Ebele 6

1 Deenek, mena goka nɛ ɛdu ɛ́ mɛlyo mɛ di egoka nɛ bot ɛ zewyee ɔ, ààkabɛ náá, mena baasikeka pɛ mɛlyo mɛ mɛkɛn dum nɛ Klisto. Sa mena ààbaasikeka tɔ ɛsuk ɛ mɛlyo mɛ mɛkɛn mɛ di elii dum nɛ ɛkat esesɛɛ di edul bot tɔ ɛsyee ɛ, nɛ mɛlyo mɛ ɛdum ɛ koŋ nɛ Zɛɛb, 2 mɛlyo étɛp ɛdis edhuud, nɛ ɛkɛl ɛ bot mɛmbɔ, nɛ mɛlyo dum nɛ ɛgom ɛ bot bhis ɛsyee, zɛnɔɔ mɛlyo dum nɛ epɛ́ɛ na kɔm-kɔm. 3 Zɛɛb ɛ kwyɛl ɔɔ, mena ɛ́ waadjɛka mɛlyo mɛ di egoka nɛ bot ɛ zewyee ɔ.

4 Djhoonɔɔka geka nɛ bot ɛ nabula pɛ bhis tɔ mbi tsik bɛ nadi nɛ yɛ sok ɛ: Bɛ naabela mɛkas ɛ Zɛɛb, bɛ naabowal ɛkɛɛ nadus tɔ gwoo ɛ, bɛ naabela Sisim na Dɛɛ, 5 bɛ naakwyɛl mbɛɛ Mɛkpa ɛ Zɛɛb, bɛ naagu ghwyil mɛbwala mɛ bhwak aazyɛ ɛ, 6 bela náá, bɛ naabaabula sik tɔ tsik’ɔɔ na mwa. Bɛ tok nɛ ghwyil ɛbaaswoola tsik’ɔɔ swoola sis, etɛɛ náá, bɛ ɛpebaabem Mɔn ɛ Zɛɛb bema sis é mɛlaaba. Bɛ ɛpedjɛs bɛdhiiti bot ze náá, bɛ lee nyɛ.

7 Djhoopookonɔɔka geka bɔs: É ghɛŋ bɛbhi di enee ɛ, bɔs nɛ min mɛdii mɛ tak, yɛ ɛ́ di esa náá, embɛɛ eka kwyil, ɛnyɔ nɛ bot ɛ di ebɛ epyeeb ɔ. Deenek, Zɛɛb eesɛɛ mɛtel kɔ bɔs tak. 8 Tin, bɔs tak ɛwyisal mɛkpak mɛ mɛgɔk, nɛ engwyinini ɔɔ, yɛ ààval dhiiti sonok. Deenek, Zɛɛb aanàbɔya nɛ ɛkal ɛ yɛ, tin, ɛsik ɛ tak aadi ɛdikaa tɔ du.

9 Bɔn-nyɛɛg bis di ekwyɛl ɔ, yɛ bɛ náá, bis ɛpelii deenek ɔɔ, bis ɛ́ nɛ ɛbwaalel náá, bi ɛ́ tɔ tɛtɛ ze di edjɛ tsik ɛ. 10 Zɛɛb ɛ́ mot di piki ɔ. Nyɛ aanàdjisa embɛɛ mɛsa mɛ bi di esa ɛ, ààkobɛ-bɛak kwyɛl bi di nɛ yɛ nɛ nɛ ɛ. Bi nalyaal kwyɛl tak ɛ, tɔ embɛɛ mɛsa mɛ bi nadi esesa, nɛ yii bi di esa nenak nɛ bɛdhiiti bot ɛ di edum koŋ nɛ Zɛɛb ɔ. 11 Tin, bis kwyɛl ɛ́ náá, mot nɛ mot pak’en wa zii kɛkum dwoo mɛsik, etɛɛ náá, ɛbwaalel ɛ len neesael ɛnyɔɛpe. 12 Sa bi ààdi bɛsikel ɛ bot. Tin, nɔɔka geka bot ɛ di edum koŋ nɛ Zɛɛb nɛ zii djas ɔ, bot ɛ di náá bɛ waaboobela ekɛk e Zɛɛb ɔ.

