1 Tɔ mɛlem kɛɛŋ, eboo bɛghaa-Zɛɛb, nɛ bɛpaa ɛ eYuda, zɛnɔɔ bɛghaŋ ɛ mɛkana mɛ etsi, naazɛboma étɛp ɛdjek tɛp tak. Ye nabɛ ɛ́ boo kwan eYuda. Bhii bɛ namɛt Yezu ɛ, bɛ ɛ́ boo zɛkɔl nyɛ mɛmbɔ. Bhii tak, bɛ eezɛtɔ́ nɛ nɛ pɛ daa kukuma Pilat. 2 Kuma bɛ nakum nɛ Yezu ɛ, wɔ gwaa, kukuma Pilat zɛdji nyɛ náá: «Yɛ ɛ́ wɔy ɛ di mɛkoozi mɛ eYuda?» Yezu eezɛbɔɔza nɛ nɛ náá: «Yɛ ɛ́ dáa wɔy wɔ ɛmet ke'enek.» 3 Wɔ gwaa, eboo bɛghaa-Zɛɛb zɛsu nyɛ zukamwaa nɛ etɛp. 4 Tin, kukuma Pilat eebaazɛke nɛ nɛ náá: «Wɔ ààkataŋal é? Gwaka etɛp djas di ekeaa náá, yɛ ɛ́ wɔy ɛ di ekus ɛ.» 5 Yezu ààkobɔɔza nyɛ yenek. Wɔ gwaa, Pilat djoka nyɛ.

6 É ghɛŋ mɛbyoŋ mɛ ePak djas, Pilat nabebɛ ɛ́ nɛ mɛfulu mɛ ɛpel ɛ mot membok ngɔt, da nyɛ ɛ́ wyiselaa é membok. Ɛdhuu ɛ bot ɛ́ nadi esɛ́ɛ mot Pilat aawyisal é membok ɔ. 7 É ghɛŋ tak, é membok, ye nabɛ ɛ́ nɛ dhiiti mot ndiila. Din ɛ lɛ nabɛ ɛ́ Bhaalabhas. Nyɛ namɛtaa ɛ́ lɔɔg wat, bɛ nɛ bot ɛ nabe boo dho nagó mot ɛ. 8 Tin, ɛdhuu ɛ bot ɛ nadi tin ɔ, zokazɛbyet, tɔ́ pɛ daa mɛkoozi étɛp ɛkɛdji nyɛ náá, nyɛ sa, dáa nyɛ boozezyɛ nɛ ɛsesa sok ɛ, nyɛ bet mot membok ngɔt. 9 Dáa kukuma Pilat nabee deenek ɛ́, nyɛ eezɛbɔɔza nɛ nɔɔ náá: «Bi kwyɛl ɛ́ náá, mɛ wyisal mɛkoozi mɛ eYuda?» 10 Etɛɛ náá, Pilat nadi egu náá, Yezu namɛtaa ɛ́, étɛp mbee lyem eboo bɛghaa-Zɛɛb. 11 É di'enek, eboo bɛghaa-Zɛɛb nabɛ ɛ́, bɛ moo ebesal ɛdhuu ɛ bot bɛ lɛɛ nɛ Pilat náá, ye goka ɛ́, nyɛ wyisal bɛ Bhaalabhas. 12 Pilat eebaazɛke nɛ nɔɔ náá: «Bi kwyɛl náá, mɛ sa mot bi di edjóo mɛkoozi mɛ eYuda ɔ, dáa?» 13 Ɛdhuu ɛ bot eebaazɛtsim: «Bemka nyɛ é mɛlaaba!» 14 Pilat eezɛdji bɛ náá: «Yaa etɛp ɛbiyo nyɛ sa?» Wɔ gwaa, bɛ baazɛtsim ɛlyelɛpe: «Bemka nyɛ é mɛlaaba!» 15 Dáa ye nabɛ náá, Pilat nadi ekwyɛl ɛdjɛ ɛdhuu ɛ bot binɔk sa elyem bɔɔ nadi ekwyɛl ɛ, nyɛ ɛ́ boowyisal bɛ Bhaalabhas. Tin, bhii nyɛ nalwom náá, Yezu nyuŋaa nɛ eghwyɛs ɛ, nyɛ ɛ́ boodjɛ bɛ nyak, étɛp bɛ neekɛbem nyɛ é mɛlaaba.

