1 Tɔ mɛlu menek, boo ɛdhuu ɛ bot naabaazɛsɛɛga é ngwoob ɛ Yezu. Dáa bɛ nadi ààbɛ nɛ edee e dek ɛ, nyɛ ɛ́ boozɛdjóo bɛdjekel bɛ, nyɛy nɛ nɔɔ náá: 2 «Haaa kpaa-ghoŋ nɛ bot bak! Bɛ moo mena nɛ bɛnɔɔ mos ɛ́ mɛlu mɛlɛl, bɛ tokapɛ nɛ edee e dek. 3 Mɛ swaal bɛ pɛ mendjaa mɔɔ tɔ emɔ toto ɔɔ, bɛ waazuk é ze. Etɛɛ náá, mɛl mɛ bɛdhiiti nɛ tseta.» 4 Bɛdjekel bɛ eezɛbɔɔza nɛ nɛ náá: «Mena belaka edee ee bot bak djas aadɛ djil ɛ paa, menabɛl ɛ́ dika kuku kakoŋ'aak?» 5 Yezu eezɛdji bɛ náá: «Bi ɛ́ nɛ emapa edhen?» Bɛ eebaazɛbɔɔza nɛ Yezu náá: «Etɛn nɛ ebá.» 6 Tin, nyɛ ɛ́ boozɛlɛɛ nɛ ɛdhuu ɛ bot djas, bɛ disi é bɔs. Bhii tak, nyɛ eezɛnɔɔ emapa etɛn nɛ ebá binek, zɛghaapɛɛ Zɛɛb. Bhii tak, nyɛ eezɛpyak yɛ ebil-ebil, zɛnɔɔ yɛ, djɛ bɛdjekel bɛ, bɛ neekaa bot djas. Bɔɔ sa deenek. 7 Ye nabaadi ɛ́, nɛ ba bɔɔ bɛsu. Yezu eezɛnɔɔ yɛ, ghaapɛɛ Zɛɛb, bhii tak nyɛ eedjɛ bɛdjekel bɛ, bɛ kaa. 8 Mot nɛ mot nabɛ ɛ́, nyɛ naadɛ, djil, bɛdjekel bula nɛ mɛbhubhwak mɛ bɛbhwaŋ ɛtɛn nɛ ebá. 9 É di tak, bot nadi ɛ́ tyee bot bɛmil ɛná (4 000). Bhii tak, Yezu eezɛswaal bɛ, bɛ sik pɛ mɛl mɔɔ. 10 É di'enek wat, nyɛ eezɛni tɔ elɛɛd bɛ nɛ bɛdjekel bɛ, zɛtɔ́ pɛ kyee dik Dhalmanuta.

11 Tin, eFalizyɛ eezɛkum pɛ Yezu nadi ɛ́, bɛ moo be mɛso, bɛ nɛ bɛnɔɔ. Bɛ nadi ekwyɛl ɛlóo ɛ nyɛ pɛ ɛko, da bwood nyɛ pɛ kyɛ. Bɔɔ nɛ nɛ náá, nyɛ sa bɛ dhiiti ndem mɛbwala mɛ di edus tɔ gwoo ɛ. 12 Tin, Yezu naazɛgwak ghoŋ tɔ lyem'ɛ, nyɛ ɛ́ boozɛke náá: «Étɛp yé bot ɛ mɛlu mak di esaa ndem mɛbwala? Tsɛɛtsɛ nɛ tsɛɛtsɛ, mɛ lɛɛ bin ɛ́ náá, bɛ aanàkwaabee yɛ!» 13 Yezu eezɛdus é di'enek, ni tɔ elɛɛd, sɛɛ dii, tɔ́ pɛ yii kyiid.

