binek ɛ́ etsɛɛtsɛ ɛ, dhiiti ghaa-Zɛɛb eebaatuula, nyɛ ɛ́ tyee wat nɛ Mɛlkisedɛk. 16 Nyɛ nabɛ ɛ́ ààdi ghaa-Zɛɛb dum nɛ mɛtiŋ mɛ bot ɛ bɔs. Tin, nyɛ nadi ghaa-Zɛɛb ɛ́ nɛ ghwyil tsik di ààbɛ nɛ ɛsik ɛ. 17 Deenek, Ekwyala ɛpelɛɛ náá:

«Wɔ aadi ɛ́ ghaa-Zɛɛb kɔm-kɔm sii nɛ kɔm,

tyee wat nɛ Mɛlkisedɛk✝.»

18 Deenek, etsi na mwa nadisaa ɛ́, etɛɛ náá, ye nabɛ ɛ́ ààdi nɛ mɛbwala, ààval dhiiti sonok. 19 Yɛ ɛ́ tsɛɛtsɛ náá, etsi ɛ Moiiz ààpasa náá, bot di bot ɛ zedjala dáa ye di egoka ɛ. Tin, mbɛɛ ɛbwaalel naazedjɛaa mena, kɔ ɛsu ɛ tak ɛ́ mena aabelaka ghwyil ɛkunaa nɛ Zɛɛb. 20 Etɛp binek nasael ɛ́ kɔ myoŋ nɛ mɛsoŋ mɛ Zɛɛb natuwal ɛ. Bɛdhiiti bot nadi bɛghaa-Zɛɛb ɛ́, Zɛɛb ààtuwal myoŋ nɛ mɛsoŋ, kɔ ɛsu ɛ lɔɔ. 21 Yɛ kabɛ Yezu ɔɔ, nyɛ nadi ghaa-Zɛɛb ɛ́, é ghɛŋ Zɛɛb natuwal myoŋ nɛ mɛsoŋ mɛ náá:

«Ghɛŋ eetuwal myoŋ nɛ mɛsoŋ,

nyɛ aanàkabaaswoola yɛ:

"Wɔy ɛ́ ghaa-Zɛɛb kɔm-kɔm sii nɛ kɔm✝."»

22 Dum nɛ tɛp tak ɛ́ di náá, Yezu ɛ́ mot di esa náá, mena dika tɔ tɛtɛ ɛbhɛŋ dhaa yii na mwa ɛ.

23 Yɛ ɛ́ nɛ boo zyaala: bɛghaa-Zɛɛb nadi ɛ́ ɛbuɛpe, etɛɛ náá, ɛsyee nadi esa náá, bɛ nàsa mɛsa mɔɔ mɛlu djas. 24 Tin, Yezu ɛ́ nɛ tsik kɔm-kɔm sii nɛ kɔm, deenek, nyɛ ɛ́ ghaa-Zɛɛb na kɔm-kɔm. 25 Dum nɛ tɛp tak ɛ, nyɛ di nɛ ghwyil ɛtsik bot ɛ di ekunaa nɛ Zɛɛb é ze'ɛ ɔ. Dáa ye di náá, nyɛ ɛ́ nɛ tsik kɔm-kɔm ɛ, nyɛ nɛ djaala Zɛɛb kɔ ɛsu ɛ lɔɔ.

26 É di'enek, Yezu ɛ́ boo ghaa-Zɛɛb, mot di egoka nɛ nena ɔ. Nyɛ ɛ́ dɛɛ, ààbɛ nɛ ndjɛ, ààbɛ nɛ syem. Deenek, nyɛ naawa mbɛk pak nyɛy nɛ bot ɛ mesyem, nyɛ naabenaa ɛvyɛɛgɛpe pɛ tɔ gwoo. 27 Nyɛ tok dáa bɛdhiiti bɛghaa-Zɛɛb, nyɛ tok nɛ gwyes ɛka ebuwa mɛlu djas, étɛp mesyem mɛ met nɛghu mesyem mɛ bɛdhiiti bot. Nyɛ naazesa etɛp binek djas sok wat, é ghɛŋ nyɛ naka nyel'ɛ met buwa ɛ. 28 Etsi ɛ Moiiz djɛ di ɛdi boo ghaa-Zɛɛb ɛ́, nɛ bot ɛ di bɛ dinaa nɛ mendjɛ ɔ. Tin, myoŋ nɛ mɛsoŋ mɛ Zɛɛb natuwal bhis etsi ɛ, lɛɛ ɛ́ náá, Mɔn'ɛ di boo ghaa-Zɛɛb na kɔm-kɔm sii nɛ kɔm tɔ edɛɛ.