Marcos 12

Kana bot ɛ mɛsa bɛ na embee elyem di ebaal pyeeb vin ɔ

1 Bhii tak, Yezu eezɛlii nɛ nɔɔ tɔ kana náá: «Mot ngɔt naabɛ pyeeb vin’ɛ. Nyɛ eezɛpeeb pyeeb tak, pu guk tɔ ɛkok é di bɛ aadi esyal mɛdii mɛ bhum tak ɔ, baasum ndjaa, étɛp bot aadi ebaal pyeeb ɔ. Tin, nyɛ eezɛdjóo bot ɛ di egu mɛsa mɛ vin ɔ, da djɛ bɛ mɛsa mɛ tak. Nyɛ eezɛnɔɔ nyel, tɔ́ mɛdjoŋ. 2 Mbu epyeeb e tak di ewum ɛ, yɛ eezɛdjala. Wɔ gwaa, nakuma pyeeb zokazɛlwom dhiiti mot-mɛsa mɛ ngɔt, pɛ daa bot ɛ nyɛ nalik nɛ pyeeb ɔ, étɛp bɛ needjɛ nyɛ yɛ pak bhum vin bɛ nabela tɔ pyeeb vin ɛ. 3 Wɔ gwaa, bot ɛ nalik nɛ pyeeb ɔ, zɛmɛt mot tak, duma nyɛ é nyel nɛ mɛbin. Bhii tak swaal nyɛ mɛmbɔ mɛ toto. 4 Bhii mot sok, nakuma pyeeb eebaazɛlwom dhiiti mot-mɛsa, nyɛ tɔ́ pɛ daa lɔɔ tɔ pyeeb, bɛ eezɛnyuu nyɛ é lo, nyek nyɛ ɛbuɛpe. 5 Yak kɔkɔ tyee esok elɛl. Nyɛ eebaazɛlwom nwyak mot, bɔɔ duma nyɛ é nyel nɛ mɛbin, gó nyɛ. Bɛ nabaazosa nɛ bot ɛ nazyɛ ɛbhis ɔ deenek, bɛdhiiti biaa, bak góaa. 6 Nyɛ nabɛ ɛ́ nɛ ɛtsak ɛ mɔn’ɛ ngɔt nalik ɔ, yii nyɛ nadi ekwyɛl dhaa tyɛ ɔ. Nyɛ eezɛlwom nyɛ pɛ daa lɔɔ nɛ egeka náá: "Bot binɔk ɛ́ waamyaal nyɛ nɛ ɛdjɛ nyɛ duu, etɛɛ náá, yɛ ɛ́ mɔn’ɛ met." 7 Dáa bot ɛ di esa mɛsa tɔ pyeeb’ɛ nabee mɔn’enɔk ɛ, bɔɔ náá: "Yaweee! Beeka mot aalik nɛ mɛvu mak djas ɔ! Djhoogóka nyɛ. Tin, mɛvu mak aakadi ɛ́, yenabɛlka." 8 Wɔ gwaa, bɛ zɛmɛt nyɛ, gó nyɛ, mwas muu’ɛ bhii pyeeb vin.»

9 Yezu eezɛdji bɛ kiya náá: «É di’enek, nakuma pyeeb vin goka nɛ ɛsa yé? Nyɛ waazyɛ, da nyɛ ɛ́ gó bot ɛ nadi esa mɛsa tɔ pyeeb ɔ. Bhii tak, da nyɛ ɛ́ nɔɔ pyeeb, djɛ nɛ bot ɛ sis. 10 Bi nabɛ ààlaa mɛkpa mak tɔ Ekwyala?

"Ɛkok ɛ bɛsumel mwas ɛ,

moo ɛ́ ɛkok di epyet ndjaŋ ɛ.

11 Yɛ ɛ́ nɛ ghwyil ɛ Ghɛŋ ɛ nyɛ moo deenek.

Ye tok tin mbyok é mis menaka*12.11 Mɛd 118.22-23!"»

12 Tinaak, bɛghaŋ ɛ mɛkana mɛ etsi, nɛ bɛpaa ɛ eYuda, zɛnɔɔ eboo bɛghaa-Zɛɛb, nadi esaa mɛpek étɛp bɛ neemɛt nyɛ. Tin, bɛ nadi ekaab ɛ́ ɛdhuu ɛ bot, etɛɛ náá, bɛ nabɛ ɛ́, egu náá, Yezu nalɛɛ kana tak ɛ́, kɔ ɛsu ɛ lɔɔ. É di tak wat, bɛ eezɛbet Yezu, tɔ́ yɔbɔ.