14 Ye nabɛ ɛ́, bɛdjekel eedjisa ɛnɔɔ emapa. Tin, tɔ elɛɛd, bɛ nazodi ɛ́ nɛ mapa wat ɛ djin. 15 Yezu eezɛdul bɛ mɛlɔ. Nyɛy nɛ nɔɔ náá: «Biyɔ bak! Bi ɛ́ kobaka nɛ leviid eFalizyɛ nɛ leviid Eelood*.» 16 Bɛdjekel moo tin elii pak'ɔɔ náá: «Nyɛ ke deenek ɛ́, etɛɛ náá, mena ààpazyɛka nɛ emapa!» 17 Dáa Yezu gwak deenek ɛ́, nyɛ eezɛdji bɛ náá: «Bi gwyɛ yé, yɛ ɛ́ etɛɛ náá, bi tok nɛ emapa? Bi dinaa ààpasiiza ɛnyɔɛpe? Bi tok nɛ etsoŋ é? 18 Bi ɛ́ nɛ mis, bi ààbee? Bi ɛ́ nɛ mɛlɔ, bi ààgwak é? Bi ààtaala? 19 É sok mɛ napyak emapa etɛn dwoo tak, da djɛ bot bɛmil ɛtɛn, bɔɔ dɛ, djil ɛ, bɛbhwaŋ ɛdhen nabwak nɛ bɛtɛ nɛ ebil emapa tɔ tak?» Wɔ gwaa, bɛ bɔɔza nɛ nɛ náá: «Kam nɛ ebá.» 20 Yezu eebaadji náá: «É dwoo mɛ nabaapyak emapa etɛn nɛ ebá, djɛ bot bɛmil ɛná (4 000) ɛ, bɛbhwaŋ ɛdhen nabwak nɛ bɛtɛ nɛ ebil emapa tɔ tak?» Bɔɔ náá: «Ye nabwak ɛ́ bɛbhwaŋ ɛtɛn nɛ ebá.» 21 Bhii tak, Yezu eezɛke nɛ nɔɔ náá: «Bhis yenek bi ààpanyɔ ɛgu sa ye di kwyɛl ɛlɛɛ ɛ?»

22 Bɛ eezɛkum pɛ Bhɛtsaida. Tin, bɛ eezɛzyɛ Yezu nɛ mot edhim, bɔɔ náá, nyɛ mɛt nyɛ étɛp nyɛ neetsik nyɛ.Yezu eetsik mot edhim 23 Yezu eezɛmɛt mot edhim binɔk é mbɔ, tɔ́ nɛ nɛ ba ɛtsetaɛpe nɛ dɛl. Nyɛ eezɛsɛɛ mɛtel, lɔɔb nyɛ yɛ é mis. Bhii tak, nyɛ eekɛl nyɛ mɛmbɔ, nyɛ eezɛdji nyɛ náá: «Wɔ ɛpebee sonok é?»

24 Mot edhim binɔk eezɛben mis pɛ ɛko. Nyɛy náá: «Mɛ ɛpebee bot! Mɛ bee bɛ ɛ́, dáa ele, bɛ ɛpekɛ!» 25 Yezu eebaazɛkɛl mɛmbɔ kɔ mis mɛ mot tak. Bhii tak, nyɛ moo zɛbee ɛnyɔɛpe, nyɛ eezɛtsak. Tin, nyɛ moo ebee popoopwon. 26 Bhii tak, Yezu eezɛke nɛ nɛ, nyɛ sik pɛ ndjaa, nyɛ eezɛke nɛ nɛ náá: «Sa wɔ ààtuula kɔ dɛl.»

