1 Dáa Yezu nadi ewyis tɔ kok Ndjaa-ebuwa ɛ, dhiiti djekel’ɛ ngɔt eezɛke nɛ nɛ náá: «Lyoel, gwyáka kɔkɔ yak mbi zumal nɛ mbi yak embɛɛ mɛkok é!» 2 Yezu zɛbɔɔza nɛ nɛ náá: «Wɔ eebee mbi eboo zumal mendjaa mak é? Tin, yɛ aanàkabaalik é di yak ɛkok ɛ wat kɛla kɔ sɔ ɛkok tɔ ndjaa bi di bee’aak. Etɛɛ náá, djas aadi ɛ́, bik, waazel, see é bɔs.»

3 Yezu eezɛdisi kɔ ɛtsok ɛ pyeeb oliv, pyeeb tak nadi egwyakel ɛ́, nɛ kok Ndjaa-ebuwa. Pyɛɛd nɛ Zak, bɛ nɛ Zaŋ, zɛnɔɔ Andele zokazɛdji nyɛ é ngwoob náá: 4 «Lɛɛa bis, esesɛɛ binek aasael den? Lyaala bis endem e bis aagwyák náá, esesɛɛ binek moo kɔ nɛ ɛsael ɛ.»

5 Yezu eezɛke nɛ nɔɔ náá: «Dika nɛ etsoŋ, sa mot ààkɔɔ bin. 6 Bɛtɛ nɛ bot ɛ́ waazyɛ nɛ din ɛ lam. Bɛ aake ɛ́ náá: "Yɛ ɛ́ mam ɛ di Mɛsia!" Bot ɛ tak ɛ́ waakwyital ɛdum ɛ koŋ nɛ Zɛɛb yii bot ɛbuɛpe. 7 É sok bi aadi, bi moo gwak lɛŋ mɛɛb nɛ menduk mɛ mɛɛb ɛ, sa mot ààbem ba, etɛɛ náá, ye nyɔ ɛ́ náá, esesɛɛ binek sael. Yenek djas ààlɛɛ náá, yɛ ɛ́ ɛsi ɛ bɔs. 8 Yak mbyak ɛ́ waaghɛɛ, kɛlumla dɛɛb nɛ dhiiti mbyak. Dhiiti ɛyoŋ ɛ́ waakɛghɛɛ, kɛlumla dɛɛb nɛ yak ɛyoŋ. É bɛdhiiti edi, bɔs ɛ́ waakuu, pwom edee ɛ́ waani kɔ mɛl. Mɛzel menek djas aadi ɛ́ dáa endem e mɛkɛn ɛsuula ɛbyel ɛ mɔn. 9 Yɛ kabɛ biyɔ bɛmet ɔɔ, dika nɛ etsoŋ. Bi ɛ́ waakɛpitaa pɛ boo kwan eYuda. Bi ɛ́ waanyuuŋaa nɛ eghwyɛs tɔ mendjaa mɛ mendjaala mɛ eYuda. Bi ɛ́ waakɛtaŋal pɛ daa ekukuma nɛ bɛmɛkoozi kɔ ɛsu ɛ din ɛ lam, étɛp bɛ neebela gham kɔ len. 10 Tin, ye goka ɛ́ náá, Mbɛɛ Bhaadal pookogoolel sok kɔ bɔs djas nɛ tɔ membyak djas. 11 É sok bɛ aadi etɔ́ nɛ nen, bɛ neekɛka bin ɛ, sa mot ààbem ba nɛ dáa bi aakɛtaŋal ɛ. Liika dáa Sisim aadjɛɛd bin é di’enek wat ɛ. Etɛɛ náá, ye tok biyɔ aakabaalii tin, yɛ ɛ́ Sisim na Dɛɛ ɛ paakataŋal é di’en. 12 Bɔn-nyɛɛg ngɔt ɛ́ waakɛkael pak’ɔɔ é ɛsaŋ ɛ́ náá, mɔn-nyɛɛg’ɔɔ neegóaa, dɔɔ nɛ bɛsɛɛg ɛ bɔn aazobaasa ɛ́ deenek nɛ bɔn bɔɔ. Bɔn ɛ́ waapit bɛbyael bɔɔ, bɔɔ kɛmɛtaa, kwyɛ ndjɛ sɔs, góaa. 13 Bot djas ɛ́ waabhina bin, étɛp din ɛ lam. Yɛ ɛ́ bot aamaad lyem kɛkum pɛ ɛsik ɔ aakwaabela tsik.»