16 Esodja zokazɛtɔ́ nɛ Yezu kɔ ɛbɛsɛɛ ɛ bil ɛ kukuma Pilat. Bhii tak, bɛ eezɛdjóo ɛdhuu ɛ esodja djas, zɛsɛɛg bɛ. 17 Bɛ eezɛbét Yezu ndjookuwa na tɔɔbelaa. Bɛ eezɛpyeed nyɛ kɔtɔ nɛ kel mɛgɔk, sɔm nyɛ yɛ ɛ é lo dáa kɔtɔ mɛkoozi. 18 Bɛ moo tin eswos nyɛ mɛswosel mɛ mɛduka: «Mɛ eeswos wɔ, mɛkoozi mɛ eYuda!» 19 Bhii tak, bɛ moo tin enyuu nyɛ é lo nɛ le ghwaazok, esɛɛ nyɛ mɛtel é mis, ekwyit mɛboŋ nɛ ɛmalal sok bhwoob'ɛ. 20 Bhii bɛ nazeduk nyɛ deenek ɛ́, bɔɔ zokazɛdis nyɛ ndjookuwa na tɔɔbelaa bɛ nabét nyɛ ɛ, bɛ eezɛbulal nyɛ ndjookuwa nyɛ nadi nɛ yɛ sok ɛ. Bhii tak, bɛ eezɛwyis nɛ nɛ, étɛp bɛ neekɛbem nyɛ é mɛlaaba.

21 Wɔ gwaa, bɛ zɛdjɛ dhiiti mot nadi edus yɛ pɛ pyeeb ɔ, nyɛ kwyee Yezu nɛ bhel é ɛbɛp ɛ mɛlaaba nyɛ aakɛbemaa é tak ɛ. Din ɛ mot tak nabɛ ɛ́ Simɔŋ, mot dɛl ɛ di djóoaa Silɛn ɛ. Nyɛ nabɛ ɛ́ sɛɛg ɛ Alɛkzandɛlɛ nɛ Lufus. 22 Tin, bɛ eezɛtɔ́ nɛ Yezu pɛ dhiiti di bɛ nadi edjóo, Ghologhota ɛ. Din ɛ tak kwyɛl ɛlɛɛ «Di Bhoobo Lo». 23 Tin, bɛ eezɛkwyɛl ɛdjɛ Yezu mɛnyok puuza nɛ dhiiti ngwyɛl bɛ di djóo miid ɛ, Yezu eezɛpɛɛ ɛdɛ. 24 Bhii tak, bɛ eezɛbem nyɛ é mɛlaaba*. Bot ɛ nadi tin ɔ, zokazɛkaa ekaad bɛ, bhii bɛ nazesa ɛgwyeeg étɛp bɛ neesɛ́ɛ mot aanɔɔ ekaad tak ɔ. 25 Bɛ nabem nyɛ é mɛlaaba ɛ́, é ɛwala etɛn nɛ ená yii mɛlem. 26 Ekwyala ee nadi elɛɛ ɛsuk ɛ tɛp bɛ nabem nyɛ é mɛlaaba ɛ, nakwyɛl ɛlɛɛ náá: «Nyɛ ɛ́ mɛkoozi mɛ eYuda.» 27 Bɛ nabem nyɛ é mɛlaaba ɛ́, bɛ nɛ bot ɛ djii bɛbá: ngɔt pɛ mbɔ eghɛŋ, nwyak ngɔt pɛ mbɔ ɛmyɛl. [ 28 Yɛ ɛ́ deenek ɛ́ esesɛɛ djas nadi kwyala ɛ, nabela ɛsuk: «Bɛ nabee nyɛ ɛ́ tyɛ ngɔt nɛ bɛmbee e bot*».]

29 Bot ɛ nadi edhaa tin ɔ, nadi egɔ nyɛ, bɔɔ esesyaal elo, edji náá: «Heee! Wɔy mot di náá, wɔ ɛ́ nɛ ghwyil ɛwaaz kok Ndjaa-ebuwa, da wɔ ɛ́ baasum tɔ mɛlu mɛlɛl ɔ, 30 tsika nyel'ɔ wɔy wɔ ɛmet. Sula kɔ mɛlaaba mɛ wɔ di bema kɔ tak'enek!» 31 Tyee wat nɛ eboo bɛghaa-Zɛɛb nɛ bɛghaŋ ɛ mɛkana mɛ etsi moo tin eduk nyɛ náá: «Nyɛ ɛpetsik bot ɛ sis, nyɛ tok nɛ ghwyil ɛtsik nyel'ɛ nyɛ ɛmet! 32 Mɛsia, mɛkoozi mɛ bot ɛ mbyak Yisalaɛl, kasul kɔ mɛlaaba bɛ bem wɔ é tak ɛ, étɛp bis neebee, bhii tak, da bis ɛ́ dum koŋ nɛ nɔ!» Dɔɔ nɛ bot ɛ nabemaa bɛ nɛ nɔɔ ɔ, nabaadi ɛ́, elee nyɛ.