Etuud e lapo nɛ mɛkoozi Sezaad

13 Bɛghaa-Zɛɛb eezɛkyeed bɛdhiiti eFalizyɛ nɛ bɛdhiiti bot ɛ zɛɛga ɛ mɛkoozi Eelood pɛ daa Yezu tyee mɛbhowal, étɛp nyɛ neebela ndjɛ kɔ mɛkpa mɛ met. 14 Bɛ ɛ́ boozɛke nɛ nɛ náá: «Lyoel, bis nɛ gu náá, etɛp ee wɔ di elɛɛ ɛ, yɛ ɛ́ etsɛɛtsɛ. Wɔ ààbem ba nɛ mot, etɛɛ náá, wɔy ààdyeebagwyák sa bot di esa, étɛp bɛ neetela mɛnyel ɛ. Wɔ lyo bot ɛ́ epiki dáa mot di egoka nɛ ɛkɛ dáa Zɛɛb di ekwyɛl ɛ. Tɔ yɔ mbeea, ye goka ɛ́ náá, bot tuud epata e lapo nɛ mɛkoozi Sezaad é? Bis tuud ohoo, bis nàtuud?» 15 Dáa Yezu nadi egu mbee mɛfulu mɛ mɛdjhaaz pɛ ɛko, bhimis pɛ si ɛ, nyɛ ɛ́ boozɛbɔɔza nɛ nɔɔ náá: «Étɛp yé bi di ekwyɛl ɛwa mɛ tɔ mɛbhowal? Dhaka mɛ nɛ dhenye wat, étɛp mɛ neebee.» 16 Bɛ eezɛzyɛ nyɛ nɛ pata wat.

Yezu eezɛdji bɛ náá: «Kɔ falanga yak, yɛ ɛ́ wak ɛbhwoob ɛ zɛ? Yɛ ɛ́ ekwyala e din ɛ zɛ ɛ di kɔ tak?» Bot binɔk eezɛbɔɔza nɛ nɛ náá: «Yɛ ɛ́ yɛ mɛkoozi Sezaad.» 17 Bhii tak, nyɛ eebaazɛbɔɔza nɛ nɔɔ náá: «Djɛka Sezaad sa di yɛ Sezaad ɛ, da bi ɛ́ djɛ Zɛɛb sa di yɛ Zɛɛb ɛ.» Gwaka bɛ nagwak deenek ɛ́, bɛ eezɛdjoka nyɛ ɛlyelɛpe.

Kiya dum nɛ tɛp ɛgom bhis ɛsyee

18 ESaduseɛ, bot ɛ nadi eke náá, bhis ɛsyee, bot aanàkwaagom ɔ, bɛ eezɛzyɛ yɔbɔ pe, pɛ daa Yezu, zɛdji nyɛ náá: 19 «Lyoel, mɛkana ɛ Moiiz lɛɛ ɛ́ náá: "Yɛ bɛ náá, mɔn-nyɛɛg dhiiti mot eegwyɛ, ààlik mɔn ɔɔ, ye goka ɛ́ náá, dhyeeb mot lik ɔ, ba kus myɛl, étɛp nyɛ neekwyiida tel gwyɛ ɔ*12.19 Dɛt 25.5-6." 20 Tin, ye nabɛ ɛ́ nɛ bɔn-nyɛɛg bɛtɛn nɛ bɛbá. Mɔn mɛgwyak eezɛba moma, da gwyɛ, ààlik mɔn. 21 Mot bɔɔba mɔn mɛgwyak ɔ, kanɔɔ moma bhii koŋ’ɛ. Tin, nyɛ eebaakpaa nɛ mɛsyee, gwyɛ, ààlik bɔn. Ye zokabaasael ɛ́ tyee wat nɛ mot nabaazyɛ bhis yenɔk ɔ. 22 Tin, bɔɔ djas bɛtɛn nɛ bɛbá kadi ɛ́ ààbya nɛ moma yenɔk. Bhii bɔɔ djas, moma eezɛkpaa nɛ mɛsyee gwyɛ. 23 É sok bot aagom bhis ɛsyee ɛ, moma yenɔk aakadi mwaa zɛ, tɔ bɔɔ bɛtɛn nɛ bɛbá? Etɛɛ náá, bɔɔ djas nabɛ ɛ́ botom bɛ.»