27 Bhis'enek, Yezu bɛ nɛ bɛdjekel bɛ eezɛtɔ́ pɛ kyee mɛl mɛ di é ngwoob kyee dɛl Sezaade ɛ Filip ɛ. Ze ɛ ze dáa bɛ nadi ekɛ ɛ, nyɛ eezɛdji bɛ náá: «Bot ke náá, mam ɛ́ zɛ?» 28 Bɔɔ náá: «Bɛdhiiti ke ɛ́ náá, wɔ ɛ́ Zaŋ Nduuel-bot.» Bak náá: «Wɔ ɛ́ Eli. Yɛ kabɛ yak pak bot ɔɔ, bɔɔ ke ɛ́ náá, wɔ ɛ́ ngɔt tɔ bɛngoolel ɛ Mɛkpa ɛ Zɛɛb.» 29 Yezu eezɛke nɛ nɔɔ náá: «Yɛ kabɛ biyɔ ɔɔ, bi ke náá, mam ɛ́ zɛ?» Pyɛɛd eezɛbɔɔza: «Wɔ ɛ́ Mɛsia* Zɛɛb nadhis ɔ.» 30 Deenek, Yezu eezɛdul bɛ mɛlɔ ɛlyelɛpe náá, sa bɛ ààlɛɛ bot.

31 Bhis'enek nyɛ moo elyo bɛdjekel bɛ náá: «Ye goka ɛ́ Sɛɛŋɛlɛ Mɔn Mot zukaa ɛbuɛpe. Bɛpaa ɛ eYuda, nɛ eboo bɛghaa-Zɛɛb, zɛnɔɔ bɛghaŋ ɛ mɛkana mɛ etsi ɛ́ waabhina nyɛ. Nyɛ waagóaa. Mɛlu mɛlɛl bhis ɛsyee ɛ lɛ, nyɛ waagom.» 32 Nyɛ nalelɛɛ bɛ etɛp binek djas ɛ́ mɛpyɛmɛ, ààsyel sonok wat. Dáa Pyɛɛd nagwak deenek ɛ́, nyɛ eezɛdul nyɛ é ngwoob bɛ nɛ nɛ bɛbá, nyɛ nɛ nɛ náá: «Nàke deenek.» 33 Bhii tak, Yezu zokazɛbulal mis, gwyák bɛdjekel bɛ. Tin, nyɛ eezɛbiyo, zɛke nɛ Pyɛɛd náá: «Satan, dusa é mis mam etɛɛ náá, esiiza bɔ tok esiiza e Zɛɛb. Yɛ ɛ́ yii bot ɛ epuud!»

34 Bhii tak, wɔ gwaa, Yezu zɛdjóo ɛdhuu ɛ bot, dɔɔ nɛ bɛdjekel bɛ. Nyɛy nɛ nɔɔ náá: «Yɛ bɛ náá, mot ɛpekwyɛl ɛdu mɛ ɔɔ, nyɛ kat ɛkwyɛɛg ɛ nyel'ɛ, nyɛ bɛp mɛlaaba mɛ, da nyɛ ɛ́ du mɛ. 35 Etɛɛ náá, mot ɛ di esaa ɛtsik ɛ nyel'ɛ ɔɔ, nyɛ waasu yɛ. Yɛ kabɛ náá, mot aamyaal ɛsu ɛ́ tsik'ɛ kɔ ɛsu ɛ lam, nɛ kɔ ɛsu ɛ Mbɛɛ Bhaadal ɔɔ, nyɛ waabela tsik. 36 Yɛ ɛ́ tɛtɛ yé, wɔ bela mɛvu mɛ bɔs'ak djas, da wɔ ɛ́ su tsik na kɔm-kɔm? 37 Tɛtɛ yaa mbi sa mɛtaŋ etuud mot aadjɛ étɛp wɔ neebɔm tsik? 38 Mot ɛ gwak sen nɛ nam, nɛghu nɛ mɛkpa mam, é mis mɛ bot ɛ mesyem nɛ bot ɛ di ààkaab Zɛɛb é mɛlu mɛ mena dika mos'aak ɔɔ, tin, Sɛɛŋɛlɛ Mɔn Mot ɛ́ waadi nɛ sen nɛ nɛ é ghɛŋ nyɛ aazyɛ nɛ efofop bɛ tɔ duma Sɛɛg ɛ.»