1 Dhiiti dwoo eFalizyɛ nɛ bɛghaŋ ɛ mɛkana mɛ etsi naadus pɛ Yeluzalɛm, bɔɔ zokazɛsɛɛga bɛ nɛ Yezu, 2 ye nabɛ ɛ́, bɛ naabee bɛdhiiti bɛdjekel ɛ Yezu edɛ edee nɛ mendi é mɛmbɔ, bɔɔ ààgwyii yɛ dáa etsi di elyaal ɛ. 3 Etɛɛ náá, eFalizyɛ nɛ bot ɛ mbyak eYuda djas nadi ebaal etsi e bɛbhaab bɔɔ nalik ɛ ɛbuɛpe: bɛ ààdɛ edee, ààgwyii mɛmbɔ ɛnyɔɛpe. 4 Zɛnɔɔ náá, bɛ dus pɛ djando ɔɔ, bɛ aanàkwaadɛ edee, ààgwyiia. Bɛ nadi eduwal bɛtɛ nɛ bɛdhiiti etsi e mbyak’ɔɔ, dáa vaŋ mbi ɛgwyii ebɛɛlɛ, nɛ ba bɔɔ mɛbhe mɛ dyak, zɛnɔɔ esaan.

5 Wɔ gwaa, eFalizyɛ nɛ bɛghaŋ ɛ mɛkana mɛ etsi zɛdji Yezu náá: «Étɛp yé bɛdjekel bɔ di ààsa dáa etsi e bɛbhaab binaka nalik ɛ, di elɛɛ ɛ? Bɛ dɛ ɛ́ nɛ mendi é mɛmbɔ mɔɔ!» 6 Yezu eezɛbɔɔza nɛ nɔɔ náá: «Bi ɛ́ bot ɛ mɛdjhaaz pɛ ɛko, bhimis pɛ si! Sa ngoolel-Mɛkpa ɛ Zɛɛb Ezayi nalɛɛ dum nɛ nen ɛ, nabɛ ɛ́ tsɛɛtsɛ. Gwakeka sa di kwyala ɛ:

"Zɛɛb ke ɛ́ náá,

bot ɛ mbyak’ak duwal mɛ ɛ́ duwela mɛkɔŋ,

elyem bɔɔ ɛ́ pɛ kyee sis.

7 Zɛɛga mendjaala mɔɔ,

yɛ ɛ́ yii toto é mis mam,

etɛɛ náá, mɛlyo mɛ bɛ di elyo ɛ,

yɛ ɛ́ mɛlyo mɛ epuud.*"»

8 Bhii tak, Yezu baazɛke náá: «Bi byen ɛ́ etsi e Zɛɛb, da bi kaduwal ɛ́, yii bot nalik bin yɛ ɛ.

9 Bi eezedhuugal etsi e Zɛɛb ɛlyelɛpe, étɛp ɛduwal etsi e mbyak’en! 10 Bela náá, ye nabɛ ɛ́ Moiiz eeke náá: "Dila soog nɛ nyoog" nyɛ nabaake pe ɛ́ náá: "Mot di ekal sɛɛg nɛ nyɛɛg ɔ, goka ɛ́ nɛ góaa*". 11 Yɛ kabɛ biyɔ ɔɔ, bi lɛɛ bot ɛ náá, mot ɛ́ nɛ ghwyil ɛke nɛ sɛɛg nɛ nyɛɛg náá: "Beea esa ee mɛ waadjɛ wɔ ɛ, mɛ eekwom yɛ, mɛ needjɛ Zɛɛb ebuwa. Yenek lɛɛ ɛ́ Kɔɔdban." 12 Deenek, bi ààbet náá, nyɛ kwyee sɛɛg nɛ nyɛɛg. 13 Yɛ ɛ́ deenek ɛ́ bi di ehoola Mɛkpa ɛ Zɛɛb étɛp ɛgoola etsi e mbyak’en. Bi nɛ baasa bɛtɛ nɛ mbi kɔkɔ esonok di enɔŋel nɛ yenek ɛ.»

14 Wɔ gwaa, Yezu baazɛdjóo ɛdhuu ɛ bot binɔk djas. Nyɛy nɛ nɔɔ náá: «Biyɔ djas, gwakeka mɛ. Mɛtka sa mɛ di elii’aak: 15 Ye tok nɛ sa di ni tɔ nuub mot ɛ aasa náá, mot di nɛ edhuud. Yɛ ɛ́ sa di ewyis tɔ lɛ ɛ di esa náá, mot di nɛ edhuud. 16 [Gwakeka ɛnyɔɛpe, bi ɛ di nɛ mɛlɔ mɛ ɛgwak etɛp ɔɔ!]»