24 Yezu eezɛbɔɔza nɛ nɔɔ náá: «Bi ààbee tin náá, bi ɛ́ tɔ ɛdjak é? Etɛɛ náá, bi ààsiiza ɛnyɔɛpe sa di kwyala tɔ Mɛkana ɛ Zɛɛb ɛ. Baanɔɔ náá, bi ààgu ghwyil ɛ Zɛɛb. 25 Etɛɛ náá, é ghɛŋ bot aagom bhis ɛsyee ɛ, botom aanàkwaakabaaba boa, boa pe ààkwaani mɛba, etɛɛ náá, bot djas aadi ɛ́, dáa efofop tɔ gwoo. 26 Dum nɛ tɛp ɛgom bhis ɛsyee, bi naalaa tɔ mɛkana mɛ Moiiz sa Zɛɛb nalɛɛ nyɛ dum nɛ tɛp tak tɔ le nagel*12.26 le nagel eghɛŋ Zɛɛb nalii nɛ Abalaam, tɔ ɛbhɛŋ ɛ na mwa ɛ, nyɛ nalii nɛ nɛ tɔ mɛvyɛkɛlɛ mɛ mɔɔ le nadi nɛ ngel di yɛ di ààdyak ɛ. Yɛ ɛ́ kwyala tɔ mɛkana mɛ Ɛwy 3.2-5., ààdyak ɛ: "Yɛ ɛ́ mam, Zɛɛb ɛ Abalaam, Zɛɛb ɛ Izak, nɛ Zɛɛb ɛ Zakɔɔb*12.26 Ɛwy 3.2,6." 27 Zɛɛb tok Zɛɛb bɛmyoŋ. Nyɛ ɛ́ Zɛɛb bot ɛ di nɛ tsik ɔ. Deenek bi ɛpebu ɛdjak.»

Boo tsi na dil-dil

28 Wɔ gwaa, dhiiti ghaa-mɛkana mɛ etsi nadi egwak dáa Yezu nadi elii nɛ bot binɔk ɛ, zokazɛtiila pɛ daa Yezu, etɛɛ náá, nyɛ naabee náá, Yezu nabɛ ɛ́ nɛ gham. Nyɛ ɛ́ boozɛdji Yezu náá: «Tɔ etsi e Zɛɛb djas, yaa tsi di edil tɔ etsi djas?» 29 Yezu ɛ́ boozɛbɔɔza nɛ nɛ náá: «Yii di dil tɔ etsi djas ɛ: "Gwaka, Yisalaɛl, ye tok nɛ dhiiti Zɛɛb, bhii Ghɛŋ Zɛɛb’enaka. 30 Da wɔ ɛ́ kwyɛl Ghɛŋ Zɛɛb’ɔ, nɛ lyem’ɔ djas, nɛ sisim’ɔ djas, nɛ mɛtselal mɔ djas, nɛ ghwyil’ɔ djas*12.30 Dɛt 6.4-5." 31 Beeka tsi di ebɔɔba yenek ɛ: "Kwyɛla sɔ’ɔ mot dáa wɔ di ekwyɛl nyel’ɔ met ɛ*12.31 Msa 19.18." Ye tok nɛ dhiiti etsi di edhaa binɔk bɛbá nɛ mɛdil.» 32 Ghaa-mɛkana mɛ etsi yenɔk eezɛke nɛ nɛ náá: «Tsɛɛtsɛ, lyoel! Wɔ lɛɛ tsɛɛtsɛ náá, Zɛɛb ɛ́ ngɔt. Dhiiti Zɛɛb tok bhii koŋ’ɛ. 33 Etɛɛ náá, ɛkwyɛl ɛ nyɛ nɛ lyem’ɔ djas, nɛ sisim’ɔ djas, nɛ mɛtselal mɔ djas, nɛ ghwyil’ɔ djas, nɛ ɛbaakwyɛl sɔ’ɔ mot, dáa wɔ kwyɛl nyel’ɔ met ɛ, yɛ eedhaa ebuwa e bɛtit, nɛ esa ee di kaŋaa Zɛɛb ɛ.» 34 Dáa Yezu nabee dáa mot’enɔk bɔɔza nɛ etsoŋ djas ɛ, nyɛ ɛ́ boozɛlɛɛ nɛ nɛ náá: «Ɛyoŋ ɛ Zɛɛb ààtseta nɛ nɔ.»