Ekɛk e Zɛɛb ààswoola

13 É ghɛŋ Zɛɛb nakɛk Abalaam ɛ, nyɛ naatuwal myoŋ nɛ mɛsoŋ nɛ din ɛ lɛ met. Etɛɛ náá, ye tok nɛ mot di nɛ mɛbwala dhaa nyɛy, étɛp nyɛ neetuwal myoŋ nɛ mɛsoŋ nɛ din ɛ lɛ. 14 Nyɛ naake náá: «Nɛ tsɛɛtsɛ, mɛ waasɛɛ wɔ mɛtel, mɛ waasa náá, wɔ di nɛ bɛtɛ nɛ bɛdha✝6.14 Mɛk 22.16-17 .»

15 Abalaam naabɔya tɔ bhwood, nyɛ naabalabela sa Zɛɛb nakɛk nyɛ ɛ. 16 É ghɛŋ bot di etuwal myoŋ nɛ mɛsoŋ ɛ, bɛ sa yɛ ɛ́, nɛ din ɛ mot di eval dhaa bɔɔ ɔ. Deenek, ɛtuwal ɛ myoŋ nɛ mɛsoŋ menek lyaal ɛ́ etsɛɛtsɛ, nɛ ɛbaasa náá, mɛso si. 17 Ghuna Zɛɛb nakwyɛl ɛ́, ɛlyaal popoopwon nɛ bot ɛ di ebwood ekɛk ɔ náá, mɛkpa mɛ ààswoola, étɛp tak ɛ di náá, nyɛ naatuwal myoŋ nɛ mɛsoŋ kɔ ekɛk binek. 18 Ekɛk nɛ ɛtuwal myoŋ nɛ mɛsoŋ, yɛ ɛ́ esonok ebá ee bot di ààswoola ɛ. Tɔ ekɛk bɛ, nɛ tɔ ɛtuwal ɛ myoŋ nɛ mɛsoŋ mɛ, Zɛɛb tok nɛ ghwyil ɛkɔɔ✝6.18 Ɛla 23.19 . Deenek, menabɛlka bot ɛ zebet esonok djas étɛp ɛdi ɛ́ sama nɛ Zɛɛb ɔ, yɛ ɛpedjɛ mena mɛghaaz náá, mena dika nɛ boo ɛbwaalel étɛp ɛbela sa nyɛ nakɛk mena ɛ. 19 Ɛbwaalel ɛ tak ɛ nɛ nena ɛ́, dáa mbwak mɛsuwa*6.19 mbwak mɛsuwa ye kwyɛl ɛlyaal ɛ́ náá, dáa mbwak mɛsuwa di esa náá, mɛsuwa nàwo ɛ, ɛbwaalel ɛ bot aanàkwaawo. étɛp tsik yenaka. Yɛ ɛ́ sa mɛlyel nɛ tsɛɛtsɛ, yii di edhaa kɛtuula pɛ tɔ boo lɛmbɛ na pip-pip di ekaa mɛdhɛŋ mɛ Ndjaa-ebuwa di tɔ gwoo ɛ, kɛkum Di na Dɛɛ di tɔ tak✝6.19 Msa 16.2 ɛ. 20 Yɛ ɛ́ tin ɛ, Yezu nadi mot mɛkɛn ɛni tɔ tak, ɛsok nɛ nena kɔ ɛsu ɛ lena. Etɛɛ náá, nyɛ moo ɛ́ boo ghaa-Zɛɛb kɔm-kɔm sii nɛ kɔm tyee wat nɛ Mɛlkisedɛk.