17 Dáa Yezu nadus tin ɛ, bɛ eezɛni tɔ ndjaa ɛtsetaɛpe nɛ ɛdhuu ɛ bot, bɛdjekel bɛ zokazɛdji nyɛ sa ɛsuk ɛ kana yenek nadi ekwyɛl ɛlɛɛ ɛ. 18 Nyɛ eezɛbɔɔza nɛ nɔɔ náá: «Dɔɔ nɛ biyɔ, bi tok nɛ etsoŋ ɛtiibal é? Bi ààgu náá, sa mot di ewa tɔ nuub’ɛ ɛ, yɛ aanàkwaasa náá, mot di nɛ edhuud é? 19 Esesɛɛ binek ààni tɔ lyem, ye ni ɛ́ tɔ mɔ’ɛ. Bhii tak, nyɛ kakɛsaaz yɛ ɛ tɔ ɛbyeed.» Tɔ mɛlyo menek Yezu nadi ekwyɛl ɛlɛɛ ɛ́ náá, edee djas goka ɛ́ nɛ ɛdɛel. 20 Bhii tak, nyɛ eebaazɛke náá: «Yɛ ɛ́ sa di ewyis tɔ mot ɛ di esa náá mot di nɛ edhuud. 21 Etɛɛ náá, embee egeka dus ɛ́ tɔ lyem mot. Yɛ ɛ́ esiiza ɛ di lwom bot náá, bɛ sa ɛpam, djii nɛ ɛgó ɛ bot, 22 ɛsa ɛ ɛzɔ, dɔɔb epata, mbee lyem, mɛkɔŋ, ɛwa lyem tɔp tɔ mɛzɔ, ɛwyeeb ɛ esa e baa, ebyas, ɛbet, mɛlyet. 23 Esesɛɛ binek djas, egeka tak dus ɛ́ tɔ elyem e bot. Yɛ ɛ́ di esa náá, mot di nɛ edhuud é mis ɛ Zɛɛb.»

24 Yezu eezɛdus tin, tɔ pɛ kyee dik Tiid. Nyɛ eezɛni tɔ dhiiti ndjaa, nyɛ nabɛ ɛ́ ààkwyɛl náá, bot gu náá, nyɛ ɛ́ tin. Ye nabɛ ɛ́ ààdjala náá, mot dáa nyɛy di sɔ. 25 Tin, ye nabɛ ɛ́ nɛ dhiiti moma, mbee sisim nadi edhek ɛsyes ɛ lɛ. Dáa nyɛ nagwak menduk ɛ Yezu ɛ, nyɛ eezɛzyɛ kaab pɛ daa lɛ, nyɛy zokazɛkwyit mɛboŋ si, sok bhwoob’ɛ. 26 Moma tak nabɛ ààbɛ moma mbyak eYuda. Nyɛ nabyel ɛ́ pɛ dɛl Fenisi pɛ kyee dik Siili. Nyɛ eezɛdjaala nɛ Yezu náá, nyɛ sɔ mbee sisim nadi tɔ nyel mɔn’ɛ ɔ. 27 Tin, Yezu eezɛbɔɔza nɛ nɛ náá: «Beta, bɔn pookodɛ, djil. Etɛɛ náá, mapa bɔn di goka nɛ ɛdɛ ɛ, yɛ àànyɔ, ye mwasaa, djɛaa bɔn bɛbhyɛ.» 28 Wɔ gwaa moma yenɔk baazɛpesal náá: «Ghɛŋ, wɔ ɛ́ nɛ gham. Ye goka ɛ́ wɔ gu náá, bɔɔ bɛbhyɛ di si mesa ɔ, bɛ dɛ ɛ́ bɔɔ eghutu-ghutu emapa ee bɔn di kwyital é ghɛŋ bɛ di edɛ kɔ mesa ɛ.» 29 Tin, Yezu eezɛke nɛ moma yenɔk náá: «Wɔy, moma, dum nɛ yala yɔ, sika pɛ ndjaŋ’ɔ. Mbee sisim tak eezewyis tɔ nyel ɛsyes ɛ lɔ.» 30 Wɔ gwaa, nyɛ zɛsik pɛ ndjaŋ’ɛ. Tin, nyɛ eekɛbela mɔn’ɛ ndjaasi kɔ goŋ, mbee sisim eezewyis tɔ lɛ.

31 Bhii tak, Yezu eezɛdus pɛ kyee dik Tiid, zɛdhaa tɔ́ pɛ boo ghaada Sidɔn, zɛtsaal yii kyee bɔs mɛdhik mɛ eghaada kam, étɛp nyɛ neetɔ́ pɛ kyee boo soob na djato-djato e Ghalile. 32 Wɔ gwaa, bɛ zɛzyɛ nyɛ nɛ mot na endiila e mɛlɔ, ààgu ɛlii ɛnyɔɛpe. Bɛ eezɛdjaala nɛ nɛ náá, nyɛ kɛl nyɛ mɛmbɔ, nyɛ neetsak. 33 Tin, wɔ gwaa Yezu zɛnɔɔ mot tak, tiila nɛ nɛ ba ɛtsetaɛpe nɛ ɛdhuu ɛ bot. Bhii tak, nyɛ eezɛwa mot tak bhin tɔ mɛlɔ. Nyɛ eezɛsɛɛ mɛtel, zɛmɛt nyɛ djem nɛ yɛ. 34 Bhii tak, nyɛ eezɛben mis pɛ ɛko, nyɛ eezɛso bhiyo. Nyɛy nɛ mot’enɔk náá: «Effata!» Ye kwyɛl ɛlɛɛ náá: «Bɛŋela!» 35 É di’enek wat, mɛlɔ mɛ mot tak eezɛbɛŋel; djem pe eezɛtiiel. Nyɛ moo elii ɛnyɔɛpe. 36 Yezu eezɛlɛɛ nɛ bot binɔk djas náá, sa mot ààlɛɛ mot ngɔt sa sael wak ɛ, yenek nadhedhɛɛg bot ɛ dhɛɛgak. Lyaka nyɛ nadi elelyak bot ɛ, nabebesal bot ɛ́ beselak. 37 Bot naadyeebadjoka dhaa nyel. Bɔɔ náá: «Esa ee nyɛ di esa djas ɛ, yɛ ɛ́ ɛnyɔɛpe! Nyɛy batabɛɛ mɛlɔ mɛ bɛ na endiila e mɛlɔ, ebubu batalii!»