Bhii tak, bot nadi ɛ́, bɛ moo ekyee ɛdji ɛ nyɛ ekiya.

Klisto ɛ́ mɔn zɛ?

35 Tin, Yezu ɛpelyo bot tɔ kok Ndjaa-ebuwa, nyɛ eezɛdji bot náá: «Étɛp yé bɛghaŋ ɛ mɛkana mɛ etsi di eke náá, Mɛsia ɛ́ dha ɛ mɛkoozi Dhavid? 36 Ye nabɛ ɛ́, Dhavid nyɛ ɛmet nɛ ghwyil ɛ Sisim na Dɛɛ naake náá:

"Ghɛŋ Zɛɛb nake nɛ Ghɛŋ’am ɛ náá:

Dha disi pɛ mbɔ eghɛŋ bam,

kɛkum dwoo mɛ aalwom bot ɛ mɛbhuka mɔ,

bɛ zɛdhaa si mɛko mɔ ɛ*12.36 Mɛd 110.1."

37 Dhavid nyɛ ɛmet naadjóo nyɛ "Ghɛŋ". É yak tyɛ Mɛsia aakabaadi dha’ɛ?»

Yezu eezɛdul bot mɛlɔ dum nɛ bɛghaŋ ɛ mɛkana mɛ etsi

Zukamwaa nɛ mot nadi tin ɔ, nadi egwak Yezu nɛ mɛmyaala tɔ elyem. 38 Tɔ mɛlyo mɛ, nyɛ nakeke ɛ́ náá: «Kyeeka bɛghaŋ ɛ mɛkana mɛ etsi, bot ɛ di ekwyɛl ɛkɛ tɔ bot nɛ ewolo ekaad na boo mɛtaŋ é ɛlyaala mɛnyel, étɛp bɛ needuwalaa nɛ ɛswosaa é edi bot di esɛɛga ɛbuɛpe ɔ. 39 Bɛ dyeebakwyɛl ɛdi ɛ́ kɔ mɛbhóó mɛ di pɛ sok ɛ tɔ mendjaa mɛ mendjaala mɛ eYuda nɛ tɔ edi e mɛbyoŋ. 40 Yɛ ɛ́ bot binɔk ɛ di edjii esa tɔ mendjaa mɛ bɛkus ɛ boa. Tɔ mɛkɔŋ mɔɔ, bɛ nɛ kwyɛl ɛdul ɛ mendjaala mɛ na kpɔkɔlɔm, étɛp bot needi ààbee embee esa bɛ di esa ɛ. Epɛ́ɛ bɔɔ aadi ɛ́ ɛlyelɛpe.»

Djel kus moma eezɛkaa Zɛɛb

41 Wɔ gwaa, Yezu zɛdisi sok ɛbɔɔl ɛ nanɛɛgaa kɔ ɛbɛsɛɛ ɛ kok Ndjaa-ebuwa ɛ. Bɛtɛ nɛ bot ɛ ekum nadi ewa epata ɛbuɛpe. 42 Wɔ gwaa, dhiiti djel kus moma zokazyɛ yɛ sok, zɛlóo yɛ tɔ ɛbɔɔl, nyɛ eezɛwa yɛ ba bɔɔ efalanga ebá di ààbɛ nɛ boo mɛtaŋ ɛ. 43 Dáa Yezu nabee deenek ɛ́, nyɛ ɛ́ boozɛdjóo bɛdjekel bɛ. Nyɛy nɛ nɔɔ náá: «Tsɛɛtsɛ nɛ tsɛɛtsɛ, mɛ lɛɛ bin ɛ́ náá, djel kus moma yak eelóo tɔ ɛbɔɔl, dhaa yii bot djas lóo ɛ. 44 Etɛɛ náá, bot ɛ lóo wak djas’aak, bɛ lóo ɛ́ eghutu-ghutu. Yɛ kabɛ djel kus moma yak ɔɔ, nyɛ djɛ ɛ́ ɛkwom ɛ lɛ djas.»