33 Dáa ye nadhaa mɛwala mɛlɛl bhii kuku mwos ɛ, wɔ gwaa, ɛgwyitok zɛgwyiidela kɔ ɛko ɛ bɔs djas, ɛgwyitok ɛlenek naabɔya, kɛkum ɛwala elɛl yii bikoko. 34 Tin, é ɛwala ɛ tak wat, wɔ gwaa Yezu zɛbo tsim: Eloyi, Eloyi, Lama sabatani? Ye kwyɛl ɛlɛɛ tɔ lii eBhele ɛ́ náá: «Zɛɛb Saagam, Zɛɛb Saagam! Étɛp yé wɔ bet mɛ mam mɛ ɛmet deenek*?» 35 Bɛdhiiti bot pak bot ɛ nadi tin ɔ, zokagwak dáa Yezu nalii ɛ. Bɔɔ nɛ bɛsɔ náá: «Gwakeka! Nyɛ ɛpedjóo Eli!» 36 Mot ngɔt pak'ɔɔ eezɛwyis kaab, kɛnɔɔ pes kaad, kɔl é bil le ghwaazok, duu yɛ tɔ mɛnyok mɛ na bwaaz-bwaaz. Bhii tak, nyɛ eezɛsɛɛb Yezu yɛ ɛ, nyɛ needɛ. Wɔ gwaa, nyɛ baake nɛ nɔɔ náá: «Betka, djhooka beeka nɛghu Eli ɛ́ waazyɛ, zɛdis nyɛ é mɛlaaba!» 37 Tin, bhii Yezu bo boo tsim ɛ, nyɛ naazɛsil eswos.

38 É di'enek wat, wɔ gwaa boo lɛmbɛ na pip-pip nadi tɔ Di na Dɛɛ, di ebɛk dhɛŋ nɛ koo tɔ Ndjaa-ebuwa ɔ, zokanyɛɛ kuku tak, kan pɛ ɛko, kɛkum pɛ si. 39 Dáa kukuma lɔɔg esodja nadi sok bhwoob ɛ Yezu, nabee dáa Yezu nasil eswos deenek ɛ́, nyɛ eezɛke náá: «Nɛ tsɛɛtsɛ, mot'ak nabɛ ɛ́ Mɔn ɛ Zɛɛb.»

40 Ye nabaabɛ pe ɛ́, nɛ boa nadi ebee etɛp binek ɛtsetaɛpe ɔ. Boa ɛ tak nabɛ ɛ́: Maali, moma dɛl Makdala, nɛ Maali, nyɛɛg ɛ Zak yii mɔɔ dhyeeb bɛ nɛ Zosɛs, zɛnɔɔ Salome. 41 Ye nabɛ ɛ́, boa nadi egyee e lɔɔg ɛ Yezu ɔ, yɛ ɛ́ bɔɔ ɛ nadi edje-djaabal Yezu é ghɛŋ bɛ nadi pɛ kyee dik Ghalile ɛ, zɛnɔɔ bɛdhiiti bɛtɛ nɛ boa natɔ́ pɛ Yeluzalɛm bɛ nɛ bɛnɔɔ lɔɔg wat étɛp bɛ neekwyee-kwyee nyɛ nɛ mɛsa ɔ.

42 Dáa ye nabɛ náá, dwoo moo ɛ́ bikoko ɛ, ye nagoka ɛ́ náá, mot nɛ mot kɛ ɛkoobal yɛ esesɛɛ, etɛɛ náá, mɛlem mɛ nadi edu dwoo tak ɛ, nabɛ ɛ́ mɛlem mɛ dwoo saba. 43 Tin, wɔ gwaa dhiiti mot, din ɛ lɛ nabɛ ɛ́ Zozɛf, nyɛ nadi ɛ́ mot dɛl Aelimate. Nyɛ nadi ɛ́, ngɔt tɔ bɛdhil ɛ bot ɛ boo kwan eYuda. Yɛ mɛfulu nabɛ ɛ́ ààdjala nɛ yii bɛsɔ. Nyɛ nabɛ ɛ́ nɛ ɛbwaalel ɛ ɛbee ɛ Ɛyoŋ ɛ Zɛɛb. Wɔ gwaa, nyɛ zɛtɔ́, kɛwaab muu ɛ Yezu pɛ daa Kukuma Pilat. 44 Tin, Pilat eezɛdjoka dáa Yezu naleegwyɛ kaab deenek ɛ́. Bhii tak, nyɛ eezɛdjóo mot nadi kɔ elo e esodja bɛ ɔ, nyɛ ɛ́ boozɛdji nyɛ náá: «Yezu eeloogwyɛ mos é?» 45 Bhii nyɛ nagwak dáa kukuma esodja nabɔɔza náá, nyɛ eezegwyɛ ɛ, wɔ gwaa, Pilat zɛmyaal náá, Zozɛf nɔɔ muu ɛ Yezu. 46 Tin, Zozɛf naazɛbɔm bheeza na puu, nyɛ ɛ́ boozɛsil muu ɛ Yezu é mɛlaaba. Bhii tak, nyɛ eezɛpil muu'ɛ tɔ bheeza tak. Tin, nyɛ eezɛnɔɔ yɛ, kɛwa tɔ ɛvit ɛ bɛ nabwak tɔ bat ɛkok ɛ. Bhii tak, bɛ eezɛbiŋal boo ɛkok ɛ bɛ nasa étɛp bɛ neediyal ɛvit ɛ tak nɛ yɛ ɛ. 47 Ghuna Maali, moma dɛl ɛ Makdala, nɛ Maali, nyɛɛg ɛ Zosɛs, nadi ebee di bɛ nawa muu ɛ Yezu ɛ. Ɛvit tɔ gho ɛko Yezu nadelaa tɔ tak ɛ