14 «É ghɛŋ bi aabee mot di edjóoaa "etɛp e ɛpes nɛ puluk" ɔ. Bi ɛ́ waabee nyɛ, nyɛ eezetyaa é di nabɛ náá, nyɛ aanàkwaadi sok ɔ. Bot ɛ di egu ɛlaa mɛkana ɔ, goka ɛ́ nɛ ɛgwak náá, bot aadi pɛ kyee dik Yude ɔ, kaab, tɔ́ pɛ kɔ mɛtsok. 15 Mot ɛ́ di kɔ mii ndjaŋ’ɛ é ɛwala ɛlenek ɔ, sa nyɛ ààsul, étɛp ɛkɛnɔɔ dhiiti sonok tɔ ndjaa. 16 Mot aadi pɛ pyeeb é ɛwala ɛlenek ɔ, sa nyɛ ààsik, kɛnɔɔ ndjookuwa pɛ ndjaŋ’ɛ. 17 Haaa kpaa-ghoŋ dwoo lenek nɛ boa aadi nɛ mɛbum ɔ, zɛnɔɔ boa aadi nɛ bɔn edɛ mɛbel dwoo lɛɛg ɔ! 18 Djaalaka Zɛɛb, etɛɛ náá, esonok binek nàkum é mbu kwol. 19 Etɛɛ náá, mɛlu menek aadi ɛ́, mɛlu mɛ mezuk, mezuk mɛ wat di náá, ye dinaa ààpakosɛɛ sok, kana dáa Zɛɛb nalookus bɔs’ak ɛ, kɛyaka nɛ dwoo pan mos’ak. Yɛ aanàkwaabaadi nɛ kɔkɔ mbi mezuk deenek. 20 Ghɛŋ ɛpedi ààsa náá, mɛlu mɛ tak di ààdyeebabɔya ɔɔ, pe ye tok nɛ mot aatsak. Yɛ ɛ́ kɔ ɛsu ɛ bot ɛ nyɛ nazesɛ́ɛ, mɛlu mɛ mezuk menek di ba bim deenek. 21 Dhiiti mot ɛ́ lɛɛ bin náá: "Beeka Mɛsia di wak é!" nɛghu nyɛ kalɛɛ bin ɛ náá: "Mɛsia ɛ́ poon!" ɔɔ, sa mot ààmyaal nyɛ. 22 Etɛɛ náá, bɛmɛsia mɛ etsal nɛ bɛngoolel ɛ Mɛkpa ɛ Zɛɛb yii mɛkɔŋ ɛ́ waatuula ɛbuɛpe. Bɛ waasa bɛmɛvyɛkɛlɛ nɛ dhiiti endem mɛbwala, étɛp ɛkɔɔ bot, kɔɔ dɔɔ nɛ bot ɛ Zɛɛb nazesɛ́ɛ ɔ. 23 Dika nɛ etsoŋ etɛɛ náá, mɛ eezedul bin mɛlɔ.»

24 «Tin tɔ mɛlu menek, bhii mɛlu mɛ mezuk menek, gwyes ɛ́ waagwyiid suuut, dɔɔ nɛ ngɔn pe moo ààkakas,

25 ekwyikwyen ɛ́ waadus tɔ gwoo, bil si,

esa e mɛbwala djas di tɔ gwoo ɛ waadheegel.

26 É di’enek, bot ɛ́ waabee Sɛɛŋɛlɛ Mɔn Mot etuula tɔ eguud nɛ ghwyil nɛ duma djas. 27 Tin ɛ, nyɛ aakalwom efofop, bɛ neekɛsɛɛg bot ɛ Zɛɛb nazesɛ́ɛ ɔ, pɛ tɔ etuma ená yii bɔs, kana pɛ yak edum e bɔs, kɛyaka pɛ yii edum e gwoo.»

28 «Nɔɔka etsoŋ nɛ kana yak, dum nɛ le fiigh. Yɛ bɛ náá, elɛɛ bɛ moo zɛbula ebes ɔɔ, eka moo baakwyil é tak ɔɔ, guka náá, mbu gwyes moo kunaa. 29 Yɛ ɛ́ tyee wat nɛ biyɔ pe, é sok bi aabee endem binek moo nyen ɛ, guka náá, ɛbula ɛ Sɛɛŋɛlɛ Mɔn Mot moo zɛkunaa. Nyɛ moo ɛ́ é ngwoob ɛbɛ ɛ ndjaŋ’en. 30 Tsɛɛtsɛ nɛ tsɛɛtsɛ, mɛ lɛɛ bin ɛ́ náá, bot ɛ kɔkɔ membu mak aanàkwaagwyɛ djas, esonok mɛ lɛɛ wak djas’aak, ààsael. 31 Gwoo nɛ bɔs ɛ́ waadum, yɛ kabɛ Mɛkpa ɛ Zɛɛb ɔɔ, yɛ aalik ɛ́ kɔm-kɔm sii nɛ kɔm.»

32 «Dum nɛ dwoo, nɛ ɛwala ɛ esesɛɛ binek aasael ɛ, ye tok nɛ mot ngɔt di gu, efofop tɔ gwoo ààgu, dɔɔ nɛ Mɔn ɛ Zɛɛb pe ààgu dwoo tak. Yɛ ɛ́ Sɛɛg nyɛ ɛmet ɛ di egu. 33 Bi ɛ́ koobaka, dika ndjem etɛɛ náá, bi ààgu ɛlu nɛ ɛwala ɛ esonok binek aasael ɛ. 34 Yɛ aadi ɛ́, dáa mot di etɔ́ mɛdjoŋ, lik ndjaŋ’ɛ. Da nyɛ ɛ́ lik bot ɛ mɛsa mɛ ebaal ndjaa. Tin, nyɛ eezɛkaa mot nɛ mot yɛ mɛsa mɛ nyɛ aasa bhii koŋ’ɛ ɛ. Bhii tak, nyɛ kalɛɛ sangili di é ɛbɛ ɛ ndjaŋ’ɛ ɔ náá, nyɛ lik ebaal. 35 Dika ndjem, etɛɛ náá, bi ààgu dwoo nakuma ndjaa aaboobula ɛ, nɛghu nyɛ aabula ɛ́, bikoko, nɛghu yɛ aadi ɛ́, kuku pum, nɛghu yɛ aadi ɛ́ é bɛkuu ɛ sok, nɛghu yɛ aadi ɛ́ tɔ mɛlem. 36 Kyeeka, nyɛ ɛ́ zɛkɛbela bin zaka, biyɔ é gɔ́. 37 Etɛp ee mɛ di elɛɛ bin’aak, mɛ lɛɛ yɛ ɛ, nɛ bot djas: "Bɛɛka mis."»