1 Gwakeka sa di nɛ boo mɛtaŋ yii bis di ekwyɛl ɛlɛɛ bin ɛ: Yɛ ɛ́ ɛnyɔɛpe dáa ye di náá, menaka ɛ́ nɛ boo ghaa-Zɛɛb ɛ, nyɛy mot di ndiindel pɛ tɔ gwoo pɛ mbɔ eghɛŋ bóó mɛkoozi ɛ Zɛɛb✝, mot di nɛ mɛbwala djas ɔ. 2 Nyɛ ɛpesa mɛsa mɛ tɔ Di na Dɛɛ. Ye kwyɛl ɛlɛɛ ɛ́ tɛtɛ pɛt di náá, Ghɛŋ Zɛɛb nyɛy ɛmet ɛ́ nasum ɛ, ààbɛ yii bot ɛ bɔs nasum ɛ.

3 Eboo bɛghaa-Zɛɛb djas nanɛɛgaa tin ɛ́, étɛp ɛgoola esa e ɛgwyena pɛ daa Zɛɛb, nɛ ɛka ebuwa. Tin, ye goka ɛ́ náá, boo ghaa-Zɛɛb'enaka Yezu baadi nɛ yɛ sa nyɛ aagwyena nɛ Zɛɛb ɛ. 4 Tin, nyɛy ɛpedi ɛ́ kɔ ɛko ɛ bɔs ɔɔ, pe nyɛ tok nɛ ghwyil ɛdi ghaa-Zɛɛb, etɛɛ náá, kɔ ɛko ɛ bɔs, yɛ ɛ́ nɛ bot ɛ di eka ebuwa dáa etsi ɛ Moiiz di elɛɛ ɛ. 5 Ghuna, mɛsa mɛ bɛghaa-Zɛɛb di esa tɔ pɛt ɛbhɛŋ ɛ Zɛɛb ɛ, yɛ ɛ́ mbaŋa-mbaŋa esa di enɔŋel nɛ esa ee di esael pɛ tɔ gwoo ɛ. É sok Moiiz nawaasum pɛt ɛbhɛŋ ɛ, Zɛɛb naalɛɛ nyɛ náá: «Gwyáka, wɔ aasum yɛ ɛ, dáa wɔ nalyaalaa pɛ kɔ ɛtsok✝ ɛ.»

6 Tin, nenak yak, mɛsa mɛ Yezu di esa ɛ, yɛ ɛ́ mɛsa mɛ di edhaa mɛsa djas ɛ. Etɛɛ náá, nyɛy ɛ́ mot nasɛ́ɛaa étɛp ɛduula pak bot nɛ Zɛɛb tɔ tɛtɛ ɛbhɛŋ ɔ. Tɛtɛ ɛbhɛŋ ɛ tak nakusaa ɛ́ nɛ tɛtɛ ekɛk di edhaŋ ɛ.

7 Tin, yɛ ɛpedi ɛ́ náá, ɛbhɛŋ na mwa nadi ɛ́ ààbɛ nɛ ndjɛ tɔ tak ɔɔ, pe bɛ nabɛ ɛ́ ààdis yɛ, da swoola yɛ nɛ dhiiti ɛbhɛŋ ɛ sis. 8 Zɛɛb nadul bot ɛ mbyak'ɛ mɛlɔ ɛ́ náá:

«Mam Ghɛŋ ke ɛ́ náá, tɔ mɛlu di ezyɛ yenek,

mɛ waasa ɛbhɛŋ ɛ na bes,

nɛ bot ɛ mbyak Yisalaɛl dɔɔ nɛ bot ɛ kyee dik eYuda.

9 Yɛ aanàkwaadi tyee wat nɛ yii mɛ nasa nɛ bɛbhaab bɔɔ ɛ,

é sok mɛ namɛt bɛ é mbɔ, wyisal bɛ pɛ dik Eziptɛ ɛ.

Bɛ nabɛ ɛ́ ààlooba nɛ ɛbhɛŋ ɛ tak,

é di tak ɛ́ mɛ natsin bɛ.»

10 Ghɛŋ ke ɛ́ náá:

«Beeka ɛbhɛŋ ɛ mɛ aasa nɛ bot ɛ mbyak Yisalaɛl ɛ,

bhii mɛlu menek,

mɛ aakwyal mɛtiŋ mam ɛ́ tɔ esiiza bɔɔ,

mɛ aasɔn mɛtiŋ mam tɔ ebhum elyem bɔɔ,

mɛ aadi ɛ́ Zɛɛb'ɔɔ, tin, bɔɔ kadi ɛ́ bot ɛ mbyak'am!

11 Tin, mot aanàkabaadi nɛ gwyes ɛdjɛ mot di é bhaaz'ɛ nɛghu mɔn-nyɛɛg mɛlyo náá,

"Gua Ghɛŋ!"

Etɛɛ náá, bot djas ɛ́ waagu mɛ,

kana mɔn dhyeeb kɛkum boo-mot.

12 É di'enek, mɛ waapel ɛdjak ɛ lɔɔ, mɛ aanàbaataala mesyem mɔɔ✝.»

13 É sok nyɛ nadi elii dum nɛ ɛbhɛŋ na bes ɛ, ye nakwyɛl ɛlɛɛ ɛ́ náá, ɛbhɛŋ ɛ mɛkɛn moo ɛ́ yii na mwa. Bela náá, sa di náá, ye moo ɛ́ na mwa ɛ, nazelɔɔd ɛ́, kunaa ɛ́ nɛ ɛdiib.